អ្នកជំនាញ៖ ប្រើប្រាស់ដីអស់សក្ដានុពលបាន លុះត្រាតែមានប្លង់មេអភិវឌ្ឍន៍

អ្នកជំនាញអចលនទ្រព្យ បានអះអាងថា បើកាលណាការអភិវឌ្ឍវិស័យសំណង់ មានប្លង់មេត្រឹមត្រូវពីអាជ្ញាធរ នោះនឹងជួយឲ្យការអភិវឌ្ឍក្នុងតំបន់នោះប្រើប្រាស់អស់សក្ដានុពល។ ការលើកឡើងបែបនេះ ស្របពេលដែលបច្ចុប្បន្ន បញ្ហាកង្វះប្លង់គោលនៃវិស័យសំណង់ នៅតែជាកត្តាប្រឈមមួយក្នុងការអភិវឌ្ឍប្រកបដោយចីរភាព។

ទិដ្ឋភាពមួយនៃទីក្រុងភ្នំពេញ ថតពីលើអគារខ្ពស់។

តួយ៉ាង កន្លងមក ក្រុមអ្នកអភិវឌ្ឍវិស័យសំណង់ ក៏ដូចជាអ្នកជំនាញផ្នែកអចលនទ្រព្យជាច្រើន តែងតែត្អូញត្អែរជាច្រើនលើកច្រើនសាចំពោះបញ្ហានេះ ពិសេសគឺ ការខ្វះចន្លោះប្លង់មេក្នុងការអភិវឌ្ឍហេដ្ឋារចនាសម្ព័ន្ធ ដូចជា ផ្លូវ ប្រព័ន្ធភ្លើង និងលូទឹក ដែលចេញដោយរាជរដ្ឋាភិបាលជាដើម។

យ៉ាងណាក៏ដោយ លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុនអចលនទ្រព្យ ស៊ីភីអិល បានលើកឡើងថា ការរៀបចំប្លង់មេក្នុងការអភិវឌ្ឍវិស័យសំណង់ គឺពិតជាសំខាន់ខ្លាំងណាស់ក្នុងការទាក់ទាញការវិនិយោគមកកាន់កម្ពុជាកាន់តែច្រើនឡើងៗ ពិសេស គឺការវិនិយោគពីក្រៅប្រទេសតែម្ដង។

លើសពីនេះ តម្លៃដីដែលមានរៀបចំការអភិវឌ្ឍស្របទៅតាមប្លង់គោល ក៏នឹងអាចមានតម្លៃកើនឡើងខ្ពស់នៅថ្ងៃអនាគតផងដែរ ព្រោះថាដីនោះ វាអាចប្រើប្រាស់សម្រាប់ការអភិវឌ្ឍអស់សក្ដានុពល។ ខុសពីដីពុះឡូតិ៍មួយចំនួន ដែលមិនមានរៀបចំហេដ្ឋារចនាសម្ព័ន្ធត្រឹមត្រូវ ព្រោះវានឹងអាចផ្ដល់នូវផលអវិជ្ជមានច្រើនសម្រាប់ការរស់នៅ ហើយតម្លៃដីក៏មិនអាចឡើងថ្លៃខ្ពស់បានដែរ។

ជាមួយគ្នានេះដែរ លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ KFA ក៏បានលើកឡើងដែរថា ប្លង់គោល គឺជាយន្ដការមួយដែលអាចជួយឲ្យការអភិវឌ្ឍវិស័យសំណង់ឆ្ពោះទៅរកចីរភាពនាពេលអនាគត ហើយវាក៏ជាយុទ្ធសាស្ត្រគន្លឹះមួយ ដែលរាជរដ្ឋាភិបាលអាចគ្រប់គ្រងវិស័យសំណង់ប្រកបដោយប្រសិទ្ធភាពខ្ពស់ ពោលគឺជំរុញឲ្យការអភិវឌ្ឍបានចំទិសដៅ និងមិនជួបបញ្ហាទៅថ្ងៃមុខនោះឡើយ។

ឧកញ៉ា នួន រិទ្ធី ប្រធានក្រុមហ៊ុនអចលនទ្រព្យ KFA។ រូបភាព៖ ហេង ភារម្យ

លោកឧកញ៉ា បន្ថែមថា រាជរដ្ឋាភិបាលកម្ពុជាគួរតែមានការគិតគូរឲ្យបានស៊ីជម្រៅថែមទៀត ទាក់ទងនឹងការរៀបចំតំបន់សម្រាប់ការអភិវឌ្ឍ តួយ៉ាង ភាគខាងត្បូងគួរអភិវឌ្ឍយ៉ាងដូចម្ដេច ភាគខាងជើង ខាងលិច ឬខាងកើត គួររៀបចំអភិវឌ្ឍអ្វីខ្លះ ព្រោះថា ប្រទេសអភិវឌ្ឍន៍ភាគច្រើនដូចជា អូស្ត្រាលី ក៏គេធ្វើគ្រប់គ្រងការអភិវឌ្ឍយ៉ាងដូច្នេះដែរ។

យ៉ាងណាក៏ដោយចុះ លោកឧកញ៉ា នួន រិទ្ធី បានគូសបញ្ជាក់ថា បច្ចុប្បន្ន រាជរដ្ឋាភិបាលក៏បាននិងកំពុងរៀបចំជាបណ្ដើរៗហើយដែរ។

សូមជម្រាបដែរថា កន្លងមក ក្រុមអ្នកអភិវឌ្ឍន៍លំនៅដ្ឋានជាច្រើនបានលើកឡើងថា កង្វះប្លង់មេនៃប្រព័ន្ធហេដ្ឋារចនាសម្ព័ន្ធពីសំណាក់រាជរដ្ឋាភិបាល នៅតែជាកត្តាប្រឈមមួយ ក្នុងការអភិវឌ្ឍលំនៅដ្ឋានរបស់ពួកគេ ឲ្យស្របទៅតាមស្ដង់ដារខ្ពស់ និងប្រកបដោយចីរភាព។

ក្រុមអ្នកអភិវឌ្ឍន៍លំនៅដ្ឋាន រំពឹងថា រាជរដ្ឋាភិបាលនឹងជួយរៀបចំ និងដាក់ចេញនូវប្លង់មេនៃការអភិវឌ្ឍទីក្រុង ពិសេស ប្រព័ន្ធហេដ្ឋារចនាសម្ព័ន្ធឲ្យបានឆាប់ ដើម្បីអាចដើរទាន់នៃកំណើនយ៉ាងឆាប់រហ័សនៃវិស័យសំណង់ និងអចលនទ្រព្យកម្ពុជា៕

None