ក៏ប៉ុន្ដែ អ្វីដែលគេចាប់អារម្មណ៍នោះ គឺប្រទេសឥណ្ឌា ហាក់មិនសូវមាត់កច្រើននោះទេ នៅក្នុងកិច្ចប្រជុំនេះ ខណៈប្រទេសមហាយក្សនៅអាស៊ីអាស៊ីមួយនេះ ត្រូវបានគេបារម្ភថា អាចនឹងមានឥរិយាបថងាកទៅរករុស្ស៊ីកាន់តែខ្លាំងជាងមុន។ នេះបើតាមការចុះផ្សាយពីសារព័ត៌មានរបស់ជប៉ុន Nikkei។
ការចូលរួមរបស់នាយករដ្ឋមន្ត្រីអូស្ត្រាលីថ្មីលោក អាន់តូនី អាល់បាណេស ដែលទើបស្បថចូលកាន់តំណែងថ្មីៗត្រឹមតែមួយថ្ងៃមុនកិច្ចប្រជុំនេះ បានឆ្លុះបញ្ចាំងពីសារសំខាន់នៃកិច្ចសន្ទនាផ្នែកសន្តិសុខលក្ខណៈចតុភាគី ដែលកំពុងដើរតួមនាទីសំខាន់ខ្វះមិនបាន ពិសេសអំឡុងពេលដែលសណ្តាប់ធ្នាប់ពិភពលោកកំពុងរងការគំរាមកំហែង មិនធ្លាប់មានចាប់តាំងពីសម្ព័ន្ធមិត្ត Quad បានបង្កើតឡើងនៅឆ្នាំ២០០៤មក។
ប្រធានាធិបតីអាមេរិកចូ បៃឌិន, នាយករដ្ឋមន្ត្រីជប៉ុនគីហ្ស៊ីដា, នាយករដ្ឋមន្ត្រីឥណ្ឌា ណារីនដ្រា ម៉ូឌី និងនាយករដ្ឋមន្ត្រីថ្មីរបស់អូស្ត្រាលីលោកអាល់បាណេស បានជួបគ្នាជជែកគ្នាអស់រយៈពេលពីរម៉ោង នៅការិយាល័យនាយករដ្ឋមន្ត្រីជប៉ុន នាទីក្រុងតូក្យូ។ នេះគឺជាការជួបគ្នាដោយផ្ទាល់លើកដំបូងសម្រាប់ឆ្នាំនេះ បន្ទាប់ពីកិច្ចប្រជុំកន្លងមកបានធ្វើឡើងតាមអនឡាញ ដោយសារតែការរាលដាលកូវីដ១៩។
អំឡុងពេលពិភាក្សា ប្រធានាធិបតីជប៉ុន ដែលធ្វើជាម្ចាស់ផ្ទះដឹកនាំកិច្ចប្រជុំនិយាយថា៖ ចាប់តាំងពីសម្ព័ន្ធមិត្តទាំង៤ជួបគ្នាលើកចុងក្រោយបង្អស់ក្នុងខែកញ្ញា មានរឿងហេតុជាច្រើនបានកើតឡើង ហើយដែលបានបំផ្លិចបំផ្លាញសណ្តាប់ធ្នាប់អន្តរជាតិ ដូចជាការឈ្លានពានរបស់រុស្ស៊ីទៅលើអ៊ុយក្រែនជាដើម។ វាជារឿងប្រឈម និងជាការគំរាមកំហែងខ្លាំងណាស់ ដល់គោលការណ៍ដែលមានចែងក្នុងធម្មនុញ្ញអង្គការសហប្រជាជាតិ។ លោក គីហ្ស៊ីដា បន្ថែមថា មិនត្រូវអនុញ្ញាតឱ្យរឿងដដែលនេះ កើតឡើងនៅឥណ្ឌូប៉ាស៊ីហ្វិកទៀតឡើយ។
លោក Albanese នាយករដ្ឋមន្ត្រីថ្មីអូស្រ្តាលី ត្រូវបានផ្តល់ឱកាសឱ្យនិយាយបន្ទាប់ពីលោក Kishida ដោយលោកបានលើកឡើងថា រដ្ឋាភិបាលរបស់អូស្រ្តាលីប្តេជ្ញាធ្វើការជាមួយសម្ព័ន្ធមិត្ត Quad។
ក្នុងនាមជាក្បាលម៉ាស៊ីនថ្មីរបស់ទីក្រុងកង់ប៉េរា អាទិភាពរបស់លោក អាល់បានណេស គឺ ស្របតាមរបៀបវារៈ របស់ Quad ដោយចាត់វិធានការលើការបញ្ហាសំខាន់ៗដូចជា ការប្រែប្រួលអាកាសធាតុ និងការកសាងតំបន់ឥណ្ឌូប៉ាស៊ីហ្វិកកាន់តែរឹងមាំជាងមុន តាមរយៈការពង្រឹងសន្តិសុខ និងសេដ្ឋកិច្ចកាន់តែប្រសើរ សន្តិសុខតាមអ៊ីនធឺណិត សន្តិសុខថាមពល និងបរិស្ថាន និងសុខាភិបាលកាន់តែប្រសើរជាងមុន។
អត្ថបទគួរអាន
ចំណែកប្រធានាធិបតីអាមេរិក លោកចូ បៃឌិន វិញបានលើកឡើងចំៗថា បច្ចុប្បន្នពិភពលោកកំពុងអាប់អួ ជាមួយនឹងការឆ្លងកាត់ពេលវេលាដ៏ខ្មៅងងឹតមួយនៃប្រវត្តិសាស្ត្រ។ ដោយចង់សំដៅដល់សង្គ្រាមនៅអ៊ុយក្រែន លោកបៃឌិន បន្តថានេះមិនមែនត្រឹមជាបញ្ហារបស់អឺរ៉ុបនោះទេ វាជាបញ្ហាសកល។ ដរាបណារុស្ស៊ីនៅតែបន្តសង្រ្គាម សហរដ្ឋអាមេរិកនឹងធ្វើការជាមួយដៃគូ ដើម្បីដឹកនាំការឆ្លើយតបជាសកលទៅកាន់ទីក្រុងម៉ូស្គូ ពីព្រោះថាវានឹងប៉ះពាល់ដល់គ្រប់ផ្នែកទាំងអស់នៃពិភពលោក។
ជាចុងក្រោយគឺលោកណារិនដ្រា ម៉ូឌី មេដឹកនាំឥណ្ឌាគ្រាន់តែបានអំពាវនាវថា ឥណ្ឌូប៉ាស៊ីហ្វិកគឺត្រូវតែសេរី និងបើកចំហប៉ុណ្ណោះ។ គួរកត់សម្គាល់ថា លោកមិនបានលើកឡើងអំពីបញ្ហាសង្គ្រាមរុស្ស៊ីនិងអ៊ុយក្រែន សូម្បីតែមួយម៉ាត់ឡើយ។
គួរជម្រាបថា ក្នុងចំណោមសម្ព័ន្ធមិត្ត Quad ទាំងបួនប្រទេស តួនាទីរបស់ឥណ្ឌាក្នុងទិដ្ឋភាពសន្តិសុខក្នុងតំបន់ កំពុងមានសារសំខាន់កាន់តែខ្លាំងឡើង បន្ទាប់ពីមានការប៉ះទង្គិចគ្នានៅតាមព្រំដែនជាមួយចិនកាលពីខែមិថុនា ឆ្នាំ២០២០ ដែលវាជារឿងកម្រណាស់ សម្រាប់ប្រទេសណាមួយ ទៅមានជម្លោះ និងប៉ះទង្គិចគ្នាដោយកម្លាំងជាមួយចិន។
ប៉ុន្តែ ពេលនេះឥណ្ឌាក៏បានធ្វើឲ្យគេបារម្ភមិនតិចដែរ នៅចំពោះមុខស្ថានភាពទំនាក់ទំនងទ្វេភាគីបច្ចុប្បន្ន ជាមួយរុស្ស៊ី ខណៈមកទល់ពេលនេះ អស់ពេល៣ខែពេញហើយនៃការឈ្លានពានរបស់រុស្ស៊ីទៅលើអ៊ុយក្រែន ប៉ុន្ដែឥណ្ឌា មិនបានដាក់ទណ្ឌកម្មលើទីក្រុងម៉ូស្គូដូចទៅនឹងសម្ព័ន្ធមិត្តរបស់ខ្លួនអាមេរិក ធ្វើនោះទេ។
ឥណ្ឌាមានទំនាក់ទំនងជាយុទ្ធសាស្ត្រ ការពារជាតិ និងទំនាក់ទំនងជាប្រវត្តិសាស្ត្រជាមួយរុស្ស៊ី ហើយឥណ្ឌាបានបដិសេធ មិនបោះឆ្នោតថ្កោលទោសរុស្ស៊ីនៅអង្គការសហប្រជាជាតិ ប្រឆាំងនឹងការឈ្លានអ៊ុយក្រែនថែមទៀត។ មិនតែប៉ុណ្ណោះឥណ្ឌាបានបង្កើនការនាំចូល ពិសេសប្រេងឆៅពីរុស្ស៊ីថែមទៀត។ ការប្រកាន់ជំហរទាំងនេះ គឺផ្ទុយស្រឡះទាំងស្រុងពីសមាជិក Quad ឯទៀត ដែលម្នាក់ៗខិតខំរិះរកទណ្ឌកម្មដាក់លើម៉ូស្គូ ហើយខ្លះទៀតបានបញ្ឈប់ការនាំចូលប្រេងពីរុស្ស៊ីទៅហើយក្តី។
ហេតុដូចនេះហើយសម្ព័ន្ធមិត្ត Quad ពិតជាអាចរួមគ្នាយឹតយោង និងថែរក្សាសណ្តាប់ធ្នាប់ពិភពលោកបានមកល្អប្រសើរវិញក្នុងកំរិតណានោះ យើងប្រហែលជានឹងត្រូវការពេលច្រើនទៀត ដើម្បីតាមដានបន្ត៕
None
