រហូតមកដល់ពេលនេះ មេដឹកនាំលោកខាងលិចមិនទាន់បានលម្អិតព័ត៌មាននៃការឆ្លើយតប ដែលពួកគេនឹងដាក់ទណ្ឌកម្មលើរុស្សី ប្រសិនបើរុស្ស៊ីឈ្លានពានអ៊ុយក្រែននោះទេ គ្រាន់តែកន្លងមកគេដឹងថា លោកខាងលិចអាចនឹងឆ្លើយតបជាផ្នែកយោធា និងការដាក់ទណ្ឌកម្មសេដ្ឋកិច្ចដែលនឹងមិនធ្លាប់មានពីមុនមក។
ប៉ុន្ដែ ប្រធានគណៈកម្មការអឺរ៉ុបលោកស្រី អួរស៊ូឡា វ៉ុនឌែរ ឡេយែន កាលពីថ្ងៃអាទិត្យ បានបង្ហើបឲ្យដឹងខ្លះៗថា ជាគោលការណ៍ប្រទេសរុស្ស៊ីនឹងត្រូវបានកាត់ចេញពីទីផ្សារហិរញ្ញវត្ថុអន្តរជាតិ ហើយទណ្ឌកម្មនឹងត្រូវដាក់លើទំនិញដែលរុស្ស៊ីត្រូវការចាំបាច់ពីអឺរ៉ុប ដើម្បីធ្វើទំនើបកម្ម និងធ្វើពិពិធកម្មសេដ្ឋកិច្ចរុស្ស៊ី ខណៈលោកខាងលិចជាកន្លែងផលិតផលិតផលសំខាន់ៗទាំងនោះលេចធ្លោជាងគេនៅទូទាំងសកល។ ដូចនេះរុស្សី ប្រសិនបើទំនិញទាំងនោះ ត្រូវបានបិទខ្ទប់មិនឲ្យនាំចេញទៅរុស្ស៊ី នោះរុស្ស៊ីនឹងមិនមានទីផ្សារនាំចូលជំនួសនោះឡើយ។
អត្ថបទគួរអាន
ទោះយ៉ាងណា មេដឹកនាំអឺរ៉ុបរូបនេះ បានសង្កត់ធ្ងន់ថា ការដាក់ទណ្ឌកម្មនេះ គឺលុះត្រាតែរុស្ស៊ីឈ្លានពានអ៊ុយក្រែនតែប៉ុណ្ណោះ។
ទន្ទឹមនឹងនេះ ដូចដែលបានដឹងហើយថា ការពឹងផ្អែករបស់រុស្ស៊ី គឺលើការនាំចេញឥន្ធនៈហ្វូស៊ីល ខណៈឥន្ធនៈនេះ រុស្សីបង្កើតបានពីរភាគបីនៃការនាំចេញរបស់ខ្លួន ហើយពាក់កណ្តាលនៃថវិការបស់រុស្ស៊ីបានមកពីការនាំចេញប្រេងឥន្ធនៈ។ ដូចនេះការពឹងផ្អែកខ្លាំងរបស់រុស្ស៊ីលើការនាំចេញប្រេងឥន្ធនៈនេះ អាចចាត់ទុកថាភាពទន់ខ្សោយរបស់រុស្សី ហើយក្នុងករណីរុស្សីត្រូវការធ្វើទំនើបកម្ម វាច្បាស់ណាស់ថា នឹងមិនអាចទៅរួច ប្រសិនបើការដាក់ទណ្ឌកម្មបន្ថែមទៀតពីលោកខាងលិចត្រូវបានធ្វើឡើងមែននោះ។
គួរជម្រាបថា រុស្ស៊ីបានបញ្ជូនទាហានប្រហែល ១៥ម៉ឺននាក់ ទៅតំបន់ជុំវិញព្រំដែនភាគខាងជើង និងខាងកើតប្រទេសអ៊ុយក្រែន។ ជុំវិញវិបត្តិរុស្សី-អ៊ុយក្រែនជាថ្មីម្ដងទៀតនេះ គឺរុស្សីធ្វើឡើងដើម្បីទាមទារការធានាបានថា អ៊ុយក្រែននឹងមិនត្រូវបានអនុញ្ញាតឱ្យចូលរួមជាមួយសម្ព័ន្ធមិត្តណាតូ ខណៈដែលរុស្សីបារម្ភថាប្រសិនបើអ៊ុយក្រែនចូលជាសមាជិកណាតូ នោះវាប៉ះពាល់ដល់សន្តិសុខរយៈពេលវែងរបស់រុស្ស៊ី៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
