ហេតុអ្វីបានជាធនាគារកណ្ដាលអាម៉េរិក មិនព្រមកាត់បន្ថយអត្រាការប្រាក់តាមការទាមទារជារឿយៗរបស់លោក ត្រាំ?

កាលពីថ្ងៃសុក្រ ប្រទេសអ៊ីស្រាអែល បានបើកការវាយប្រហារទីតាំងនុយក្លេអ៊ែ​ និងយោធារបស់អ៊ីរ៉ង់ ដ៏ខ្លាំងក្លាមិនធ្លាប់មានពីមុន ដែលបានធ្វើឱ្យតម្លៃប្រេងពិភពលោកឡើងថ្លៃ ខណៈ វិនិយោគិន និងអ្នកវិភាគបារម្ភថា ជម្លោះដែលចេះតែកើនឡើងអាចជំរុញឱ្យអតិផរណាកើនឡើងនៅទូទាំងពិភពលោករួមទាំងនៅសហរដ្ឋអាម៉េរិក ផងដែរ និងអាចជំរុញឱ្យធនាគារកណ្តាលអាម៉េរិក ពន្យារពេលកាត់បន្ថយអត្រាការប្រាក់បន្ថែមនៅក្នុងកិច្ចប្រជុំគោលនយោបាយរយៈពេលពីរថ្ងៃនៅក្នុងសប្តាហ៍នេះ។

លោក រ៉ូប៊ឺត សូឃីន (Robert Sockin) សេដ្ឋវិទូពិភពលោកជាន់ខ្ពស់នៅធនាគារ Citi group បានប្រាប់ទូរទស្សន៍ CNN ថា ប្រសិនបើជម្លោះរវាងអ៊ីស្រាអែល និងអ៊ីរ៉ង់ កាន់តែរីករាលដាល ហើយតម្លៃប្រេងនឹងនៅតែបន្តឡើងថ្លៃខ្លាំងមែននោះ កត្តាទាំងនេះនឹងបន្ថែមបញ្ហាដល់ធនាគារកណ្តាលអាម៉េរិក ក្នុងការសម្រេចចិត្តបញ្ចុះអត្រាការប្រាក់ ដ្បិតធនាគារកណ្តាលនេះកំពុងប្រឈមនឹងគោលនយោបាយដំឡើងពន្ធរបស់លោក ដូណាល់ ត្រាំ។

លោកបានបន្ថែមថា មន្រ្តីរបស់ធនាគារកណ្តាលអាម៉េរិក បានសង្កត់ធ្ងន់ថា ពួកគេមិនប្រញាប់ប្រញាល់ក្នុងការកាត់បន្ថយអត្រាការប្រាក់ពេកនោះទេ ព្រោះពួកគេមិនដឹងថា តើពន្ធគយនឹងដំណើរការទៅយ៉ាងណានៅក្នុងសេដ្ឋកិច្ចនៅឡើយទេ ប៉ុន្តែបើពួកគេមានហានិភ័យខ្ពស់ពីកើនឡើងអតិផរណានោះ ពួកគេទំនងជាពិចារណាក្នុងការកាត់អត្រាការប្រាក់នៅចុងឆ្នាំនេះ។

ក្រុមអ្នកកំណត់អត្រាការប្រាក់របស់ធនាគារកណ្តាលអាម៉េរិក បាននិយាយរួចហើយថា ពួកគេកំពុងរង់ចាំមើលឥទ្ធិពលនៃការផ្លាស់ប្តូរគោលនយោបាយរបស់លោក ត្រាំ រីករាលដាលនៅក្នុងសេដ្ឋកិច្ចជាមុនសិន។ ក្រុមអ្នកជំនាញបានប្រាប់ទូរទស្សន៍ CNN ថា ដោយហេតុតែមានភាពតានតឹងនៅមជ្ឈិមបូព៌ាជាថ្មី ដូច្នេះវាកាន់តែដាក់សម្ពាធដល់ធនាគារកណ្តាលអាម៉េរិក ក្នុងការបញ្ចុះអត្រាការប្រាក់។

លោក ចន វេលីស (John Velis) អ្នកយុទ្ធសាស្រ្តម៉ាក្រូរបស់អាម៉េរិក នៅក្រុមហ៊ុន BNY Mellon បាននិយាយថា តាមពិតទៅគោលនយោបាយរូបិយវត្ថុមិនសមណាយកទៅពាក់ព័ន្ធនឹងវិបត្តិភូមិសាស្ត្រនយោបាយនោះទេ ព្រោះវាអាចធ្វើឱ្យធនាគារកណ្តាលអាម៉េរិក កាន់តែមានការប្រុងប្រយ័ត្នបន្ថែមទៀតមុននឹងកាត់បន្ថយអត្រាការប្រាក់៕

ដោយ៖ សុខ មង្គល