លោកពូទីន នៅថ្ងៃអង្គារសប្តាហ៍នេះ បានចេញមកធ្វើអត្ថាធិប្បាយជាសាធារណៈដោយផ្ទាល់ ដែលជាលើកដំបូងរបស់លោកពាក់ព័ន្ធនឹងវិបត្តិនៅព្រំដែនអ៊ុយក្រែន។ លោកពូទីន មិនបានបង្ហាញពីសញ្ញាចុះញ៉ម ឬបោះបង់ឡើយ ពិសេសចំពោះអ្វីដែលរុស្សីបានទាមទារទាក់ទិនបញ្ហាសន្តិសុខនៅក្នុងតំបន់អឺរ៉ុបខាងកើត។
លោកពូទីន បានថ្លែងចំៗថា៖ វាច្បាស់ណាស់ហើយថា ក្តីកង្វល់និងការស្នើសុំរបស់យើងមិនត្រូវបានគេអើពើឡើយ។ លោកថ្លែងដូចនេះនៅអំឡុងសន្និសិទសារព័ត៌មានមួយ ក្រោយជំនួបរវាងលោក និងនាយករដ្ឋមន្ត្រីហុងគ្រី។ ហុងគ្រីដែលជាប្រទេសមួយក្នុងចំណោមសមាជិករបស់ណាតូដែរ ហើយបានព្យយាមជួបចរចាបន្ធូរបន្ថយស្ថានការណ៍ដែលកំពុងបន្តតានតឹង។
បន្ថែមពីលើនេះ លោកពូទីនអះអាងថា អាចមានសេណារីយ៉ូដែលគេរៀបចំឡើងសម្រាប់ថ្ងៃអនាគត ដែលអ៊ុយក្រែនត្រូវបានគេអនុញ្ញាតឲ្យចូលជាសមាជិករបស់អង្គការណាតូ បន្ទាប់មកនឹងព្យាយាមដណ្តើមយកដែនដីគ្រីមាពីរុស្ស៊ីវិញ។ លោកពូបានចោទសួរថា បើការពិតបែបនេះមែន តើរុស្សីត្រូវធ្វើសង្គ្រាមជាមួយសមាជិកណាតូពិតមែនទេ? នេះហើយជាអ្វីដែលគេព្យាយាមធ្វើឲ្យរុស្សីធ្លាក់ចូលក្នុងសង្គ្រាម។
អត្ថបទគួរអាន
គួរកត់សម្គាល់ថា អស់ពេលរាប់ខែមកហើយ ដែលប្រទេសរុស្សីបានប្រមូលផ្តុំកងទ័ព ដល់រាប់ម៉ឺននាក់ មកកៀកនឹងព្រំដែនអ៊ុយក្រែន ជាសកម្មភាពដែលលោកខាងលិចហៅថា ជាការប៉ុនប៉ងឈ្លានពានមកលើប្រទេសអ៊ុយក្រែន។ ប៉ុន្តែក្រុងម៉ូស្កូបានបដិសេធការចោទប្រកាន់នេះ ខណៈវិមានក្រឹមឡាំងក៏មិនបានបន្ទន់ឥរិយារបស់ខ្លួនចំពោះការទាមទារដើម្បីសន្តិសុខជាតិផងដែរ។ វិមានក្រឹមឡាំ ព្រមានថា សកម្មភាពយោធាដែលមិនព្រៀងទុកនឹងអាចកើតមានប្រសិនបើសំណើរបស់ពួកគេនៅតែត្រូវបានគេមិនអើពើ ខណៈខ្លួនអះអាងថា សន្តិសុខជាតិរបស់រុស្សីកំពុងត្រូវបានគំរាមកំហែង។
ដោយឡែក នៅក្នុងកិច្ចសន្ទនាតាមទូរសព្ទអស់ពេលជិតកន្លះម៉ោង រវាងប្រមុខការទូតរុស្សី លោក Sergei Lavrov និងភាគីអាមេរិកលោក Antoni Bliken កាលពីថ្ងៃអង្គារ ភាគីទាំងពីរពុំបានឈានដល់កិច្ចព្រមព្រៀង ឬស្វែងរកច្រកចេញបានសម្រាប់ភាពតានតឹងនៅអ៊ុយក្រែនដដែល។
លោក Blinken បានប្រាប់ទៅថ្នាក់ដឹកនាំរុស្សីថា ប្រសិនបើរុស្សីមិនមានបំណងឈ្លានពានអ៊ុយក្រែនដូចអ្វីដែលខ្លួននិយាយមែននោះ គួរដល់ពេលត្រូវដកទ័ពទៅវិញហើយ។ លោក Blinken បន្ថែមថា រុស្សីនិយាយដដែលជាដដែលថា ខ្លួនគ្មានបំណងឈ្លានពានអ៊ុយក្រែន តែធាតុពិតជាក់ស្តែង សកម្មភាពរបស់យោធារុស្សីមិនបានបង្ហាញដូច្នេះឡើយ ជាមួយនឹងការចល័តកងទ័ពសន្ធឹកសន្ធាប់ ការធ្វើសមយុទ្ធ និងសព្វាវុធធន់ធ្ងន់គ្រប់ប្រភេទមកក្បែរតំបន់ព្រំដែន។
ទោះបីជាជំនួបតាមទូរសព្ទ័លើកនេះ មិនមានផ្លៃផ្កាក្តីប៉ុន្តែទីក្រុងម៉ូស្កូ នៅបន្តចិញ្ចឹមចិត្ត និងក្តីសង្ឃឹមថា ការសន្ទនាលើបញ្ហាអ៊ុយក្រែននឹងនៅតែបន្តមាន ដើម្បីជៀសវាងសេណារីយ៉ូអវិជ្ជមានណាមួយ រួមទាំងការផ្ទុះសង្គ្រាមផងដែរ។ នេះបើជាការអះអាងពីថ្នាក់ដឹកនាំក្រុងម៉ូស្កូ៕
None
