អាម៉េរិក បើកការវាយប្រហារយោធាទ្រង់ទ្រាយធំបំផុតមិនធ្លាប់មាននៅតំបន់មជ្ឈិមបូព៌ា ផ្ដាច់ជីវិតមនុស្ស និងរបួសរាប់រយនាក់
ប្រធានាធិបតីអាម៉េរិក លោក ដូណាល់ ត្រាំ កាលពីថ្ងៃទី១៥ ខែមីនា បានបញ្ជាឱ្យកងកម្លាំងបើកការវាយប្រហារយោធាទ្រង់ទ្រាយធំប្រឆាំងនឹងក្រុមឧទ្ទាមហ៊ូធី…
ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃព្រហស្បតិ៍ សប្តាហ៍មុនបានគាំទ្រជាគោលការណ៍ចំពោះសំណើរបស់ក្រុងវ៉ាស៊ីនតោន សម្រាប់បទឈប់បាញ់រយៈពេល៣០ថ្ងៃជាមួយអ៊ុយក្រែន ប៉ុន្តែលោកបានអះអាងថា កងកម្លាំងរបស់លោកនឹងប្រយុទ្ធរហូតដល់លក្ខខណ្ឌសំខាន់ៗជាច្រើនត្រូវបានដោះស្រាយ។
តាំងពីពេលនោះមក ភាគីរុស្ស៊ី និងអ៊ុយក្រែន បានវាយប្រហារគ្នាតាមអាកាសយ៉ាងខ្លាំង ហើយកងទ័ពរុស្ស៊ី បានវាយសម្រុកកាន់តែខ្លាំងលើសមរភូមិ ដើម្បីបណ្តេញកងទ័ពអ៊ុយក្រែន ចេញពីទីតាំងឈរជើងជាច្រើនខែរបស់ពួកគេ នៅក្នុងតំបន់ឃើស ភាគខាងលិចនៃប្រទេសរុស្ស៊ី។
ជាក់ស្ដែងកាលពីថ្ងៃអាទិត្យ មន្ត្រីរុស្ស៊ីបាននិយាយថា មនុស្ស៣នាក់បានរងរបួសរួមទាំងក្មេងអាយុ៧ឆ្នាំម្នាក់នៅក្នុងការវាយប្រហារដោយយន្តហោះដ្រូនរបស់អ៊ុយក្រែន ទៅលើតំបន់ព្រំដែនរុស្ស៊ីបែលហ្គូរ៉ូដ (Belgorod) ខណៈកងទ័ពរុស្ស៊ី បានបំផ្លាញយន្តហោះដ្រូនរបស់អ៊ុយក្រែនប្រមាណ១៥គ្រឿងជុំវិញតំបន់វ៉ូរ៉ូណេស នៅភាគនិរតីនៃប្រទេសរុស្ស៊ី។
នៅប្រទេសអ៊ុយក្រែន ឯណោះវិញ អាជ្ញាធរមូលដ្ឋានបានរាយការណ៍អំពីការវាយប្រហារដោយយន្តហោះដ្រូនរបស់រុស្ស៊ី ទៅលើតំបន់មួយចំនួនរួមទាំងតំបន់ភាគខាងជើងនៃទីក្រុងឈើនីហ៊ីវ (Chernihiv) ជាទីដែលក្រុមអ្នកពន្លត់អគ្គិភ័យកំពុងព្យាយាមពន្លត់ភ្លើងឆេះអគារខ្ពស់មួយដែលបង្កឡើងដោយការវាយប្រហារដោយយន្តហោះដ្រូនរបស់រុស្ស៊ី។
ប្រព័ន្ធផ្សព្វផ្សាយអ៊ុយក្រែន បានរាយការណ៍អំពីការផ្ទុះជាបន្តបន្ទាប់នៅក្នុងតំបន់ជុំវិញរដ្ឋធានីកៀវរបស់អ៊ុយក្រែន បន្ទាប់ពីកងកម្លាំងអាកាសរបស់អ៊ុយក្រែន បានចេញការព្រមានអំពីការគំរាមកំហែងនៃការវាយប្រហារដោយយន្តហោះដ្រូនលើទីក្រុងកៀវ និងតំបន់នៅភាគកណ្តាលនៃប្រទេសអ៊ុយក្រែនមួយចំនួនទៀត។ ប៉ុន្តែគិតត្រឹមព្រឹកថ្ងៃអាទិត្យ មិនមានព័ត៌មានផ្លូវការណាមួយបញ្ជាក់ពីការខូចខាតនៅក្នុងតំបន់រដ្ឋធានីកៀវនោះទេ៕
អត្ថបទ៖ សុខ មង្គល
