តាមពិតទៅប្រទេសរុស្ស៊ីត្រូវធ្វើការទូទាត់ការប្រាក់ចំនួន ១០០ លានដុល្លារតាំងពីថ្ងៃទី២៧ ខែឧសភាមកម្ល៉េះ ហើយប្រទេសរុស្ស៊ីក៏បានផ្ញើប្រាក់គ្រប់ចំនួនទៅឱ្យធនាគារ Euroclear ដែលជាភ្នាក់ងារមួយក្នុងការទូទាត់ប្រាក់ទាំងនេះទៅឱ្យក្រុមវិនិយោគិនបរទេសហើយដែរ។ ប៉ុន្ដែ បើតាមទីភ្នាក់ងារព័ត៌មាន Bloomberg បានរាយការណ៍ថា ចំនួនទឹកប្រាក់នេះ ត្រូវបានជាប់គាំងនៅត្រឹមធនាគារនោះតែម្ដង ហើយក្រុមម្ចាស់បំណុលក៏មិនទាន់ទទួលបានវានៅឡើយដែរ។
ទន្ទឹមនេះ វិនិយោគិនតៃវ៉ាន់ដែលជាអ្នកទិញមូលបត្របំណុលរបស់រុស្ស៊ី ដែលបង្កើតជាប្រាក់អឺរ៉ូនោះ ក៏មិនទាន់ទទួលបានការប្រាក់របស់ពួកគេនៅឡើយដែរ។ នេះបើតាម ទីភ្នាក់ងាររ៉យទ័រ។ ចំនួនការប្រាក់នេះមិនទាន់ធ្លាក់ដល់ដៃក្រុមវិនិយោគិនក្នុងអំឡុងពេល ៣០ ថ្ងៃមកហើយ គិតត្រឹមថ្ងៃទី២៦មិថុនា ដូច្នេះហើយគេអាចចាត់ទុកថា វាជាការខកខានសងបំណុល របស់រដ្ឋាភិបាលរុស្ស៊ីទៅកាន់ម្ចាស់បំណុលបរទេស។
ធនាគារ Euroclear មិនបាននិយាយថា តើចំនួនប្រាក់ទាំងនេះពិតជាបានជាប់គាំងនៅក្នុងធនាគារនេះមែន ឬយ៉ាងណានោះទេ ដោយគ្រាន់តែបញ្ជាក់ថា ធនាគារនេះបានគោរពតាមទណ្ឌកម្មទាំងអស់។
កាលពីគ្រាមុនរុស្ស៊ីធ្លាប់បានខកខានសងបំណុលបរទេសរបស់ខ្លួនម្ដងដែរ គឺនៅឆ្នាំ១៩១៨ក្នុងអំឡុងពេលបដិវត្ត Bolshevik ជាពេលដែលមេដឹកនាំកុម្មុយនិស្តថ្មីលោក វ្ល៉ាឌីមៀ លេនីន មិនព្រមសងបំណុលរបស់ចក្រភពរុស្ស៊ី។
ការមិនបានសងបំណុលចុងក្រោយរបស់រុស្ស៊ីគ្រប់ប្រភេទគឺនៅក្នុងឆ្នាំ១៩៩៨ ខណៈដែលរុស្ស៊ីបានរងការរង្គោះរង្គើដោយវិបត្តិប្រាក់រូប្លក្នុងអំឡុងពេលបញ្ចប់របបដ៏វឹកវររបស់លោក Boris Yeltsin ។ នៅពេលនោះ ទីក្រុងមូស្គូបានបរាជ័យក្នុងការបន្តការទូទាត់លើមូលបត្របំណុលក្នុងស្រុករបស់ខ្លួន ប៉ុន្តែមិនបានខកខានសងបំណុលបរទេសរបស់ខ្លួននោះទេ។
នៅពេលនេះរុស្ស៊ីហាក់ដូចជាស្ថិតនៅលើផ្លូវដែលមិនអាចគេចបានពីការខកខានសងបំណុលនោះឡើយចាប់តាំងពីការដាក់ទណ្ឌកម្មត្រូវបានដាក់លើកដំបូងដោយសហរដ្ឋអាមេរិក និងសហភាពអឺរ៉ុប បន្ទាប់ពីរុស្ស៊ីបើកការលុកលុយទៅលើអ៊ុយក្រែន ហើយទណ្ឌកម្មទាំងនេះបានរឹតបន្តឹងមិនឱ្យរុស្ស៊ីអាចប្រើបណ្តាញធនាគារអន្តរជាតិបានឡើយនៅក្នុងការទូទាត់បំណុលរបស់រុស្ស៊ីទៅឱ្យវិនិយោគិននៅជុំវិញពិភពលោក។
អត្ថបទគួរអាន
រដ្ឋាភិបាលរុស្ស៊ីបាននិយាយថា ខ្លួនចង់ទូទាត់បំណុលទាំងអស់ឱ្យបានទាន់ពេលវេលា ហើយមកដល់ពេលនេះ វាគួរតែត្រូវបានធ្វើឡើងដោយជោគជ័យហើយ។ បំណុលរបស់រុស្ស៊ីប្រហែល ៤០ ពាន់លានដុល្លារ គឺជាប្រាក់ដុល្លារ ហើយក្នុងនោះប្រហែលពាក់កណ្តាលគឺជាបំណុលបរទេស។
រុស្ស៊ីទំនងជាមិនអាចគេចផុតពីការបរាជ័យក្នុងការសងបំណុលនោះឡើយ នៅពេលក្រសួងហិរញ្ញវត្ថុអាមេរិកបានសម្រេចចិត្តមិនបន្តការលើកលែងពិសេសនៅក្នុងច្បាប់ទណ្ឌកម្មដែលអនុញ្ញាតឱ្យវិនិយោគិនទទួលបានការទូទាត់ការប្រាក់ពីប្រទេសរុស្ស៊ី ដែលផុតកំណត់នៅថ្ងៃទី២៥ ខែឧសភា។
ក្រឹត្យដែលបានចុះនៅថ្ងៃទី២៣ ខែមិថុនាបានចែងដោយរដ្ឋាភិបារុស្ស៊ីបានបញ្ជាក់ថា ការសងបំណុលនាពេលអនាគតទាំងអស់នឹងត្រូវធ្វើឡើងជាប្រាក់រូប្ល តាមរយៈធនាគាររុស្ស៊ីដែលជាកន្លែងដាក់ប្រាក់ទូទាត់ជាតិទោះបីជាកិច្ចសន្យាមួយចំនួនចែងថា បំណុលទាំងនេះគួរតែជាដុល្លារ ឬរូបិយបណ្ណអន្តរជាតិផ្សេងទៀតក៏ដោយ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
