ធនាគារអភិវឌ្ឍន៍អាស៊ីគ្រោងបញ្ចប់គម្រោងផ្ដល់ប្រាក់កម្ចីថ្មីៗដល់ប្រទេសចិន
នៅក្នុងកិច្ចសម្ភាសន៍ផ្ទាល់ជាមួយនឹងសារព័ត៌មានជប៉ុន Nikkei ប្រធានធនាគារអភិវឌ្ឍអាស៊ី ADB បាននិយាយថា ថ្នាក់ដឹកនាំនៃធនាគារអភិវឌ្ឍន៍អាស៊ីន…
មែនទែនទៅ នៅមុនពេលរុស្ស៊ី ធ្វើការលុកលុយលើអ៊ុយក្រែនក្នុងខែកុម្ភៈ ទីក្រុងម៉ូស្គូមិនធ្លាប់មានទិន្នន័យទូទាត់ប្រាក់យន់នៅក្នុងបញ្ជីប្រចាំខែ ដែលត្រូវបានចេញផ្សាយដោយប្រព័ន្ធទូទាត់ហិរញ្ញវត្ថុអន្តជាតិ SWIFT នោះទេ ប៉ុន្តែតួលេខចុងក្រោយដែលបានចេញផ្សាយកាលពីថ្ងៃទី ១៨សីហាបានបង្ហាញថា ទីក្រុងម៉ូស្គូ បានឈរលេខរៀងទី៣ នៅពីក្រោយទីក្រុងហុងកុង និង មហាអំណាចហិរញ្ញវត្ថុរបស់ចក្រភពអង់គ្លេស ក្នុងការទូទាត់ជាប្រាក់យន់។
បើយោងតាមប្រព័ន្ធទូទាត់ហិរញ្ញវត្ថុអន្តជាតិ SWIFT បានបង្ហាញថា ក្រុមហ៊ុន និង ធនាគាររបស់រុស្ស៊ីបានប្រើប្រាស់ស្ទើរតែ ៤% នៃការទូទាត់ប្រាក់យន់អន្តរជាតិគិតត្រឹមខែកក្កដា ខណៈការទូទាត់ប្រាក់យន់បានកើនឡើងនៅពេលដែលវិមានក្រឹមឡាំងបានចូលឈ្លានពាននៅអ៊ុយក្រែន ហើយបានបង្កឱ្យមានការដាក់ទណ្ឌកម្មពីបណ្តាប្រទេសលោកខាងលិចយ៉ាងចាស់ដៃ។
គួរកត់សម្គាល់ថា ហុងកុងនៅតែជាប្រភពកំពូលនៃប្រតិបត្តិការប្រាក់យន់នៅខាងក្រៅចិនដីគោក ជាមួយចំណែកទូទូទាត់ ៧៤% នៃចំនួនទូទាត់ប្រាក់យន់សរុប បន្ទាប់មកគឺចក្រភពអង់គ្លេសដែលមានចំនួន ៦,៤% ។
ក្នុងនោះ ការលោតឡើងភ្លាមៗរបស់រុស្ស៊ីក្នុងបញ្ជីរបស់ប្រព័ន្ធទូទាត់ហិរញ្ញវត្ថុអន្តជាតិ SWIFT ចំពោះកំណើនទូទាត់ជាប្រាក់យន់ចិននេះ ក៏ដោយសារតែ ទណ្ឌកម្មពីសំណាក់ប្រទេសលោកខាងលិច បានរាំងខ្ទប់រុស្ស៊ីពីការទូទាត់តាមប្រព័ន្ធធនាគារពិភពលោកដោយប្រើប្រាស់ប្រាក់ដុល្លារអាមេរិក និង កត្តាមួយផ្សេងទៀត គឺ ទីក្រុងមូស្គូកាន់តែជិតស្និទ្ធក្នុងទំនាក់ទំនងសេដ្ឋកិច្ចជាមួយប៉េកាំង។
បន្ថែមពីនេះ ផលប៉ះពាល់លើវិស័យហិរញ្ញវត្ថុរុស្ស៊ី, ក្រុមហ៊ុនលោកខាងលិចធំៗរាប់រយបានដកខ្លួន និង កាត់បន្ថយប្រតិបត្តិការរបស់ខ្លួនចេញពីរុស្ស៊ី ដើម្បីដាក់ទណ្ឌកម្មលើទីក្រុងម៉ូស្គូដែលបានឈ្លានពានអ៊ុយក្រែន ក៏ជាហេតុផលធ្វើឲ្យរុស្ស៊ីត្រូវប្រើប្រាស់ប្រាក់យន់របស់ចិនកាន់តែច្រើនផងដែរ។
គួរជម្រាបថា ប្រទេសរុស្ស៊ីបានបង្កើតប្រព័ន្ធទូទាត់ហិរញ្ញវត្ថុថ្មីរបស់ខ្លួន ដែលស្រដៀងគ្នានឹងប្រព័ន្ធ SWIFT ដោយបង្កើតគណនីពិសេសនៅធនាគារ និង បន្តធ្វើពាណិជ្ជកម្មការនាំចេញសំខាន់ៗដូចជាប្រេង និង ឧស្ម័ន ជាមួយបណ្តាប្រទេសពី ប្រទេសចិន និង ឥណ្ឌា ទៅកាន់ប្រទេសទួរគីជាដើម។
ទិន្នន័យពីប្រព័ន្ធទូទាត់ហិរញ្ញវត្ថុអន្តរជាតិ SWIFT បានបង្ហាញទៀតថា ប្រាក់រូប្លរបស់រុស្ស៊ីបច្ចុប្បន្ន ក៏លែងស្ថិតនៅក្នុងតារាងកំពូលរូបិយវត្ថុសកលទាំង២០ ក្នុងការប្រើប្រាស់សម្រាប់ទីផ្សារទូទាត់អន្តរជាតិផងដែរ ខណៈដែលកាលពីខែធ្នូឆ្នាំមុននេះ ប្រាក់រូប្លរុស្ស៊ី ធ្លាប់ឈរនៅលំដាប់ទី១៦ នៃតារាងរូបិយវត្ថុសកលនេះ ដោយមានចំណែកទីផ្សារប្រតិបត្តិការប្រហែល០,៣%។
សូមបញ្ជាក់ថា រូបិយបណ្ណអន្តរជាតិកំពូលទាំង៥ ដែលមានការប្រើប្រាស់សម្រាប់ទីផ្សារទូទាត់អន្តរជាតិរួមមានប្រាក់ដុល្លារអាមេរិក ប្រាក់អឺរ៉ូ ប្រាក់ផោនរបស់អង់គ្លេស ប្រាក់យេនរបស់ជប៉ុន និងប្រាក់យន់របស់ចិន៕
