បើទោះបីជា នៅលើផ្ទៃសង្គ្រាមគេសង្កេតមិនឃើញមានប្រែប្រួលជាដុំកំភួន ហើយទាំងយោធារុស្ស៊ី និ ងអ៊ុយក្រែនអះអាងពីជោគជ័យរៀងៗខ្លួនយ៉ាងណាក្ដី ប៉ុន្ដែសារដែលចេញពីមាត់របស់មនុស្សជំនិតលោកពូទីនរូបនេះត្រូវបានគេមើលឃើញថា គឺអាចជាការគំរាមផ្នែកវោហាសាស្ត្រទុកជាមុន។
ទន្ទឹមនឹងការទប់ទល់ជាមួយនឹងការវាយបករបស់អ៊ុយក្រែន លោកពូទីនបាននិយាយ ទៅកាន់មេដឹកនាំអាហ្រិកកាលពីចុងសប្ដាហ៍មុននេះថា «លោកបើកផ្លូវជានិច្ចសម្រាប់ការចរចាជាមួយអ៊ុយក្រែន»។ លោកថា គំនិតផ្តួចផ្តើមសន្តិភាព ដែលស្នើឡើងដោយប្រទេសអាហ្វ្រិកអាចជាមូលដ្ឋានគ្រឹះសម្រាប់សន្តិភាព ប៉ុន្តែការបន្តវាយប្រហារពីសំណាក់អ៊ុយក្រែន ពិតជាធ្វើឱ្យមានការពិបាកណាស់ក្នុងការអនុវត្តកិច្ចចរចានោះ។
យោងតាមការចុះផ្សាយដោយសារព័ត៌មានរ៉យទ័រ លោកមេវេដេវ បច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ី ហើយជាមនុស្សដែលស្និទ្ធជាមួយលោក ពូទីន ដែរនោះ បាននិយាយនៅលើបណ្ដាញសង្គមផ្លូវរបស់លោកថា «រុស្ស៊ីអាចនឹងត្រូវបង្ខំចិត្តងាកទៅរគោលលទ្ធិនុយក្លេអ៊ែររបស់ខ្លួនវិញ បើសិនជាសេណារីយ៉ូនោះកើតឡើងមែននោះ។ លោកថា «សាកស្រមៃមើលថា បើសិនជាការវាយបក ដែលមានណាតូនៅពីក្រោយទទួលបានជោគជ័យ និងពុះជ្រៀកទឹកដីរបស់យើងជាចំណែកៗនោះ យើងនឹងបង្ខំចិត្តប្រើប្រាស់អាវុធនុយក្លេអ៊ែរមួយ ឱ្យស្របទៅតាមក្រិត ដែលចេញដោយប្រធានាធិបតីនៃសហព័ន្ធរុស្ស៊ី។
អត្ថបទគួរអាន
លោកបានសង្កត់ធ្ងន់ថា «វាគ្មានជម្រើសអ្វីក្រៅពីនេះទេ។ សត្រូវនឹងដឹងអំពីជោគជ័យរបស់យើង ហើយគេកំពុងធ្វើឱ្យភ្លើងនុយក្លេអ៊ែរឆាបឆេះឡើងយ៉ាងប្រាកដ»។
ទោះជាយ៉ាងណា នេះមិនមែនជាសារព្រមានដោយវោហាសាស្ត្រនុយក្លេអ៊ែរលើកទីមួយទេ ដែលថ្លែងចេញមាត់ពីមនុស្សជំនិតនឹងប្រធានាធិបតីរុស្ស៊ី។
ស្របពេលជាមួយគ្នា លោកពូទីនបានថ្លែងប្រាប់សន្និសីទកាសែតមួយនៅទីក្រុង St Petersburg បន្ទាប់ពីជំនួបជាមួយមេដឹកនាំប្រទេសអាហ្វ្រិកាកាលពីសប្ដាហ៍មុន ដោយសំដៅទៅផែនការសន្តិភាពដែលស្នើឡើងដោយអាហ្វ្រិកថា «មានចំណុចខ្លះនៅក្នុងគំនិតផ្គួចផ្តើមនេះកំពុងត្រូវបានអនុវត្ត ប៉ុន្តែលោកថា ជារឿងមួយដ៏ពិបាកក្នុងការអនុវត្តវាទាំងស្រុង»។ ចំណុចមួយក្នុងនោះ គឺការឈប់បាញ់បោះ។ លោកពូទីនគូសបញ្ជាក់ថា ចំណុចនេះហើយដែលមិនអាចអនុវត្តបាន ព្រោះកងកម្លាំងអ៊ុយក្រែន កំពុងវាយបកក្នុងទ្រង់ទ្រាយយុទ្ធសាស្ត្រមួយដ៏ធំ។»
លោកពូទីនបន្ថែមថា រុស្ស៊ី មិនអនុវត្តបទឈប់បាញ់ ទាំងដែល ខ្លួនកំពុងស្ថិតក្រោមការវាយប្រហារនោះទេ។ ប៉ុន្តែលោកថា រុស្ស៊ីមិនបានច្រានចោលចំណុចនេះនោះទេ ប៉ុន្ដែត្រូវមានការយល់ព្រមទាំងសងខាង។ ដោយឡែក ប្រធានាធិបតីហ្សេលេនស្គី បានច្រានចោលបទឈប់បាញ់នេះ ដោយលោកលើកហេតុផលថា បើបញ្ឈប់នៅពេលនេះ រុស្ស៊ីនឹងកាន់កាប់ទឹកដីអ៊ុយក្រែន ដែលវាយបានជាងមួយភាគប្រាំ នៃដែនដីសរុបនៃប្រទេស ព្រមទាំងទុកពេលឱ្យកងទ័ពរុស្ស៊ីប្រមូលផ្តុំកម្លាំងឡើងវិញផងដែរ៕
