ចំនួនអ្នកស្លាប់ដោយសារការវាយប្រហារចុងក្រោយមួយ កាលពេលថ្មីៗនេះ ដោយមីស៊ីលរបស់រុស្ស៊ីបានប្រល័យជីវិតមនុស្សប្រហែល ៣០នាក់ក្នុងប្លុកមួយនៃទីក្រុងឌីនីប្រូ ភាគខាងជើងអ៊ុយក្រែន បើទោះបីទីក្រុងម៉ស្គូបានបដិសេធថា ខ្លួនបានវាយប្រហារត្រឹមគោលដៅហេដ្ឋារចនាសម្ព័ន្ធយោធាអ៊ុយក្រែនក៏ដោយ។
អគ្គលេខាធិការអង្គការណាតូ លោក ចេន ស្តូលថេនប័ក (Jens Stoltenberg) បាននិយាយថា អ៊ុយក្រែនអាចរំពឹងយ៉ាងមុតមាំដូចអ្វីដែលខ្លួនធ្លាប់បានទន្ទឹងរង់ចាំថា ណាតូនឹងផ្តល់ឱ្យទីក្រុងកៀវនូវ យានជំនិះយោធា កាំភ្លើងធំ និងមីស៊ីល ព្រមទាំងអាវុធធុនធ្ងន់ផ្សេងទៀតដើម្បីការពារខ្លួនប្រកបដោយប្រសិទ្ធិភាព។
លោក Stoltenberg បានបញ្ជាក់ប្រាប់កាសែតក្នុងស្រុករបស់អាល្លឺម៉ង់ថា ការសន្យានាពេលថ្មីៗសម្រាប់ឧបករណ៍សព្វាវុធធុនធ្ងន់គឺមានសារៈសំខាន់ណាស់ ហើយលោករំពឹងថា នឹងមានច្រើនទៀតនាពេលអនាគតដ៏ខ្លី ដែលជាការប្តេជ្ញាចិត្តជួយដល់អ៊ុយក្រែនមិនដកដៃឡើយ។
អត្ថបទគួរអាន
គួររំឭកថា កាលពីដើមខែនេះ ប្រទេសបារាំង អាល្លឺម៉ង់ និងសហរដ្ឋអាមេរិកបានសន្យារៀងៗខ្លួនថា នឹងផ្តល់រថក្រោះធន់ស្រាលឱ្យអ៊ុយក្រែនផងដែរ រួមមាន រថក្រោះប្រភេទ AMX-10 RC របស់ប្រទេសបារាំង រថពាសដែកថ្មើរជើង Marder របស់អាល្លឺម៉ង់ចំនួន ៤០ គ្រឿង និងរថយន្តប្រយុទ្ធ Bradley ចំនួន ៥០គ្រឿងទៅឱ្យរដ្ឋអំណាចកៀវ។ ទោះជាយ៉ាងណាក៏ដោយ សម្ពាធកំពុងកើនឡើងលើការសម្រេចចិត្តចុងក្រោយថា ពួកគេគួរផ្តល់ឱ្យឬមិនគួរតាមការសន្យានោះ ព្រោះវាច្បាស់ណាស់ថាសព្វាវុធទាំងអស់នេះនឹងបង្កវិនាសកម្មសង្គ្រាមកាន់តែធ្ងន់ធ្ងរ។ នាយករដ្ឋមន្ត្រីអង់គ្លេសលោក Rishi Sunak កាលពីថ្ងៃសៅរ៍សប្តាហ៍ក៏បានសន្យាដែរថា នឹងផ្តល់រថក្រោះធុនធ្ងន់ប្រភេទ Challenger 2 ចំនួន ១៤ គ្រឿងដល់អ៊ុយក្រែន។
ក្រសួងការពារជាតិរុស្ស៊ីបានប្រកាសនៅចុងសប្តាហ៍មុនថា ខ្លួនបានវាយដណ្តើមយកបានទីក្រុងសូឡេដា (Soledar) ក្នុងតំបន់បាត់មុត (Bakhmut) ពីដៃកងកម្លាំងអ៊ុយក្រែនវិញហើយ បន្តពីការវាយប្រយុទ្ធទៅមកអស់ពេលយ៉ាងយូរ។
ប្រធានាធិបតីរុស្ស៊ីលោក ពូទីន បាននិយាយក្នុងបទសម្ភាស៍មួយ ដែលបានចេញផ្សាយកាលពីថ្ងៃអាទិត្យ ទី១៥ មករាថា លោកពិតមានភាពសប្បាយរីករាយ និងមានភាពវិជ្ជមានយ៉ាងខ្លាំងស្របពេលដែលអ្វីៗបានដំណើរការទៅតាមផែនការ។
សូមជម្រាបថា សូឡេដា (Soledar) ដែលមានប្រជាជនជាង១ម៉ឺននាក់កំពុងរស់នៅ ជាទីក្រុងយុទ្ធសាស្ត្រជួរមុខមួយក្នុងស្រុក Bakhmut ត្រូវបានកងកម្លាំងរុស្ស៊ីវាយដណ្តើមបានមកវិញពីដៃកងទ័ពអ៊ុយក្រែន។ យ៉ាងណាមិញ អ៊ុយក្រែនបដិសេធជ័យជំនះរបស់ម៉ស្គូព្រោះថា ការប្រយុទ្ធគ្នានៅតែបន្តយ៉ាងស្រួចស្រាលនៅឡើយ។ វិទ្យាស្ថានសិក្សាពីសង្គ្រាមដែលមានមូលដ្ឋាននៅសហរដ្ឋអាមេរិកបានលើកឡើងថាកងកម្លាំងអ៊ុយក្រែនទំនងជាមិនអាចរក្សាការពារទីតាំងប្រយុទ្ធជាមួយរុស្ស៊ីនៅ Soledar បានយូរតទៅទៀតទេ គឺនឹងត្រូវដកថយសិន៕
