លោក ឡាវរ៉ូវ រដ្ឋមន្ត្រីការបរទេសរុស្ស៊ី បានដឹកនាំគណៈប្រតិភូរុស្ស៊ីទៅកាន់កិច្ចប្រជុំកំពូលជី២០ ដែលជាកិច្ចប្រជុំកំពូលលើកដំបូងចាប់តាំងពីទីក្រុងមូស្គូបានលុកលុយអ៊ុយក្រែននៅក្នុងខែកុម្ភៈបន្ទាប់ពីវិមានក្រឹមឡាំងបាននិយាយថា លោកប្រធានាធិបតីរុស្ស៊ី វ្ល៉ាឌីមៀ ពូទីន រវល់ពេកមិនអាចចូលរួមកិច្ចប្រជុំនេះបានទេ។
បញ្ហាអ៊ុយក្រែន ត្រូវបានគេរំពឹងថា នឹងត្រូវគ្រប់លើកិច្ចប្រជុំផ្សេងៗទៀតនៃរបៀបវារៈដែលបានរៀបចំឡើង ហើយមេដឹកនាំបស្ចិមលោក ដែលទំនងជាត្រូវប្រឈមមុខជាសាធារណៈ ជាមួយរុស្ស៊ីពាក់ព័ន្ធនឹងការជជែកគ្នាលើបញ្ហានៃការលុកលុយរបស់រុស្ស៊ីលើអ៊ុយក្រែន និងជំរុញឱ្យចិន និងឥណ្ឌា ដែលធ្លាប់បានសម្តែងការព្រួយបារម្ភចំពោះសង្គ្រាមនេះ ឱ្យធ្វើការរិះគន់សកម្មភាពរបស់ទីក្រុងម៉ូស្គូផងដែរ។
ថ្លែងក្នុងសន្និសីទសារព័ត៌មាននៅចុងបញ្ចប់នៃកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ានក្នុងរាជធានីភ្នំពេញកាលពីថ្ងៃទី ១៣ វិច្ឆិកា លោក ឡាវរ៉ូវ បានស្តីបន្ទោសសហរដ្ឋអាមេរិកចំៗ ចំពោះសកម្មភាពរបស់ខ្លួននៅក្នុងតំបន់នេះដែលរុស្ស៊ី និងប្រទេសបស្ចិមលោកបានចាត់ទុកថា ជាសមរភូមិភូមិសាស្ត្រនយោបាយជាយុទ្ធសាស្ត្រដ៏មានសក្តានុពលមួយនៅក្នុងប៉ុន្មានទសវត្សរ៍ខាងមុខនេះ។
លោក ឡាវរ៉ូវ បានប្រាប់អ្នកយកព័ត៌មានថា សហរដ្ឋអាមេរិក និងសម្ព័ន្ធមិត្តរបស់អង្គការណាតូកំពុងព្យាយាមធ្វើជាម្ចាស់នៃលំហនេះ ហើយលោកបានបន្ថែមថា យុទ្ធសាស្ត្រឥណ្ឌូប៉ាស៊ីហ្វិករបស់លោក ចូ បៃដិន គឺជាការប៉ុនប៉ងដើរលើផ្លូវវាង នៅក្នុង រចនាសម្ព័ន្ធដែលពោរពេញដោយបរិយាប័ន្ន សម្រាប់កិច្ចសហប្រតិបត្តិការក្នុងតំបន់ ហើយនឹងមានបំណង«ធ្វើយោធូបនីយកម្មនៃតំបន់នេះដោយផ្តោតជាក់ស្តែងលើការទប់ទល់នឹងប្រទេសចិន និងការខ្ទប់ផលប្រយោជន៍របស់រុស្ស៊ីនៅក្នុងតំបន់អាស៊ីប៉ាស៊ីហ្វិក»។
អត្ថបទគួរអាន
ទោះយ៉ាងណាថ្លៃនៅក្នុងកិច្ចប្រជុំកំពូលអាស៊ាន-អាមេរិកលើកទី១០ ដែលរៀបចំឡើងនៅកម្ពុជា លោក បៃដិន បានប្រាប់មេដឹកនាំអាស៊ីអាគ្នេយ៍ថា ទីក្រុងវ៉ាស៊ីនតោនបានប្តេជ្ញាចិត្តក្នុងការកសាង«ឥណ្ឌូប៉ាស៊ីហ្វិកឱ្យមានលក្ខណៈសេរី បើកចំហ ស្ថិរភាព វិបុលភាព រឹងមាំ និងមានសុវត្ថិភាព»ខណៈដែលលោកបានគូសបញ្ជាក់អំពីភាពជាដៃគូយុទ្ធសាស្ត្រគ្រប់ជ្រុងជ្រោយ រវាងសហរដ្ឋអាមេរិក និងតំបន់នេះ។
សហរដ្ឋអាមេរិក និងរុស្ស៊ីមិនមែនជាសមាជិករបស់អាស៊ាន ដែលមានសមាជិក ១០ ប្រទេសនៅតំបន់អាស៊ីអាគ្នេយ៍នោះទេ ប៉ុន្តែមេដឹកនាំពិភពលោកមួយចំនួនបានចូលរួមកិច្ចពិភាក្សានេះមុនកិច្ចប្រជុំកំពូលជី២០នៅកោះបាលី ដែលនឹងចាប់ផ្ដើមធ្វើឡើងនៅថ្ងៃទី ១៥ ខែវិច្ឆិកា។
ប្រទេសរុស្ស៊ីបានព្យាយាមពង្រឹងទំនាក់ទំនងសេដ្ឋកិច្ច នយោបាយ និងសន្តិសុខកាន់តែជិតស្និទ្ធជាមួយអាស៊ីចាប់តាំងពីបស្ចិមលោកបានវាយប្រហារទីក្រុងមូស្គូជាមួយនឹងការទម្លាក់ទណ្ឌកម្មផ្ទួន ដែលមិនធ្លាប់មានពីមុនមក ដើម្បីជាការឆ្លើយតបទៅនឹងការឈ្លានពានរបស់ខ្លួនទៅលើប្រទេសអ៊ុយក្រែន៕
អត្ថបទ៖ សុខ ជា
