លោក ប៊ុន បារាំង សហប្រធានសហគមន៍អ្នកផលិតអំបិលខេត្តកំពត-កែបបានឲ្យដឹងថា ការនាំចូលអំបិលពីបរទេស ដើម្បីផ្គត់ផ្គង់ទីផ្សារក្នុងស្រុកនៅឆ្នាំនេះ ប្រហែលជាមិនកើតមានទៀតទេ ខណៈការប្រមូលផលអំបិលគិតមកដល់ចុងខែឧសភានេះ សម្រេចបានប្រមាណចន្លោះពី ៧ ទៅ ៨ម៉ឺនតោន បូកបន្ថែមនឹងអំបិលនាំចូលសល់ក្នុងស្តុក កាលពីឆ្នាំមុនប្រមាណជិត ៥ពាន់តោន។
លោក ប៊ុន បារាំង បញ្ជាក់ថា អំបិលដែលផលិតបានក្នុងឆ្នាំនេះនឹងអាចបំពេញបាននូវតម្រូវការក្នុងស្រុកគ្រប់ចំនួន ដោយនឹងមិនចាំបាច់ត្រូវការនាំចូលអំបិលពីក្រៅទៀតឡើយ ខណៈអាកាសធាតុនៅតំបន់ផលិតនៅតែបន្តមានភាពល្អប្រសើរ ដែលនឹងធ្វើឲ្យការផលិត និងប្រមូលផលមានរយៈពេលយូរថ្ងៃទៅមុខទៀតក្នុងឆ្នាំនេះ។
អត្ថបទទាក់ទង!
សូមជម្រាបថា កាលពីឆ្នាំ២០១៩ កន្លងទៅ បើទោះបីជាមានអាកាសធាតុក្តៅខ្លាំងក៏ដោយ ក៏ប៉ុន្តែការផលិតអំបិលនៅកម្ពុជាសម្រេចបានប្រមាណតែជាង ៣ម៉ឺនតោនប៉ុណ្ណោះ ខណៈតំបន់ផលិតអំបិលជួបបញ្ហាភ្លៀងច្រើនដែលជាហេតុធ្វើឲ្យការផលិតអំបិលថយចុះ។
លោក ប៊ុន បារាំងបានឲ្យដឹងទៀតថា ជាមធ្យមក្នុង ១ឆ្នាំកម្ពុជាត្រូវការអំបិលសម្រាប់បរិភោគចន្លោះពី ៨ ទៅ ១០ម៉ឺនតោន ដែលចំនួននេះ គឺស្មើនឹងចំនួនដែលកម្ពុជាផលិតបាន ដូច្នេះ នៅក្នុងឆ្នាំនេះ ពិតណាស់នឹងមានការខ្វះទៀតនោះឡើយ ហើយក៏មិនចាំបាច់នាំចូលអំបិលពីក្រៅប្រទេសទៀតដែរ។
បច្ចុប្បន្នផ្ទៃដីផលិតអំបិលខេត្តកំពត កែប គ្របដណ្តប់លើផ្ទៃដីប្រមាណជាង ៤.៥០០ហិកតា ដែលមានក្រុមអ្នកផលិតរហូតជាង ២០០ក្រុម ដែលក្នុងនោះ ១ក្រុមមានរហូត២ ទៅ៣គ្រួសារ ហើយប្រសិនបើអាកាសធាតុអំណោយផល ក្នុង១ហិកតា គេអាចផលិតអំបិលបានប្រហែល ២០តោនសម្រាប់រយៈពេល ១ឆ្នាំ ដោយគិតចាប់ពីខែមករា ដល់ខែឧសភា។
លោកប៊ុន បារំាង បានឲ្យដឹងទៀតថា អំបិលក្នុងឆ្នាំនេះមានតម្លៃប្រហាក់ប្រហែលនឹងឆ្នាំមុន ដោយអំបិលស្អាតលេខ១ មានតម្លៃប្រមាណ ១៥.០០០ រៀលក្នុង១បាវ ទម្ងន់ ៥០គីឡូក្រាម និងអំបិលលេខ២ អាចមានតម្លៃ ១២.០០០ រៀល៕
None
