សម្តេច ហ៊ុន សែន ថ្លែងយ៉ាងដូច្នេះ នៅក្នុងពិធីប្រកាសជាផ្លូវការនូវកម្មវិធីឧបត្ថម្ភសាច់ប្រាក់ ជូនប្រជាពលរដ្ឋមានជីវភាពក្រីក្រ ជិត៦០ម៉ឺនគ្រួសារ នៅក្នុងអំឡុងពេលកូវីដ-១៩ នៅព្រឹកថ្ងៃទី ២៤ ខែមិថុនាឆ្នាំ២០២០។
សម្តេច ហ៊ុន សែន មានប្រសាសន៍ថា « អ្នកដែលបំផុស ឲ្យមនុស្សមកដកលុយពីធនាគារ ចាំតែដកតើ ឥឡូវធនាគារខ្លះ សល់លុយមិនដំណើរការ អញ្ចឹងទេ អ្នកដែលចង់ឲ្យធនាគារនៅស្រុកខ្មែរដួលរលំតាមរយៈកុំសងធនគារ និងដកលុយពីធនាគារប្រហែលជាខកចិត្តមិនតិចទេ ហើយខ្ញុំសូមបញ្ជាក់ ខ្ញុំលើកទឹកចិត្តឲ្យធ្វើការរឹបអូស ប្រសិនបើអ្នកឯងជឿ ទៅអ្នកដែលឃោសនា ឲ្យមានចលនាកុំឲ្យសងលុយធនាគារ»។
សម្តេចនាយករដ្ឋមន្ត្រីបានបន្ថែមទៀតថា «ខ្ញុំគ្រាន់តែអំពាវនាវ សុំឲ្យធនាគារធ្វើការយោគយល់ នៅក្នុងដំណាក់កាលនៃការលំបាក ប៉ុន្តែការសងនៅតែសងហ្នឹង ប៉ុន្តែមានអ្នកចលនា ទីមួយ ឲ្យមនុស្ស កុំសងលុយធនាគារ ខ្ញុំនឹងគាំទ្រឲ្យធនាគារប្តឹងនៅតុលាការដើម្បីរឹបអូស បើសិនជាជននោះ គាំទ្រនូវនយោបាយរបស់អ្នកអំពាវនាវនេះ ព្រោះអ្នកឯងរកស៊ីខូចយ៉ាងម៉េច មិនទាន់ស្អីផង ចាប់ផ្តើមដំណើរការរឿងនេះហើយ នៅលើពិភលោក នរណាគេធ្វើអញ្ចឹង ចឹងសាកមើល គ្រួសារណាដែលញុះញង់ធ្វើឲ្យអាហ្នឹង ហើយជំពាក់ធនាគារ យើងគាំទ្រឲ្យមានការរឹបអូសតែម្តង»។
អត្ថបទទាក់ទង
ប្រមុខរាជរដ្ឋាភិបាល បានបញ្ជាក់បន្ថែមថា ការផ្តល់ប្រាក់ឧបត្ថម្ភដល់ប្រជាពលរដ្ឋក្រីក្រនាពេលនេះ មិនមែនជាការធ្វើអចិន្ត្រៃយ៍នោះទេ ដោយកម្មវិធីផ្តល់ប្រាក់ឧបត្ថម្ភនេះ នឹងត្រូវបញ្ឈប់នៅពេលដែលស្ថានភាពជំងឺកូវីដនៅកម្ពុជា ក៏ដូចជាសកលលោកបានធូរស្រាល។
បើតាមប្រមុខរាជរដ្ឋាភិបាលកម្ពុជាបានបញ្ជាក់ថា ក្រសួងសេដ្ឋកិច្ច បានបញ្ចេញសាច់ប្រាក់ ១២៥លានដុល្លាររួចទៅហើយ សម្រាប់ឧបត្ថម្ភដល់ប្រជាពលរដ្ឋក្រីក្រកម្រិត១ និងកម្រិត២ ដែលរងគ្រោះដោយសារតែការផ្ទុះឡើងដោយសារជំងឺកូវី-១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
