លោក នាយករដ្ឋមន្ត្រីកូរ៉េខាងត្បូង លោក ហាន ដាក់ស៊ូ (Han Duck-soo) នៅថ្ងៃទី១៤មិថុនាបានអំពាវនាវឲ្យអ្នកបើកបរឡានដឹកទំនិញបញ្ចប់ការធ្វើកូដកម្មរបស់ពួកគេ ដែលកំពុងបង្ករបញ្ហារំខានជាច្រើនដល់ប្រព័ន្ធដឹកជញ្ជូន និងឡូជីស្ទិករបស់ប្រទេសកូរ៉េខាងត្បូង ហើយលោក ហាន ដាក់ស៊ូ បាននិយាយទៀតថា សកម្មភាពតវ៉ារបស់ក្រុមអ្នកតវ៉ាទាំងនេះ គឺខុសច្បាប់ ហើយមិនអាចមានការគាំទ្រពីប្រជាជននោះឡើយ។ នេះបើតាមការរាយការណ៍ដោយសារព័ត៌មាន The Korea Herald។
កូដកម្មរយៈពេលជាង១សប្តាហ៍មកនេះកំពុងតែប៉ះពាល់ការផលិតបន្ទះឈីបរបស់កូរ៉េខាងត្បូង និងធ្វើឱ្យវិស័យឧស្សាហកម្មរបស់កូរ៉េខាងត្បូងបានខាតបង់ជាង ១ពាន់២រយលានដុល្លាររួចទៅហើយ ដោយសារតែមានការកកស្ទះមិនអាចដឹកជញ្ជូនផលិតផលចេញទៅបានទៅកាន់ទីផ្សារ និងបង្ខំឲ្យក្រុមហ៊ុនធំៗជាច្រើនកាត់បន្ថយការផលិតរបស់ពួកគេផងដែរ។
សមាគមពាណិជ្ជកម្មអន្តរជាតិកូរ៉េ (KITA) បាននិយាយថា ក្រុមហ៊ុនកូរ៉េមួយដែលផលិតទឹកសម្អាតបន្ទះឈីបហៅថាទឹកសម្អាត IPA នោះ កំពុងប្រឈមនឹងភាពស្មុគស្មាញក្នុងការដឹកជញ្ជូនទំនិញទៅឱ្យក្រុមហ៊ុនចិនមួយ ដែលបានផ្គត់ផ្គង់ទឹកសម្អាតនេះដល់រោងចក្រ Samsung Electronics នៅក្នុងប្រទេសចិន។
អត្ថបទទាក់ទង
សូមបញ្ជាក់ថា ក្រុមហ៊ុន Samsung Electronics នេះគឺជាក្រុមហ៊ុនផលិតបន្ទះឈីបអង្គចងចាំ NAND ដែលប្រើសម្រាប់ផ្ទុកទិន្នន័យនៅក្នុងមជ្ឈមណ្ឌលទិន្នន័យ ទូរស័ព្ទស្មាតហ្វូន និងឧបករណ៍បច្ចេកវិទ្យាផ្សេងទៀតនៅក្នុងរោងចក្ររបស់ខ្លួននៅទីក្រុង ស៊ី អាន (Xian) នៅប្រទេសចិន។
សហជីពអ្នករថយន្តដឹកទំនិញបាននិយាយក្នុងសេចក្តីថ្លែងការណ៍មួយនៅថ្ងៃអង្គារនេះថា ពួកគេនឹងបន្តធ្វើកូដកម្មទូទៅរបស់ខ្លួន និងថ្កោលទោសក្រសួងដឹកជញ្ជូនថា "មិនមានឆន្ទៈក្នុងការនិយាយ ឬមិនអាចដោះស្រាយស្ថានភាពបច្ចុប្បន្ន"។
សហជីពកំពុងតវ៉ាប្រឆាំងនឹងការឡើងថ្លៃប្រេងឥន្ធនៈ និងទាមទារការធានាប្រាក់ខែអប្បបរមារបស់ពួកគេ ហើយការចរចាចំនួន ៤ លើកជាមួយរដ្ឋាភិបាលបានបរាជ័យទាំងស្រុងក្នុងការស្វែងរកការសម្រុះសម្រួលគ្នា។
នៅថ្ងៃអង្គារនេះដែរ គេបានឃើញមានការប៉ះទង្គិចគ្នារវាងក្រុមអ្នកបើករថយន្តធំ និងប៉ូលិសនៅក្នុងទីក្រុងមួយចំនួនក្នុងអំឡុងពេលកូដកម្មនេះ ដោយមានការចូលរួមពីក្រុមអ្នកបើករថយន្តធំរាប់ពាន់នាក់ ដែលរំខានដល់សកម្មភាពជាច្រើននៅតាមមជ្ឈមណ្ឌលឧស្សាហកម្ម និងកំពង់ផែសំខាន់ៗមួយចំនួន ហើយក៏កំពុងបង្កក្តីបារម្ភថា កូដកម្មនេះអាចជះឥទ្ធិពលជាសកល បង្កហានិភ័យថ្មីដល់ខ្សែចង្វាក់ផ្គត់ផ្គង់សកល ដែលមានភាពតានតឹងរួចទៅហើយនោះផងដែរ។
រដ្ឋាភិបាលកូរ៉េខាងត្បូងបាននិយាយថា យោធាកូរ៉េខាងត្បូងបានដាក់ពង្រាយរថយន្តដឹកទំនិញប្រហែល ១០០ គ្រឿងនៅតាមកំពង់ផែសំខាន់ៗរួមទាំងទីក្រុងប៊ូសានផងដែរ ដើម្បីជួយក្រុមហ៊ុនមួយចំនួនក្នុងការដឹកជញ្ជូនទំនិញរបស់ពួកគេ ចំពេលកូដកម្មបានរាលដាលនៅទូទាំងប្រទេសនេះ។
រដ្ឋាភិបាលកូរ៉េខាងត្បូងបានជំរុញឱ្យអ្នកបើករថយន្តធំត្រឡប់ទៅធ្វើការវិញ ហើយបាននិយាយថា នឹងស្វែងរកដំណោះស្រាយ ឆ្លើយតបនឹងការទាមទាររបស់ក្រុមអ្នកតវ៉ា នៅស្របទៅតាមច្បាប់ និងបន្តព្យាយាមបញ្ចប់ជម្លោះនេះ តាមរយៈការសន្ទនាគ្នាជាបន្តទៀត៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
