រដ្ឋាភិបាលសិង្ហបុរីអះអាងថា ព្រលានយន្ដហោះ ឆាងជី នេះបានត្រៀមខ្លួនរួចជាស្រេចដើម្បីស្វាគមន៍ភ្ញៀវទេសចរ នឹងពង្រឹងការផ្តល់សេវាកម្មកាន់តែល្អប្រសើរ ឲ្យសមជាមជ្ឈមណ្ឌលអាកាសចរណ៍ឈានមុខគេនៅអាស៊ី។ នេះបើតាមការចេញផ្សាយដោយសារព័ត៌មានថៃ បាងកក ប៉ុស្តិ៍។
បន្ទាប់ពីបានស្ងាប់ស្ងាត់ដោយសារតែកូវីដ១៩អស់មួយរយៈ ហាងភាគច្រើននៅអាកាសយានដ្ឋាន ឆាងជី បានបើកដំណើរការឡើងវិញ ហើយដៃគូអាជីវកម្មដូចជាក្រុមហ៊ុនអាកាសចរណ៍ Singapore Airlines និងក្រុមហ៊ុនផ្សេងៗទៀតកំពុងសង្កេតមើលការស្ទុះងើបឡើងវិញនៃការធ្វើដំណើរអន្តរជាតិ។ ហើយកិច្ចខិតខំប្រឹងប្រែងក្នុងការស្ដារវិស័យអាកាសចរណ៍ឡើងវិញនេះ ត្រូវបានគេរំបឹងថា នឹងអាចជួយឱ្យអាកាសយានដ្ឋាន ឆាងជី ក្លាយជាព្រលានយន្តហោះដ៏មមាញឹកបំផុតក្នុងតំបន់សម្រាប់ការធ្វើដំណើរអន្តរជាតិនៅឆ្នាំ ២០២២។ ស្របពេលដែល អាកាសយានដ្ឋានអន្តរជាតិហុងកុង កំពុងជួបការធ្លាក់ចុះចំនួនអ្នកដំណើរតាម ដោយសារគោលនយោបាយ គ្មានកូវីដ ឬ (Zero-Covid) របស់ប្រទេសចិន។
ការស្ដារ អាកាសយានដ្ឋាន ឆាងជី ក៏ជាកត្តាដ៏មានសារៈសំខាន់សម្រាប់ស្ដារ និងជំរុញកំណើនសេដ្ឋកិច្ចរបស់ប្រទេសសិង្ហបុរីផងដែរ ព្រោះថាវិស័យអាកាសចរណ៍មានចំនួនច្រើនជាង ៥% នៃផលិតផលក្នុងស្រុកសរុបរបស់សិង្ហបុរី និងផ្តល់ការងារជាង ២០ ម៉ឺនកន្លែងសម្រាប់ប្រជាជនក្នុងប្រទេសនេះ។ ប្រទេសសិង្ហបុរីគឺជាប្រទេសដំបូងគេក្នុងទ្វីបអាស៊ី ដែលចាប់ផ្តើមបន្ធូរបន្ថយការរឹតបន្តឹងការធ្វើដំណើរ ដោយបង្កើតយន្តការណ៍ ទេសចរកូវីដ បានអនុញ្ញាតឱ្យមនុស្សមកពី៣២ប្រទេសចូលទស្សនាដោយមិនចាំបាច់ធ្វើចត្តាឡីស័ក។
អត្ថបទគួរអាន
ប្រធានក្រុមប្រឹក្សាជាតិរបស់សិង្ហបុរី បានលើកឡើងដែរថា ឆាប់ៗនេះ ពោលគឺអាចនឹង២ ទៅ៣សប្ដាហ៍ខាងមុខនេះ ប្រទេសសិង្ហបុរី មានផែនការនឹងលុបចោលការធ្វើតេស្ដកូវីដ១៩លើអ្នកដំណើរដែលបានចាក់វ៉ាក់សាំងកូវីដ១៩គ្រប់ចំនួនដូសផងដែរ ដើម្បីស្ដារ និងជំរុញដល់វិស័យទេសចរណ៍ ក៏ដូចជាអាកាសចរណ៍ ខណៈដែលរដ្ឋាភិបាលប្រទេសនេះ ក៏បានត្រៀមថវិកាប្រមាណ ៣៦៧ លានដុល្លារអាមេរិក ដើម្បីជំរុញការស្តារឡើងវិញនៃវិស័យទេសចរណ៍នេះផងដែរ។
សូមបញ្ជាក់ថា អាកាសយានដ្ឋាន ឆាងជី បានទទួលអ្នកដំណើរចំនួនជាង ១លាន ៤សែន នាក់ក្នុងរយៈពេលពីរខែដំបូងនៃឆ្នាំនេះ ដែលកើនឡើងពីជាង ២៦ ម៉ឺន នាក់ធៀបនឹងក្នុងរយៈពេលដូចគ្នាកាលពីឆ្នាំមុន។ ក្នុងរយៈពេលដូចគ្នានេះ បើធៀបនឹងប្រៀបធៀបនឹងទីក្រុងហុងកុងវិញ ឃើញថា អាកាសយានដ្ឋាននៅហុងកុងទទួលបានអ្នកដំណើរត្រឹមតែជិត១៦ម៉ឺននាក់ប៉ុណ្ណោះ។ រីឯ អាកាសយានដ្ឋានអន្តរជាតិអ៊ីនឆុនរបស់កូរ៉េខាងត្បូងវិញ ទទួលបានអ្នកដំណើរជាង៦៧ម៉ឺននាក់៕
អត្ថបទ៖ ម៉ុន សុកែវ
None
