យោងតាមការចុះផ្សាយរបស់សារព័ត៌មាន The Star នៅក្នុងសន្ទស្សន៍ភាពស្មុគស្មាញធុរកិច្ចសកលឆ្នាំ២០២៥ សិង្ហបុរី បានជាប់ចំណាត់ជាប្រទេសរឹតបន្តឹងការធ្វើអាជីវកម្មយ៉ាងតឹងរ៉ឹងបំផុតទី៦នៅអាស៊ីប៉ាស៊ីហ្វិក ដែលតឹងរ៉ឹងជាងប្រទេស និងដែនដីជាច្រើនរួមមាន នូវែលសេឡង់ ហុងកុង វៀតណាម ថៃ និងកោះតៃវ៉ាន់ទៅទៀត ហើយបើគិតនៅទាំងពិភពលោក សិង្ហបុរី ជាប់ចំណាត់ថ្នាក់លេខ៤៨ ក្នុងចំណោម៧៩ប្រទេស និងដែនដីដែលត្រូវបានស្ទង់មតិ។
សូមបញ្ជាក់ថា ចំណាត់ថ្នាក់កាន់តែទាប គឺបង្ហាញពីបរិយាកាសធុរកិច្ចកាន់តែស្មុគស្មាញ កាន់តែតឹងរ៉ឹង ខណៈដែលចំណាត់ថ្នាក់កាន់តែខ្ពស់បង្ហាញពីបរិយាកាសធុរកិច្ចកាន់តែងាយស្រួល មិនសូវតឹងរ៉ឹង។
សន្ទស្សន៍ភាពស្មុគស្មាញធុរកិច្ចសកលឆ្នាំ២០២៥ នេះ បានធ្វើការវាយតម្លៃសូចនាករចំនួន២៩២ ដែលគ្របដណ្តប់លើចំណុចជាច្រើន រួមមាន ច្បាប់អនុលោមភាព គណនេយ្យ ពន្ធ ធនធានមនុស្ស និងបញ្ជីប្រាក់បៀវត្សរ៍នៅ៧៩ប្រទេសដែលតំណាងឱ្យ៩៤% នៃផលិតផលក្នុងស្រុកសរុប (GDP) របស់ពិភពលោក និងតំណាងឱ្យ៩៥% នៃរំហូរទុនវិនិយោគបរទេស FDI របស់ពិភពលោក។
ថ្វីដ្បិតតែបរិយាកាសធុរកិច្ចនៅមានភាពតឹងរ៉ឹងយ៉ាងណាក្ដី ក៏សិង្ហបុរីនៅតែមានភាពទាក់ទាញសម្រាប់វិនិយោគិន ដោយសារប្រទេសនេះមានហេដ្ឋារចនាសម្ព័ន្ធលំដាប់ពិភពលោក កំពង់ផែ អាកាសយានដ្ឋាន និងបណ្តាញឌីជីថល ដែលពង្រឹងឋានៈប្រទេសសិង្ហបុរី ក្នុងនាមជាមជ្ឈមណ្ឌលពាណិជ្ជកម្មដ៏សំខាន់នៅក្នុងតំបន់ ហើយនៅសិង្ហបុរី ក៏សម្បូរធនធានមនុស្ស រីឯប្រាក់បៀវត្សរ៍ក៏កើនឡើងក្នុងកម្រិតល្អ។
ជាការពិតណាស់ ភាពស្មុគស្មាញនៃបទប្បញ្ញត្តិនៅក្នុងប្រទេសសិង្ហបុរី បានកើនឡើងបន្តិចដោយសារតែច្បាប់ប្រឆាំងនឹងការលាងលុយកខ្វក់កាន់តែតឹងរ៉ឹង និងការរឹតបន្តឹងបទប្បញ្ញត្តិ ស្ដីពី សេវាកម្មសាជីវកម្មផងដែរ៕
ដោយ: តែម សុខុម
