ឯកឧត្តមវេជ្ជបណ្ឌិត លី សុវណ្ណ អ្នកនាំពាក្យក្រសួងសុខាភិបាល មានប្រសាសន៍ថា មូលហេតុនៃការធ្វើតេស្តលើករណីសង្ស័យថាឆ្លងជំងឺកូវីដ១៩ មានការថយចុះនេះ ដោយសារតែមិនមានរកឃើញករណីឆ្លងថ្មីនាប៉ុន្មានសប្តាហ៍នេះ។ ឯកឧត្តមវេជ្ជបណ្ឌិតថា« ក្នុងចំនួនមនុស្ស ១០.៩៣៦នាក់ ដែលយើងបានធ្វើតេស្តនេះ គឺយើងធ្វើតេស្តទាំងអ្នកប៉ះពាល់ដោយផ្ទាល់ អ្នកប៉ះពាល់ដោយប្រយោល អ្នកដែលរលាកសួត ដែលសម្រាកនៅពេទ្យ អ្នកដែលមានជំងឺផ្តាសាយ និងអ្នកជំងឺផ្លូវដង្ហើមដទៃទៀត ដែលយើងធ្វើជាប្រចាំ ហើយនិងករណីសង្ស័យ»។
ចំពោះការកើនឡើងនៃចំនួនធ្វើតេស្តកាលពីសប្តាហ៍មុន អ្នកនាំពាក្យក្រសួងសុខាភិបាលរូបនេះបានអះអាងថា « អាទិត្យមុនហ្នឹងកើនឡើងដោយសារ យើងបានព័ត៌មានអំពីករណីមានជនជាតិចិនដែលគាត់ត្រលប់ទៅវិញថា មានវិជ្ជមានហ្នឹង ដូច្នេះយើងត្រូវធ្វើការយក រកឃើញទីតាំងស្នាក់នៅរបស់គាត់ហ្នឹងនៅតាមខុនដូនានា នៅកោះពេជ្រ និងបឹងកេងកងហ្នឹង យើងប្រមូលមកមើលទាំងអស់ គ្រាន់តែ២តំបន់នេះយកជាង៦០០នាក់ យកមកមើល ហើយជាលទ្ធផលគឺអវិជ្ជមានទាំងអស់»។
ដោយឡែក ចំពោះការថយចុះនៅសប្តាហ៍នេះត្រូវបាន ឯកឧត្តមវេជ្ជបណ្ឌិតថា «ធ្លាក់ហ្នឹងដោយសារ យើងអស់ករណីមានករណីវិជ្ជមានដែលរកឃើញ ដូច្នេះអ្នកប៉ះពាល់ អ្នកដែលប៉ះពាល់ផ្ទាល់ ឬមួយប្រយោលហ្នឹង គឺលែងមាន ឬមួយមានចំនួនតិច»។
អត្ថបទទាក់ទង!
បើទោះបីជាអ្នកដែលជាសះស្បើយ ទាំង១២០នាក់ បានចាកចេញពីមន្ទីរពេទ្យទាំងអស់ហើយក៏ពិតមែន តែក្រសួងនៅតែតាមដាន និងតម្រូវឲ្យអ្នកទាំង១២០អ្នកនេះ ធ្វើចត្តាឡីស័កនៅតាមគេហដ្ឋានរៀងៗខ្លួន ក្នុងរយៈពេល១៤ថ្ងៃសិន ទើបអាចចេញប្រកបការងារបានដូចមនុស្សធម្មតា។
បើតាមក្រសួងសុខាភិបាល គិតចាប់ពីខែមករា ឆ្នាំ២០២០ ដល់ថ្ងៃទី០៣ ខែឧសភា ២០២០ ប្រទេសកម្ពុជាមានធ្វើតេស្តរកមេរោគកូវីដ-១៩ច្រើនជាងបណ្តាប្រទេសមួយចំនួននៅក្នុងតំបន់ ដូចជាង ប្រទេសមីយ៉ាន់ម៉ា និងឡាវជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
