ឯកឧត្តម ប៉ាន សូរស័ក្តិ អះអាងយ៉ាងដូច្នេះ នៅគ្រាដែលឯកឧត្តម បានដឹកនាំគណៈប្រតិភូកម្ពុជា ចូលរួមកិច្ចប្រជុំរដ្ឋមន្ដ្រីប្រទេសអភិវឌ្ឍន៍តិចតួច (LDC Ministers Meeting) ក្នុងអំឡុងសន្និសីទថ្នាក់រដ្ឋមន្ត្រីលើកទី១២ (12th Ministerial Conference - MC12) របស់អង្គការពាណិជ្ជកម្មពិភពលោក (WTO) នៅទីក្រុងហ្សឺណែវ ប្រទេសស្វីស កាលពីថ្ងៃទី១២ ខែមិថុនា ឆ្នាំ២០២២។
នៅក្នុងកិច្ចប្រជុំរដ្ឋមន្ដ្រីប្រទេសអភិវឌ្ឍន៍តិចតួច ឯកឧត្តម ប៉ាន សូរស័ក្តិ បានលើកឡើងអំពី បញ្ហាមួយចំនួនដែលធ្វើឱ្យប្រទេសអភិវឌ្ឍន៍តិចតួច (LDCs) មិនទាន់ទាញយកប្រយោជន៍ពេញលេញពីប្រព័ន្ធអនុគ្រោះ ដែលផ្តល់ជូនប្រទេសអភិវឌ្ឍន៍តិចតួច (LDCs) ថ្វីបើបានទទួលនូវជំនួយកសាងសមត្ថភាព និងជំនួយបច្ចេកទេសនាពេលកន្លងមក។ ឯកឧត្តមបានបន្តថា ប្រទេសអភិវឌ្ឍន៍តិចតួច (LDCs) ទាំងអស់ត្រូវតែបន្តទាមទារ ជំនួយកសាងសមត្ថភាព និងបច្ចេកទេសតាមរយៈក្របខណ្ឌផ្សេងៗ ដែលវាមិនត្រឹមតែជួយឱ្យប្រទេសទាំងនេះ អាចទាញយកប្រយោជន៍ឱ្យបានពេញលេញពីប្រព័ន្ធអនុគ្រោះ និងអាចធ្វើសមាហរណកម្មយ៉ាងពេញលេញជាមួយប្រព័ន្ធពាណិជ្ជកម្មពហុភាគីប៉ុណ្ណោះទេ ព្រមទាំងអាចជួយដល់បរិវត្តកម្មនៃរចនាសម្ព័ន្ធកាន់តែធំទូលំទូលាយ ដែលប្រទេសអភិវឌ្ឍន៍តិចតួច (LDCs) ត្រូវការដើម្បីអាចរក្សានូវភាពប្រកួតប្រជែងសម្រាប់ការអភិវឌ្ឍសេដ្ឋកិច្ចប្រកបដោយបរិយាបន្ន និងភាពធន់។
អត្ថបទគួរអាន
ទន្ទឹមនេះ ឯកឧត្តមប៉ាន សូរស័ក្ដិ បានបញ្ជាក់បន្ថែមថា ប្រទេសអភិវឌ្ឍន៍តិចតួច (LDCs)ត្រូវបន្តទាមទារប្រព្រឹត្តកម្ម និងការអភិវឌ្ឍពិសេស និងដោយឡែក ឱ្យក្លាយជាគោលការណ៍ចម្បងនៃប្រព័ន្ធពាណិជ្ជកម្មពិភពលោក។ បន្ថែមពីនេះ ឯកឧត្តមបានស្នើឱ្យមានការពង្រឹងកិច្ចសហប្រតិបត្តិការ និងបង្កើនការចូលរួមរបស់ក្រុមប្រទេសអភិវឌ្ឍន៍តិចតួច (LDC Group) នៅក្នុងក្រុមប្រឹក្សា និងគណៈកម្មការអង្គការ ពាណិជ្ជកម្មពិភពលោក (WTO) ទាំងអស់ ដើម្បីសម្រេចឱ្យបាននូវប្រយោជន៍ជាអតិបរមាដល់ប្រទេស អភិវឌ្ឍន៍តិចតួច (LDCs)ផងដែរ។
សូមបញ្ជាក់ថា សន្និសីទថ្នាក់រដ្ឋមន្ត្រីលើកទី១២ (12th Ministerial Conference - MC12) របស់អង្គការពាណិជ្ជកម្មពិភពលោក (WTO) ប្រព្រឹត្តទៅរយៈពេល៤ថ្ងៃ ចាប់ពីថ្ងៃទី១២ ដល់ថ្ងៃទី ១៥ ខែមិថុនា នៅទីក្រុងហ្សឺណែវ ប្រទេសស្វីស ហើយសន្និសីទនេះ មានការចូលរួមពីរដ្ឋមន្ត្រីពាណិជ្ជកម្ម និងមន្ត្រីជាន់ខ្ពស់មកពីប្រទេស និងស្ថាប័នប្រមាណជាង ១៦០ ដែលជាសមាជិករបស់អង្គការពាណិជ្ជកម្មពិភពលោក៕
None
