នេះបើតាមការចុះផ្សាយដោយសារព័ត៌មាន Bloomberg។
ជាក់ស្តែងយើងក្រឡេកទៅមើលវិស័យឧស្សាហកម្មនៅប្រទេសវៀតណាម និង ម៉ាឡេស៊ី ដោយគេសង្កេតឃើញថា កម្មករនិយោជិកក្នុងវិស័យមួយនេះនៅក្នុងប្រទេសទាំងពីរ បានផ្តើមវិលត្រឡប់ទៅរកការងារបណ្តើរៗវិញហើយ បន្ទាប់ពីការបិទខ្ទប់ ឬ Lockdown នៅក្នុងប្រទេសទាំងពីរ ត្រូវបានបន្ធូរបន្ថយដោយផ្នែក ដែលជាចេតនាអនុញ្ញាតឲ្យ វិស័យឧស្សាហម្មមានដំណើរការឡើងវិញ។
ដោយឡែក ហាងលក់ទំនិញ និងសកម្មភាពសង្គម ពិសេសនៅតាមដងផ្លូវក្នុងរដ្ឋធានីម៉ានីលនៃប្រទេសហ្វីលីពីន និងនៅប្រទេសសឹង្ហបុរី ឯណោះវិញ ក៏បានវិលមករកសភាពស្ទើរតែធម្មតាឡើងវិញហើយ ក្រោយមានការសម្របសម្រួលនិតិវិធីពីអាជ្ញាធរ ក្នុងការបើកដំណើរការឡើងវិញ។
កិច្ចខិតខំប្រឹងប្រែងទាំងអស់នេះ ធ្វើឡើងដើម្បីរក្សាតុល្យភាពរវាងការឆ្លងកូវីដ១៩ កុំឲ្យកើនខ្ពស់ផង និង ធ្វើឲ្យសកម្មភាពរបស់ប្រជាជនវិលត្រលប់មករកសភាពដើមវិញ ជៀសវាងការប៉ះទង្គិចធ្ងន់ធ្ងរ ដល់ចរន្តសេដ្ឋកិច្ច ពោលគឺត្រូវរៀនរស់តាមគន្លងថ្មី នៃយុគសម័យកូវីដ នេះ។
អត្ថបទគួរអាន
ជាក់ស្តែង យើងសង្កេតឃើញប្រទេសជាច្រើននៅអាស៊ាន បានជ្រើសយកការប្រើប្រាស់ប័ណ្ណចាក់វ៉ាក់សាំង ជាលិខិតអនុញ្ញាត មុនពេលពលរដ្ឋអាចចូលទៅកន្លែងសាធារណៈផ្សេងៗបាន។ វិធានការណ៍នេះ ចូលរួមលើកកម្ពស់ការចាក់វ៉ាក់សាំងផង កាត់បន្ថយហានិភ័យនៃការចម្លងកូវីដ១៩ និង ធ្វើឲ្យសកម្មភាពសេដ្ឋកិច្ចមានដំណើរការឡើងវិញផង។
ជាមួយនឹងវិធានការណ៍ខាងលើនេះ យើងឃើញថា បន្ទាប់ពីផ្អាកដំណើរការក្នុងថ្នាក់រៀនអស់រយៈពេលជិត២ឆ្នាំ ប្រទេសកម្ពុជា បានសម្រេចឲ្យគ្រឹះស្ថានសិក្សាអប់រំរដ្ឋ និងឯកជន ចាប់ពីកម្រិតអនុវិទ្យាល័យ និង វិទ្យាល័យប្រមាណជាង ២២០កន្លែង ចាប់ផ្ដើមបើកដំណើរការឡើងវិញហើយ ប៉ុន្ដែ សម្រាប់តែសាលាដែលមានការអនុវត្តទៅតាមការវិធានការសុវត្ថិភាព ដែលបានកំណត់ដោយអាជ្ញាធរតែប៉ុណ្ណោះ។ទន្ទឹមនឹងនេះដែរ ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន គ្រោងនិងចាក់វ៉ាក់សាំងជូនកុមារដែលមានអាយុ៦ឆ្នាំ រហូតដល់១២ឆ្នាំ ដោយយុទ្ធនាការណ៍នៃការចាក់វ៉ាក់សាំងនេះ នឹងចាប់ផ្ដើមឡើងនៅថ្ងៃសុក្រ ទី១៧ ខែកញ្ញានេះ ជាមួយគោលដៅចាក់ជូនកុមារជិត ១លាន៩សែននាក់នៅទូទាំងប្រទេសកម្ពុជា។
ទន្ទឹមនឹងការព្យាយាមបើកចំហប្រទេសឡើងវិញតាមវិធីសាស្ត្រដែលគេឲ្យឈ្មោះថា «ការរស់នៅតាមបែបគន្លងថ្មី ជាមួយកូវីដ១៩» ប្រទេសក្នុងតំបន់អាស៊ាននៅតែទទួលរងការគម្រាមកំហែងពីការឆ្លងរាលដាលកូវីដ១៩ដដែល ពិសេសកូវីដ១៩បំប្លែងខ្លួនឌែលតា។
នៅអាស៊ាន ឥណ្ឌូនេស៊ីបន្តឈរកំពូលតារាងមានអ្នកឆ្លងសរុបច្រើនជាងគេដដែល ប៉ុន្តែករណីឆ្លងប្រចាំថ្ងៃរបស់ប្រទេសនេះ ធ្លាក់ចុះមកត្រឹមជាង ៤ពាន់នាក់ហើយ នៅឡើយតែហ្វីលីពីន ម៉ាឡេស៊ី ថៃ និងវៀតណាមប៉ុណ្ណោះ ដែលបន្តកត់ត្រាពីករណីឆ្លងថ្មីៗដល់ខ្ទង់ម៉ឺនករណីជារៀងរាល់ថ្ងៃ។
សូមបញ្ជាក់ថា ជាមួយអត្រាចាក់វ៉ាក់សាំងនៅមានកម្រិតទាប លើកលែង តែកម្ពុជានិងសឹង្ហបុរី ប្រទេសនៅអាស៊ីអាគ្នេយ៍បានកត់ត្រា ពីអត្រាស្លាប់ប្រចាំថ្ងៃ កើនលើសអត្រាស្លាប់ជាមធ្យមប្រចាំនៅទូទាំំងពិភពលោកទៅទៀត។ នេះបើតាមទិន្នដែលកត់ត្រានិងរៀបរៀងដោយសារព័ត៌មាន Bloomberg៕
None
