កិច្ចប្រជុំពិសេសរដ្ឋមន្ត្រីការបរទេសអាស៊ានអំពីស្ថានការណ៍ព្រំដែនកម្ពុជា-ថៃ ត្រៀមចាប់ផ្ដើមឡើងនៅរសៀលថ្ងៃចន្ទនេះ

កិច្ចប្រជុំពិសេសរដ្ឋមន្ត្រីការបរទេសអាស៊ាន (AMM) ដែលដឹកនាំដោយរដ្ឋមន្ត្រីការបរទេសម៉ាឡេស៊ី លោក ដាតុក សេរី ម៉ូហាម៉ាដ ហាសាន់ ត្រូវបានគេរំពឹងថា នឹងមានការចូលរួមពីមន្ត្រីសរុបចំនួន ២៣ រូប រួមទាំងអគ្គលេខាធិការអាស៊ាន លោក កៅ គឹមហួន ផងដែរ។

រដ្ឋមន្ត្រីក្រសួងការបរទេសកម្ពុជា ឯកឧត្តមឧបនាយករដ្ឋមន្ត្រី ប្រាក់ សុខុន នឹងដឹកនាំគណៈប្រតិភូសម្រាប់ការចូលរួមនៅក្នុងកិច្ចប្រជុំនេះ ខណៈខាងភាគីថៃ មានការចូលរួមពីលោក ស៊ីហាសាក់ ភូងកេតកែវ រដ្ឋមន្ត្រីការបរទេសថៃ និងមន្ត្រីមួយចំនួនទៀត។ ជាមួយគ្នានេះ រដ្ឋមន្ត្រីការបរទេស នៃសមាជិកអាស៊ានផ្សេងទៀតរួមមាន ឥណ្ឌូណេស៊ី ឡាវ សិង្ហបុរី ទីម័រលេស្ដ និងហ្វីលីពីន បានបញ្ជាក់ពីការចូលរួមរួចហើយដែរ ប៉ុន្ដែសម្រាប់ ព្រុយណេ វិញ ត្រូវបានរំពឹងថា នឹងមានការចូលរួមដោយរដ្ឋមន្ត្រីការបរទេសទី២, វៀតណាមចូលរួមដោយអនុរដ្ឋមន្ត្រីការបរទេស និងមីយ៉ាន់ម៉ា ចូលរួមតាមប្រព័ន្ធវីដេអូអនឡាញ។

ក្រសួងការបរទេសម៉ាឡេស៊ី បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា កិច្ចប្រជុំពិសេសនេះ នឹងត្រូវកោះប្រជុំស្របតាមការសម្រេចចិត្តរបស់នាយករដ្ឋមន្ត្រីម៉ាឡេស៊ី កម្ពុជា និងថៃ កាលពីថ្ងៃទី១១ ខែធ្នូ។

កិច្ចប្រជុំនេះនឹងផ្តល់វេទិកាមួយ សម្រាប់រដ្ឋមន្ត្រីការបរទេសអាស៊ាន ដើម្បីផ្លាស់ប្តូរទស្សនៈ និងពិចារណាលើជំហានដែលអាស៊ានអាចធ្វើបាន ជុំវិញស្ថានភាពបច្ចុប្បន្ននៃជម្លោះព្រំដែនកម្ពុជា និងថៃ ដើម្បីគាំទ្រដល់កិច្ចខិតខំប្រឹងប្រែង ដែលកំពុងបន្តឆ្ពោះទៅរកការបន្ធូរបន្ថយភាពតានតឹង និងការបញ្ឈប់អរិភាព ដើម្បីផលប្រយោជន៍នៃសន្តិភាព និងស្ថិរភាពរវាងរដ្ឋសមាជិកអាស៊ានទាំងពីរ និងតំបន់ទូលំទូលាយ។