រដ្ឋមន្ត្រីក្រសួងថាមពលស្រីលង្កាលោក Kanchana Wijesekera បាននិយាយថា សាជីវកម្មប្រេង Ceylon Petroleum ដែលគ្រប់គ្រងដោយរដ្ឋកំពុងជួបការលំបាកក្នុងការផ្តល់ហិរញ្ញប្បទានដល់ការនាំចូលប្រេងពីក្រៅប្រទេស ដើម្បីផ្គត់ផ្គង់ក្នុងស្រុក ខណៈពេលដែលការប្រើប្រាស់បានកើនឡើងដោយសារតែកង្វះខាតអគ្គិសនី និងឧស្ម័ន។
លោក Kanchana បាននិយាយថា លោកគ្មានជម្រើសអ្វីក្រៅពីប្រើប្រាស់វិធីសាស្ត្រចុះឈ្មោះអ្នកប្រើប្រាស់នៅស្ថានីយ៍ចាក់ប្រេងឥន្ទនៈ ហើយផ្តល់ឱ្យពួកគេនូវការកំណត់ប្រចាំសប្តាហ៍ ដែលមានការធានារហូតដល់ប្រទេសអាចពង្រឹងស្ថានភាពហិរញ្ញវត្ថុបាននោះទេ។
ទន្ទឹមនឹងនោះ រដ្ឋមន្ត្រីក្រសួងថាមពលរូបនេះរំពឹងថា វិធានការនេះនឹងដាក់ចេញនៅក្នុងសប្តាហ៍ដំបូងក្នុងខែកក្កដា ប៉ុន្តែ លោកមិនបានបញ្ជាក់លម្អិតថា តើអ្នកបើកបរនឹងត្រូវបានអនុញ្ញាតឲ្យទិញប្រេងឥន្ទនៈក្នុងបរិមាណប៉ុន្មានក្នុង១សប្ដាហ៍ ដែលបានកំណត់នៅក្នុងកូតានោះទេ។
គួររំឮកថា ប្រទេសស្រីលង្កាកំពុងតស៊ូជាមួយនឹងវិបត្តិសេដ្ឋកិច្ចដ៏អាក្រក់បំផុតរបស់ខ្លួន ដោយប្រទេសនេះមិនមានទុនបំរុងប្រាក់អន្តជាតិគ្រប់គ្រាន់សម្រាប់ប្រើប្រាស់លើការនាំចូលសម្ភារៈចាំបាច់បាន ដូចជា ស្បៀងអាហារ ប្រេងឥន្ធនៈ និងថ្នាំ ពេទ្យជាដើម។ ក្នុងនោះ កាលពីពាក់កណ្តាលខែមេសា រដ្ឋាភិបាលប្រទេសនេះ ក៏បានកំណត់ឱ្យស្ថានីយ៍ប្រេងឥន្ធនៈទាំងអស់មិនត្រូវលក់ប្រេងសាំង ឬ ម៉ាស៊ុត លើសពី ៤ លីត្រ ទៅ ៥ លីត្រឱ្យអ្នកបើកបរម៉ូតូ និង សម្រាប់កង់បី និងមិនឲ្យលក់លើសពី ១៩ លីត្រ សម្រាប់អ្នកបើកបររថយន្តនោះទេ។
ទោះយ៉ាងណា វិធានការណ៍ទាំងនេះ ហាក់មិនទទួលបានប្រសិទ្ធភាពឡើយ ខណៈអ្នកបើកបរយានយន្តជាច្រើនបានបង្ហូរប្រេងចេញពីយន្តជំនិះរបស់ពួកគេដើម្បីស្តុកទុកប្រើបណ្តោះអាសន្ន ហើយត្រឡប់ទៅតម្រង់ជួរចាក់ប្រេងម្តងទៀត។
អត្ថបទគួរអាន
តួយ៉ាង នៅសប្តាហ៍នេះ ការតម្រង់ជួរនៅស្ថានីយ៍ប្រេងឥន្ធនៈកាន់តែវែងជាងមុន ដោយមានរថយន្តរាប់រយគ្រឿង និង ម៉ូតូរាប់ពាន់គ្រឿងកំពុងរង់ចាំជាជួរដើម្បីទទួលបានប្រេងឥន្ទនៈ។
មែនទែនទៅ រដ្ឋមន្ត្រីក្រសួងថាមពលលោក Kanchana បានអះអាងថាថា រដ្ឋាភិបាលស្រីលង្កាបានទៅជួបបេសកជនរបស់ទីក្រុងមូស្គូនៅទីក្រុងកូឡុំបូក្នុងប្រទេសស្រីលង្កា ដើម្បីឱ្យរុស្ស៊ីជួយធានាការផ្គត់ផ្គង់ប្រេងរបស់ទីក្រុងម៉ូស្គូរ ដោយផ្ទាល់មកកាន់ប្រទេសរបស់ខ្លួន។ កាលពី ២ សប្តាហ៍មុន ប្រទេសស្រីលង្កាបានទទួលទិញប្រេងឆៅរបស់រុស្ស៊ីប្រហែល ៩ ម៉ឺនតោនដើម្បីចម្រាញ់នៅលើកោះរបស់ខ្លួន ប៉ុន្តែផលិតផលសម្រេចពីរោងចក្រចម្រាញ់ គឺតិចជាងមួយភាគដប់នៃតម្រូវការប្រចាំថ្ងៃរបស់ប្រទេសទៅទៀត។
គួរជម្រាបថា ប្រទេសស្រីលង្កាបានជំពាក់បំណុលបរទេសចំនួនជាង ៥១ ពាន់លានដុល្លារអាមេរិក បើគិតត្រឹមកាលពីពាក់កណ្តាលខែមេសា ហើយចាប់តាំងពីពេលនោះមកប្រទេសនេះ បានបើកកិច្ចពិភាក្សាជាមួយមូលនិធិរូបិយវត្ថុអន្តរជាតិសម្រាប់សំណើកម្ចីថវិកាបន្ថែមម្តងហើយម្តងទៀត ដើម្បីស្តារសេដ្ឋកិច្ចរបស់ខ្លួនឡើងវិញផងដែរ៕
None
