លោកស្រី ង៉ូហ្ស៊ី អូកុនចូ អ៊ីវៀឡា (Ngozi Okonjo Iweala) ប្រធានអង្គការពាណិជ្ជកម្មពិភពលោក បាននិយាយថា ផលប៉ះពាល់នៃជំងឺរាតត្បាតកូវីត ១៩ សង្គ្រាមនៅអ៊ុយក្រែន វិបត្តិស្បៀងអាហារ និង បញ្ហាថាមពល កំពុងបង្កឱ្យមានភាពស្មុគស្មាញជាប្រព័ន្ធសម្រាប់ពាណិជ្ជកម្មពិភពលោក។ ជាពិសេស លោកស្រីបន្ថែមថា វាក៏បង្កឱ្យមានសញ្ញានៃការបែកបាក់គ្នាក្នុងចំណោមប្រទេសជាសមាជិក ១៦៤ ប្រទេសរបស់អង្គការពាណិជកម្មពិភពលោកផងដែរ ខណៈនៅក្នុងកិច្ចប្រជុំ មានសមាជិកចន្លោះពី ៣០ ទៅ ៤០ ប្រទេស បានដើរចេញនៅពេល ដែលរដ្ឋមន្ត្រីអភិវឌ្ឍន៍សេដ្ឋកិច្ចរុស្ស៊ីឡើងថ្លែងសន្ទរកថានៅក្នុងកិច្ចប្រជុំ។
ថ្លែងទៅកាន់រដ្ឋមន្ត្រីក្នុងពិធីបើកកិច្ចប្រជុំ លោកស្រី អ៊ីវៀឡា បានជំរុញឱ្យប្រទេសជាសមាជិកទាំងអស់យល់ព្រមសម្រេចនូវកិច្ចព្រមព្រៀងលើប្រធានបទដូចជា ការកាត់បន្ថយការឧបត្ថម្ភធនលើការនេសាទ ការជំរុញលទ្ធភាពទទួលបានវ៉ាក់សាំងកូវីដ១៩ឲ្យបានគ្រប់គ្រាន់ ការដោះស្រាយបញ្ហាសន្តិសុខស្បៀង និងកំណត់គោលនយោបាយកំណែទម្រង់របស់ WTOជាដើម។
អត្ថបទគួរអាន
ទោះយ៉ាងណា ប្រធានអង្គការពាណិជ្ជកម្មពិភពលោករូបនេះ បានសង្កត់ធ្ងន់ថា មុននឹងកិច្ចព្រមព្រៀងអាចសម្រេចបាន ១ ចំណុច ទៅ ២ ចំណុច វាមិនមែនជារឿងងាយស្រួលនោះទេ ខណៈការប្រកែក និងការមិនចុះសម្រុងគ្នានឹងកើតមានឡើង នៅអំឡុងពេលប្រជុំ។
ថ្វីបើបែបនេះក្តី លោកស្រីក៏បានអំពាវនាវដល់រដ្ឋមន្ត្រីតំណាងប្រទេសជាសមាជិកនីមួយៗថា ការសម្រុះសម្រួលគ្នាជារឿងដ៏ល្អបំផុត ខណៈក្នុងចំណោមសមាជិកទាំង ១៦៤ របស់អង្គការ WTO ត្រូវធ្វើការសម្រេចចិត្តដោយឯកច្ឆន្ទទើបអាចសម្រេចបានកិច្ចព្រមព្រៀងបាន ដូច្នេះ មានន័យថា សមាជិកតែមួយក៏អាចរារាំងវឌ្ឍនភាពនៃសេចក្ដីសម្រេចផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
