ហាងកាហ្វេ Starbucks នៅក្នុងប្រទេសរុស្ស៊ី ត្រូវបានគេដឹងថា មានហាងប្រតិបត្តិការចំនួន ១៣០ កន្លែង ដែលដំណើរការដោយក្រុមហ៊ុន អាល់សាយ៉ា (Alshaya Group) បូករួមជាមួយនឹងបុគ្គលិកជិត ២០០០ នាក់នៅក្នុងប្រទេសនេះ។ ប៉ុន្ដែ ក្រោយមានការឈ្លានពានរបស់រុស្ស៊ីទៅលើប្រទេសអ៊ុយក្រែន ក្រុមហ៊ុនមេរបស់ហាងកាហ្វេលំដាប់អន្តរជាតិមួយនេះ បានសម្រេចចិត្ត នឹងត្រៀមចាកចេញពីទីផ្សាររុស្សីនាពេលឆាប់ៗខាងមុខនេះ ដូចដែរក្រុមហ៊ុន និងម៉ាកយីហោរបស់លោកខាងលិចមួយចំនួនបានអនុវត្តនាពេលកន្លងមកដែរ។
កាលពីខែមីនាកន្លងទៅ ក្រុមហ៊ុន Starbucks បានបិទហាងរបស់ខ្លួន និងផ្អាកសកម្មភាពអាជីវកម្មទាំងអស់នៅក្នុងប្រទេសរុស្ស៊ី រួមទាំងការដឹកជញ្ជូនផលិតផលរបស់ខ្លួនទៅកាន់ប្រទេសនេះផងដែរ បន្ទាប់ពីការលុកលុយរបស់ទីក្រុងមូស្គូមកកាន់អ៊ុយក្រែន។
ក្រុមហ៊ុននេះ ដែលបានបើកដំណើរការហាងដំបូងរបស់ខ្លួននៅក្នុងប្រទេសរុស្ស៊ីនៅក្នុងឆ្នាំ ២០០៧ បានគូសបញ្ជាក់ថា ខ្លួននឹងនៅតែបន្តគាំទ្របុគ្គលិករបស់ខ្លួននៅទីនោះ រួមទាំងការបង់ប្រាក់ឱ្យពួកគេសម្រាប់រយៈពេលប្រាំមួយខែពេញផងដែរ មុននឹងដកប្រតិបត្តិការទាំងអស់ចេញពីរុស្ស៊ី។
អត្ថបទគួរអាន
គួររំលឹកថា កាលពីសប្តាហ៍មុន ក្រុមហ៊ុនអាហារដ៏ល្បីមួយរបស់អាមេរិក McDonald's ក៏បាននិយាយថា ខ្លួនកំពុងលក់ភោជនីយដ្ឋានទាំងអស់របស់ខ្លួននៅក្នុងប្រទេសរុស្ស៊ីទៅឱ្យឈ្មួញក្នុងស្រុករបស់ខ្លួនគឺ លោកAlexander Govor ដើម្បីដាក់ឲ្យដំណើរការឡើងវិញក្រោមឈ្មោះថ្មី ប៉ុន្តែនៅរក្សាស្លាកសញ្ញារបស់ខ្លួនដដែល ខណៈដែលក្រុមហ៊ុនផលិតឡាន Renault របស់បារាំងឯណោះវិញ ក៏កំពុងលក់ភាគហ៊ុនភាគរបស់ខ្លួនស្ទើរតែទាំងអស់ទៅឲ្យក្រុមហ៊ុនផលិតរថយន្តដ៏ធំបំផុតមួយរបស់រុស្ស៊ីផងដែរ។
លើសពីនេះទៅទៀត ក្រុមហ៊ុនលោកខាងលិចមួយចំនួនផ្សេងទៀត រួមទាំងម៉ាក Imperial Brands និង Shell កំពុងកាត់ផ្តាច់ទំនាក់ទំនងជាមួយទីផ្សាររុស្ស៊ីដូចគ្នា ដោយពួកគេបានយល់ព្រមលក់ទ្រព្យសម្បត្តិរបស់ខ្លួននៅក្នុងប្រទេសនេះ ឬក៏ប្រគល់ឱ្យអ្នកគ្រប់គ្រងនៅក្នុងប្រទេសរុស្សីផ្ទាល់តែម្តង។
ទោះជាយ៉ាងណាក៏ដោយ ក្រុមហ៊ុន Starbucks មិនបានផ្តល់ព័ត៌មានលម្អិតអំពីផលប៉ះពាល់ហិរញ្ញវត្ថុនៃការចាកចេញនោះទេ ខណៈដែល ក្រុមហ៊ុន McDonald's វិញបាននិយាយថា ខ្លួនអាចនឹងខាតបង់ជាសាច់ប្រាក់រហូតដល់ ១,៤ ពាន់លានដុល្លារ ក្រោយពីការចាកចេញពីទីផ្សាររុស្សី៕
អត្ថបទ: ហ៊ុន គន្ធថៃ
None
