ប្រទេសស្រីលង្កាបង្កើនតម្លៃប្រេងឥន្ធនៈ ខណៈដែលប្រទេសនេះប្រឹងប្រែងទប់ស្កាត់វិបត្តិសេដ្ឋកិច្ចដ៏ធ្ងន់ធ្ងររបស់ខ្លួន

រដ្ឋមន្ត្រីក្រសួងថាមពលស្រីលង្កា លោក កាញ់ចាណា វីជេសេកេរ៉ា (Kanchana Wijesekera) បាននិយាយនៅក្នុងសារបង្ហោះតាមប្រព័ន្ធ Twitter ថា តម្លៃប្រេងឥន្ធនៈនឹងកើនឡើងចាប់ពី ២០% ទៅ ៣៤% ខណៈដែលតម្លៃប្រេងម៉ាស៊ូត នឹងកើនឡើងចាប់ពី៣៥% ទៅ ៣៨% ដែលនឹងចាប់អនុវត្តភ្លាមៗនេះតែម្ដង។

រដ្ឋមន្ត្រីរូបនេះបានបញ្ជាក់ថា គណៈរដ្ឋមន្ត្រីក៏បានអនុម័តលើការកែសម្រួលលើថ្លៃដឹកជញ្ជូន និងថ្លៃសេវាផ្សេងៗតាមដំណើរការនោះផងដែរ។

លោក វីជេសេកេរ៉ា រដ្ឋមន្ត្រីក្រសួងថាមពលស្រីលង្កា បាននិយាយដែរថា ប្រជាពលរដ្ឋនឹងត្រូវបានលើកទឹកចិត្តឱ្យធ្វើការពីផ្ទះ "ដើម្បីកាត់បន្ថយការប្រើប្រាស់ប្រេងឥន្ធនៈ និងដើម្បីគ្រប់គ្រងវិបត្តិថាមពល" ហើយលោកបានបន្ថែមថា មន្ត្រីផ្នែកសាធារណៈនឹងធ្វើការពីការិយាល័យបានលុះត្រាតែមានការណែនាំពីប្រធានស្ថាប័នរបស់ពួកគេ។

ក្រុមអ្នកសេដ្ឋកិច្ចបាននិយាយថា ការដំឡើងថ្លៃប្រេង និងការដឹកជញ្ជូននឹងធ្វើឱ្យមានលំហូរអាហារ និងទំនិញផ្សេងទៀតកាន់តែច្រើនចូលទៅក្នុងប្រទេសស្រីលង្កា។

បន្ថែមពីនេះ អ្នកសេដ្ឋកិច្ចបាននិយាយថា ការដំឡើងថ្លៃប្រេងឥន្ធនៈនិងថាមពលនេះនឹងចាំបាច់បំផុតដើម្បីឲ្យរដ្ឋមានប្រាក់ចំណូលឡើងវិញ ប៉ុន្តែអ្នកជំនាញយល់ស្របថា វិធានការនេះ អាចនឹងនាំឱ្យមានការឈឺចាប់រយៈពេលខ្លី ពិសេសការកើនឡើងអតិផរណាតែម្ដង។

អតិផរណាប្រចាំឆ្នាំនៅក្នុងប្រទេសកោះមួយនេះ បានកើនឡើងខ្ពស់បំផុតដល់ ជិត៣៤% នៅក្នុងខែមេសា ធៀបនឹងខែមីនា គឺបានកើនឡើងជាង ២១%។ នេះបើយោងតាមទិន្នន័យរបស់រដ្ឋាភិបាល ដែលទើបចេញផ្សាយនាដើមសប្ដាហ៍នេះ ។

ប្រទេសស្រីលង្កាកំពុងស្ថិតក្នុងវិបត្តិសេដ្ឋកិច្ចដ៏អាក្រក់បំផុតរបស់ខ្លួនចាប់តាំងពីទទួលបានឯករាជ្យខណៈ ដែលកង្វះខាតនៃរូបិយបណ្ណបរទេសបានធ្វើឱ្យរាំងស្ទះដល់ការនាំចូលទំនិញជាហេតុបណ្ដាលឱ្យប្រទេសនេះខ្វះខាតប្រេងឥន្ធនៈ ថ្នាំពេទ្យ និងការដាច់ចរន្តអគ្គិសនី។

វិបត្តិហិរញ្ញវត្ថុស្រីលង្កាបានកើតឡើងដោយសារវិបត្តិរួមផ្សំគ្នា ដូចជាជំងឺរាតត្បាតកូវីដ-១៩ដែលកំពុងវាយលុកសេដ្ឋកិច្ចដែលពឹងផ្អែកលើវិស័យទេសចរណ៍ ការកើនឡើងនូវតម្លៃប្រេង និងការកាត់បន្ថយពន្ធប្រជានិយមរបស់រដ្ឋាភិបាលដឹកនាំដោយប្រធានាធិបតីលោក Gotabaya Rajapaksa និងបងប្រុសរបស់លោកគឺលោក Mahinda ដែលបានលាលែងពីតំណែងនាយករដ្ឋមន្ត្រីក្នុងខែនេះ។

លោក Dhananath Fernando អ្នកវិភាគនៃវិទ្យាស្ថាន Advocata មានមូលដ្ឋាននៅទីក្រុងកូឡំបូបាននិយាយថា តម្លៃប្រេងឥន្ធនៈនៅស្រីលង្កាបានឡើងថ្លៃប្រហែល ២៦០% ចាប់តាំងពីខែតុលាឆ្នាំមុន និងប្រេងម៉ាស៊ូតបានឡើងជាង ២៣០% ដូច្នេះហើយ តម្លៃអាហារ និងទំនិញសំខាន់ៗផ្សេងទៀតត្រូវតែបានដំឡើងថ្លៃផងដែរ។

លោក Fernando បានបញ្ជាក់ថា អ្នកក្រនឹងរងផលប៉ះពាល់ខ្លាំងបំផុតពីវិបត្តិនេះ ហើយដំណោះស្រាយគឺរដ្ឋត្រូវបង្កើតប្រព័ន្ធផ្ទេរប្រាក់ឧបត្ថម្ភ ដើម្បីសង្គ្រោះអ្នកក្រ និងបង្កើនប្រសិទ្ធភាពនៃការជួយសង្គ្រោះតាមដែលអាចធ្វើទៅបាន។

នាយករដ្ឋមន្ត្រីស្រីលង្កាលោក Ranil បាននិយាយកាលពីសប្តាហ៍មុនថា នៅក្នុងរយៈពេលខ្លីខាងមុខនេះ ប្រទេសស្រីលង្កានឹងត្រូវប្រឈមមុខពេលវេលាដ៏លំបាកមួយបន្ថែមទៀត នោះគឺអតិផរណានឹងកើនឡើងបន្ថែមទៀត៕

អត្ថបទ៖ សុខ ជា