គម្រោងលំនៅដ្ឋានប្រណីត The Palms របស់ឧកញ៉ា សៀ ឫទ្ធី (រូបភាព)
លោកឧកញ៉ា សៀ ឫទ្ធី ដែលគេស្គាល់ថា ជាវិនិយោគិននិងធុរជនលេចធ្លោមួយរូបនៅកម្ពុជា ជាពិសេស ក្នុងវិស័យអចលនទ្រព្យ ឥឡូវនេះ លោកឧក…
ប៉ុន្ដែ យ៉ាងណាក៏ដោយ វិស័យនេះហាក់ដូចជានៅតែមានភាពថ្មីសន្លាងនៅឡើយសម្រាប់កម្ពុជា ខណៈដែលក្រុមហ៊ុនដែលបានឡើងផ្សារហ៊ុន ឬបោះផ្សាយមូលបត្រនេះ ទើបតែមាន៥ក្រុមហ៊ុនប៉ុណ្ណោះ គឺរដ្ឋាករទឹកស្វយ័តក្រុងភ្នំពេញ ក្រុមហ៊ុន Grand Twins International តំបន់សេដ្ឋកិច្ចពិសេសភ្នំពេញ កំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ។
ឯកឧត្តម ហុង សុខហ៊ួរ អគ្គនាយកក្រុមហ៊ុនផ្សារមូលបត្រកម្ពុជា បានលើកឡើងថា ភាពយឺតយ៉ាវនៃការសម្រេចចិត្តចុះបញ្ជីបោះផ្សាយមូលបត្រនៅកម្ពុជា គឺដោយសារតែក្រុមហ៊ុនភាគច្រើន ហាក់មិនទាន់បានត្រៀមខ្លួនឲ្យបានរួចរាល់នៅឡើយ ខណៈដែលក្រុមហ៊ុន ឬសហគ្រាសធុនតូចនិងមធ្យមភាគច្រើន នៅមានការគ្រប់គ្រងមិនទាន់មានស្ដង់ដារជាក់លាក់នៅឡើយ។
ដោយមើលឃើញពីភាពក្មេងខ្ចីនៃវិស័យនេះ កាលពីពេលថ្មីៗនេះ គណៈកម្មការមូលបត្រកម្ពុជា បានបើកនូវសិក្ខាសាលាមួយស្ដីអំពីកម្មវិធីឧត្តមភាព ក្នុងគោលបំណងជំរុញឲ្យក្រុមហ៊ុន ក៏ដូចជាសហគ្រាសធុនតូច និងមធ្យមនៅកម្ពុជា បានសិក្សាបន្ថែមអំពីឱកាស និងការរៀបចំខ្លួនដើម្បីឈានទៅរកការបោះផ្សាយមូលបត្ររបស់ខ្លួន ដោយមានការចូលរួមពីសហគ្រាសធុនតូចនិងមធ្យមប្រមាណជាង៧០សហគ្រាស ក្រោមការចែករំលែកពីបទពិសោធន៍ល្អៗពីសំណាក់ក្រុមហ៊ុនធំៗនៅក្នុងតំបន់។
កម្មវិធី ឧត្ដមភាព ដែលរៀបចំឡើងដោយគណៈកម្មការមូលបត្រកម្ពុជា និងផ្សារមូលបត្រកម្ពុជា។
ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា បានឲ្យដឹងថា កម្មវិធីនេះនឹងជួយលើកកម្ពស់សមត្ថភាពដល់សហគ្រាសធុនតូចនិងមធ្យមដើម្បីបានយល់ដឹងកាន់តែច្បាស់អំពីដំណើរការនៃការរៀបចំខ្លួនឡើងផ្សារហ៊ុនសម្រាប់អាជីវកម្មរបស់ខ្លួន។
ឯកឧត្តមបន្តថា ការឈានជើងចូលទៅក្នុងការបោះផ្សាយមូលបត្រនេះ មិនត្រឹមតែជាការប្រមែប្រមូលទុនសម្រាប់ពង្រីកវិសាលភាពអាជីវកម្មរបស់ខ្លួនប៉ុណ្ណោះទេ ប៉ុន្ដែ វាក៏ជាកញ្ចក់ដ៏ថ្លាឆ្វង់មួយ ដែលអាចឆ្លុះបញ្ហាឲ្យឃើញពីសមត្ថភាពពិតក្នុងការគ្រប់គ្រងនិងតម្លាភាព ដែលវានឹងផ្ដល់នូវទំនុកចិត្តកាន់តែខ្លាំងសម្រាប់អតិថិជន ក៏ដូចជាដៃគូវិនិយោគនានា។ មិនតែប៉ុណ្ណោះ ក្រុមហ៊ុនដែលបានចូលផ្សារហ៊ុន ក៏អាចមានឱកាសច្រើនក្នុងការទំនាក់ទំនងជាមួយក្រុមហ៊ុនធំៗជាច្រើនទៀត ដើម្បីពង្រីកអាណាចក្រអាជីវកម្ម និងភាពជាដៃគូកាន់តែប្រសើរឡើងផងដែរ។
ជាមួយគ្នានេះ លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជា បានលើកឡើងដែរថា តាមរបាយការណ៍ក្រសួងផែនការ គិតមកទល់ពេលនេះ សហគ្រាសធុនតូច និងមធ្យមនៅកម្ពុជាមានប្រមាណ ៥៣ម៉ឺនសហគ្រាសហើយ ខណៈដែលសហគ្រាសដែលបានចុះបញ្ជីនៅក្រសួងឧស្សហកម្ម និងសិប្បកម្មមានប្រមាណជិត ៤ម៉ឺនសហគ្រាស។ ប៉ុន្ដែក្នុងចំណោមសហគ្រាសទាំងនោះ ភាគច្រើននៅមានភាពមិនច្បាស់លាស់ ក៏ដូចជាកំពុងប្រឈមនឹងកត្តាមួយចំនួនសម្រាប់ការដំណើរការទៅរកការបោះផ្សាយមូលបត្ររបស់ខ្លួនផងដែរ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជា។
ប៉ុន្ដែ លោកឧកញ៉ាគូសបញ្ជាក់ថា លោកបាននិងកំពុងសម្រួលជាមួយរដ្ឋាភិបាលរួចហើយ ដើម្បីលើកទឹកចិត្តដល់ពាណិជ្ជករ ក៏ដូចជាក្រុមហ៊ុន សហគ្រាសទាំងឡាយណា ដែលមានបំណងចង់ចូលផ្សារហ៊ុន។ ព្រោះថា ស្របពេលដែលកម្ពុជាបាននិងកំពុងស្ថិតក្នុងសមាហរណកម្មសេដ្ឋកិច្ចអាស៊ាន ការយល់ដឹងអំពីផ្សារមូលបត្រសម្រាប់សហគ្រានធុនតូច និងមធ្យមនៅកម្ពុជា គឺមានសារសំខាន់ណាស់ក្នុងការពង្រីកវិសាលភាពធុរកិច្ចនិងស្ដង់ដាររបស់ខ្លួន ពិសេសសម្រាប់ការប្រកួតប្រជែងនៅក្នុងតំបន់ ដើម្បីជៀសផុតពីការលេបត្របាក់ទីផ្សារដោយក្រុមហ៊ុនបរទេសធំៗ ដែលបាននិងកំពុងហូរចូលមកកម្ពុជា។
លោកឧកញ៉ា តែ តាំងប៉ បន្ថែមថា រហូតមកទល់ពេលនេះ រាជរដ្ឋាភិបាលក៏បាននាំយកនូវស្ដង់ដារអាស៊ានប្រមាណជាង ៥០០ប្រភេទ មកបញ្ចូលនៅក្នុងទីផ្សារកម្ពុជាផងដែរ ដើម្បីធ្វើយ៉ាងណាជំរុញឲ្យសមត្ថភាពក្នុងការប្រកួតប្រជែងរបស់ផលិតផល និងសេវាកម្មរបស់កម្ពុជាអាចប្រជែងតំណែងនៅក្នុងតំបន់។
លោកឧកញ៉ា គួច ម៉េងលី ប្រធានក្រុមប្រឹក្សាភិបាលក្រុមហ៊ុនម៉េងលី ជេ គួច គ្រុប ដែលជាក្រុមហ៊ុនត្រៀមនឹងឡើងផ្សារមូលបត្រនៅឆ្នាំក្រោយនេះ បានលើកឡើងដែរថា បើមើលពីកម្រិតនៃសមត្ថភាពរបស់សហគ្រាសធុនតូចនិងមធ្យមនៅកម្ពុជា ភាគច្រើនហាក់ដូចជានៅមានកម្រិតមួយតូចនៅឡើយ សម្រាប់ការបោះជើងចូលទៅក្នុងផ្សារហ៊ុន។ តែយ៉ាងក៏ដោយ លោកថា សហគ្រាសទាំងអស់ គួរតែស្វែងយល់ពីវិស័យមួយនេះ ព្រោះថា វាជាឱកាសយុទ្ធសាស្ត្រក្នុងការពង្រីកខ្លួន ដូចដែលក្រុមហ៊ុនក្នុងសកលលោកជាច្រើនបាននិងកំពុងនិយមធ្វើ។
លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន Worldbridge Group ក៏ជាវាគ្មិនមួយរូបនៃកម្មវិធី ឧត្ដមភាពនេះដែរ។
ឧកញ៉ាដែលកំពុងមានឈ្មោះបោះសំឡេងក្នុងវិស័យអប់រំរូបនេះបានបន្ថែមទៀតថា ទោះបីសមត្ថភាពរបស់ក្រុមហ៊ុន ឬសហគ្រាសក្នុងស្រុកនៅមានកម្រិតក៏ដោយក្ដី ប៉ុន្ដែ ពួកគេគួរតែចាប់ផ្ដើមគិតរៀបចំខ្លួនឲ្យបានរួចរាល់ ពោលគឺ បើខ្លួនតូច គឺធ្វើតាមតូច! ធំធ្វើតាមធំ! ទៅតាមសមត្ថភាពនិងលទ្ធភាពរបស់ខ្លួន។ លោកបានសង្កត់ធ្ងន់ថា ប្រសិនបើគ្រប់គ្នានៅតែមិនយកចិត្តទុកដាក់ធ្វើ នោះវិស័យផ្សារហ៊ុនកម្ពុជាក៏មិនមានការលូតលាស់ដែរ។ ដូច្នេះ យើងចាំបាច់ត្រូវមានភាពក្លាហាននិងជំនឿចិត្ត។
លោក ចាន់ ស៊ីថា អគ្គនាយកក្រុមហ៊ុន ង៉ូវហេង ហ្វូដប្រដាកសិន ដែលជាសិប្បកម្មផលិតផលទឹកត្រី និងកែច្នៃម្រេច នៅខេត្តកំពត បានបង្ហាញការយល់ឃើញជុំវិញឱកាសឡើងផ្សារមូលបត្រនេះដែរថា វាជារឿងមួយល្អណាស់សម្រាប់សហគ្រាស ក្នុងការចូលទៅកាន់ផ្សារហ៊ុន ព្រោះថា អាជីវកម្មខ្នាតតូចនិងមធ្យមភាគច្រើន គឺតែងប្រឈមនឹងកង្វះខាតដើមទុនក្នុងការពង្រីកអាជីវកម្ម ដូច្នេះប្រសិនបើម្ចាស់អាជីវកម្មគួរតែមានការរៀបចំខ្លួនពីឥឡូវតទៅ ដើម្បីទទួលបានឱកាសដ៏ល្អនេះ។
សូមបញ្ជាក់ដែរថា គិតមកទល់ពេលនេះ ទីផ្សារមូលបត្រកម្ពុជាបានបើកឲ្យដំណើរការបោះផ្សាយ និងជួញដូរជាផ្លូវការលើឧបករណ៍ហិរញ្ញវត្ថុសំខាន់ៗចំនួន៣ គឺមូលបត្រកម្មសិទ្ធិ ឬភាគហ៊ុន ឧបករណ៍និស្សន្ទ និងសញ្ញាបណ្ណសាជីវកម្ម ដែលបទប្បញ្ញត្តិទើបតែត្រូវបានអនុម័តកាលពីពេលថ្មីៗនេះ៕
