អ្នកជំនាញនៅក្នុងវិស័យមូលបត្រកម្ពុជា បានបញ្ជាក់អះអាងថា ការប្រែប្រួលឡើងចុះ នៃសន្ទស្សន៍ទីផ្សាររបស់ ផ្សារមូលបត្រកម្ពុជា គឺជាយន្តការទីផ្សារជាធម្មតានោះទេ ពោលគឺ វាតែងតែប្រែប្រួលទៅតាមសកម្មភាពទិញលក់ និងតម្លៃភាគហ៊ុន មុននឹងឈានទៅរកចំណុចលំនឹងមួយ ដែលសន្ទស្សន៍ទីផ្សារស្ថិតនៅកម្រិតមួយថេរក្នុងរយៈពេលយូរ។
ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានគូសបញ្ជាក់ថា សន្ទស្សន៍ទីផ្សារ មានការកើនឡើង នៅពេលដែលមានចំនួនអ្នកទិញហ៊ុនច្រើនជាង អ្នកលក់ ដោយសារថ្លៃហ៊ុនកើនឡើងខ្ពស់ ហើយវានឹងធ្លាក់ចុះមកវិញ នៅពេលដែលមានអ្នកលក់ហ៊ុន ច្រើនជាងអ្នកទិញ។
អត្ថបទទាក់ទង!
ជាក់ស្តែង វត្តមានរបស់ធនាគារអេស៊ីលីដា នៅលើផ្សារភាគហ៊ុនដំបូង បានទាក់ទាញចំនួនវិនិយោគិនថ្មីៗជាច្រើន ដែលបានជំរុញឲ្យសន្ទស្សន៍ផ្សារមូលបត្រកម្ពុជា កើនឡើងពីក្រោម ៧០០ពិន្ទុ រហូតដល់ជាង ៨២៦ពិន្ទុ នៅថ្ងៃ២៩ ខែឧសភា ដែលពិន្ទុនេះ ជាពិន្ទុខ្ពស់បំផុតចាប់ពីដើមឆ្នាំ ២០២០មក។ នៅថ្ងៃទី ២៩ ឧសភា ភាគហ៊ុនធនាគារអេស៊ីលីដាឡើងខ្ពស់បំផុត តម្លៃ២២.៦០០រៀល ក្នុងមួយហ៊ុន រួចក៏បានធ្លាក់ចុះវិញបន្តិចម្តងៗ រហូតដល់ថ្ងៃទី ២៣ មិថុនា តម្លៃភាគហ៊ុនធនាគារអេស៊ីលីដា មានតម្លៃ ១៨.១៨០ រៀលក្នុង១ហ៊ុន។
ឯកឧត្តម ហុង សុហួរ ពន្យល់បន្ថែមថា សន្ទស្សន៍ទីផ្សារអាចនឹងប្រែប្រួលទៀត នៅពេលដែលសកម្មភាពសេដ្ឋកិច្ច សកម្មភាពអាជីវកម្ម និងស្ថានភាពហិរញ្ញវត្ថុក្រុមហ៊ុនដែលបានចុះបញ្ជី មានការប្រែប្រួល ដែលអាចជំរុញឲ្យថ្លៃភាគហ៊ុនកើនឡើង ឬថយចុះ។
ដោយឡែក នាពេលបច្ចុប្បន្ន យើងអាចសង្កេតឃើញថា ការប្រែប្រួលនៃសន្ទស្សន៍ទីផ្សារមូលបត្រ គឺមានទំនាក់ទំនងជិតស្និទ្ធជាមួយនឹង សកម្មភាពជួញដូរ និងថ្លៃភាគហ៊ុនរបស់ធនាគារអេស៊ីលីដា គឺដោយសារតែអេស៊ីលីដា មានទំហំមូលធនូបនីយកម្ម ធំជាងគេ ក្នុងចំណោមក្រុមហ៊ុនចុះបញ្ជីនៅលើទីផ្សារមូលបត្រកម្ពុជា ដែលជះឥទ្ធិពលដល់ មធ្យមភាគនៃតម្លៃភាគហ៊ុនសរុបនៅលើទីផ្សារមូលបត្រ។
តែយ៉ាងណា នៅពេលដែលមានក្រុមហ៊ុនថ្មីៗ ចុះបញ្ជីកាន់តែច្រើន នាពេលខាងមុខ ឥទ្ធិពលនៃការប្រែប្រួលរបស់ភាគហ៊ុនអេស៊ីលីដា មកលើសន្ទស្សន៍ទីផ្សារទាំងមូល នឹងពុំសូវមានទំហំធំទៀតឡើយ។
គួរជម្រាបដែរថា ជាការទាក់ទាញថ្មីមួយ សម្រាប់វិស័យមូលបត្រកម្ពុជា គណៈកម្មាការមូលបត្រកម្ពុជា បានចាប់ផ្តើមធ្វើតេស្តសាកល្បង ប្រព័ន្ធផ្តល់លេខអត្តសញ្ញាណវិនិយោគិនតាមអនឡាញ ដើម្បីបង្កើននូវប្រសិទ្ធិភាពខ្ពស់ ដោយវិនិយោគិនអាចដាក់ពាក្យស្នើសុំដោយខ្លួនឯងផ្ទាល់ កាន់តែឆាប់រហ័ស និងងាយស្រួល៕
None
