នាពិធីបិទស្ទឹងសាងសង់ទំនប់វារីអគ្គិសនីនៅស្ទឹងតាតៃលើ នៅខេត្តកោះកុង កាលពីព្រឹកថ្ងៃទី៣០ វិច្ឆិកា សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចាត់ទុកការអភិវឌ្ឍន៍វិស័យរ៉ែ និងថាមពល នៅតែជាការងារអាទិភាពរបស់រាជរដ្ឋាភិបាល សម្រាប់អាណត្តិទី៧ តែការអភិវឌ្ឍត្រូវមានការគិតគូចំពោះបរិស្ថាន និងជីវចម្រុះ។
ជាក់ស្តែង ដើម្បីផលប្រយោជន៍របស់ប្រជាពលរដ្ឋនិងចៀសវាងផលប៉ះពាល់អវិជ្ជមានដល់បរិស្ថាន និងជីវចម្រុះ រដ្ឋាភិបាលអាណត្តិទី៧នេះ នឹងមិនសាងសង់ទំនប់វារីអគ្គិសនីតាមបណ្ដោយទន្លេមេគង្គនោះឡើយ។
បើទោះបីកិច្ចការអភិវឌ្ឍន៍វិស័យអគ្គិសនី ជាអាទិភាពមួយក្នុងចំណោមផែនការអាទិភាពចំនួន៥ផ្សេងទៀតរបស់រាជរដ្ឋាភិបាលអាណត្តិទី៧ក៏ដោយ តែរាជរដ្ឋាភិបាលក៏ត្រូវគិតគូចំពោះផលប៉ះពាល់នានាក្នុងតំបន់អភិវឌ្ឍន៍ផងដែរ។
សម្រាប់សម្តេច កម្ពុជាត្រូវមានសមត្ថភាពក្នុងការកសាងបណ្តាញ និងផ្គត់ផ្គង់អគ្គិសនីដោយខ្លួនឯង ដើម្បីចៀសវាងហានិភ័យណាមួយ ក្នុងករណីប្រទេសជិតខាងមានបញ្ហាលើបញ្ហាអគ្គិសនី។
អត្ថបទគួរអាន
ទន្ទឹមនឹងប្រកាន់ជំហរមិនធ្វើវារីអគ្គិសនីតាមបណ្ដោយទន្លេមេគង្គ សម្ដេចធិបតី ហ៊ុន ម៉ាណែត ក៏បានប្រកាសបញ្ឈប់គម្រោងអភិវឌ្ឍរោងចក្រផលិតអគ្គិសនីដុតធ្យូងថ្ម អានុភាព៧០០មេហ្គាវ៉ាត់ នៅស្រុកបុទុមសាគរ ខេត្តកោះកុង និងប្រកាសមិនឱ្យមានការផលិតអគ្គិសនីធ្យូងថ្ម តទៅទៀតនៅកម្ពុជាផងដែរ។
ក្រោយការប្រកាសផ្អាក សម្តេច ក៏បានបញ្ជាឱ្យក្រសួងរ៉ែ និងថាមពល ពិភាក្សាជាមួយក្រុមហ៊ុនវិនិយោគពិនិត្យលទ្ធភាពប្តូរគម្រោងវិនិយោគផលិតអគ្គិសនីដុតធ្យូងថ្មនេះទៅជាគម្រោងផលិតអគ្គិសនីដុតឧស្ម័ន LNG ដែលបំភាយឧស្ម័នកាបូនតិចតួចវិញផងដែរ។ ជាមួយគ្នានេះ សម្តេចធិបតី បានឱ្យក្រសួងរ៉ែ និងថាមពល ពិនិត្យលទ្ធភាពដាក់ឱ្យរោងចក្រផលិតអគ្គិសនីដុតធ្យូងថ្ម ដែលមានស្រាប់បញ្ឈប់ដំណើរការមុនកាលកំណត់។
សូមបញ្ជាក់ថា ការជំរុញការអភិវឌ្ឍវិស័យថាមពលអគ្គិសនី ឲ្យបានរីកចម្រើន និងត្រឹមត្រូវ ដើម្បីឈានទៅសម្រេចបានការផ្គត់ផ្គង់ថាមពលមួយគ្រប់គ្រាន់ប្រកបដោយចីរភាព ស្ថិរភាព គុណភាព និងមានថ្លៃកាន់តែសមរម្យនៅគ្រប់ទីកន្លែងទូទាំងព្រះរាជាណាចក្រកម្ពុជា គឺជាគន្លឹះដ៏សំខាន់ក្នុងការជួយជំរុញកំណើនសេដ្ឋកិច្ច ប្រកបដោយចីរភាព និងជួយបង្កើនសុខដុមនីយភាពនៃការរស់នៅរបស់ប្រជាពលរដ្ឋ។
ថាមពលអគ្គិសនីមិនមែនត្រឹមតែជាផលិតផលមួយ ដែលត្រូវការសម្រាប់បម្រើជីវភាពរស់នៅរបស់ប្រជាពលរដ្ឋប៉ុណ្ណោះទេ ប៉ុន្តែវាក៏ជាផលិតផលចាំបាច់ សម្រាប់ជំរុញការអភិវឌ្ឍវិស័យឧស្សាហកម្ម ពាណិជ្ជកម្ម កសិកម្ម ទេសចរណ៍ និងវិស័យផ្សេងៗទៀតផងដែរ៕
None
