កូរ៉េខាងត្បូង និងជប៉ុនព្រមព្រៀងគ្នាចាប់ផ្ដើម «បើកទំព័រថ្មីនៃទំនាក់ទំនងទ្វេភាគី»

ជំនួបកំពូលរវាងលោក យុន ស៊ុក យុល របស់កូរ៉េខាងត្បូង និងលោក ហ្វូមីអូ គីស៊ីដា នាយករដ្ឋមន្ត្រីជប៉ុននៅទីក្រុងតូក្យូ ដែលជាដំណើរទស្សនកិច្ចលើកដំបូងរបស់ប្រធានាធិបតីកូរ៉េខាងត្បូងទៅប្រទេសជប៉ុនក្នុងរយៈពេល ១២ ឆ្នាំមកនេះ បានគូសបញ្ជាក់ពីរបៀបដែល សម្ព័ន្ធមិត្តរបស់អាមេរិកទាំង២នេះត្រូវរ៉ូវគ្នានេះ គឺដោយសារតែការបាញ់មីស៊ីលជារឿយៗរបស់កូរ៉េខាងជើង និងក្ដីកង្វល់កាន់តែខ្លាំងឡើង ចំពោះការដំឡើងសាច់ដុំរបស់ប្រទេសចិនកាន់តែខ្លាំងនៅលើឆាកអន្តរជាតិ។
រដ្ឋាភិបាលក្រុងវ៉ាស៊ីនតោនបានសាទរចំពោះកិច្ចប្រជុំកំពូលនេះដោយហៅប្រទេសជប៉ុន និងកូរ៉េខាងត្បូងថាជា«សម្ព័ន្ធមិត្តដែលមិនអាចខ្វះបាន»។
អ្នកនាំពាក្យក្រសួងការបរទេសអាមេរិកបាននិយាយថា ទំនាក់ទំនងកាន់តែប្រសើរឡើងរវាងទីក្រុងសេអ៊ូល និងតូក្យូនេះនឹងជួយឱ្យអាមេរិកចាប់យកឱកាសត្រីភាគីដើម្បីជំរុញអាទិភាពក្នុងតំបន់ និងអន្តរជាតិរួមរបស់ពួកគេរួមទាំងចក្ខុវិស័យរួមគ្នា សម្រាប់ឥណ្ឌូប៉ាស៊ីហ្វិកសេរី និងបើកចំហផងដែរ។
ភាពតានតឹងនៃទីក្រុងសេអ៊ូល និងក្រុងតូក្យូ ត្រូវបានកាត់បន្ថយ ដោយមានកិច្ចខិតខំប្រឹងប្រែងដឹកនាំដោយសហរដ្ឋអាមេរិកជាយូរមកហើយ ក្នុងការបង្ហាញរណសិរ្សរួបរួមគ្នាប្រឆាំងប្រទេសចិន និងកូរ៉េខាងជើង។
លោក ហ៊ីដេគី អូគូហ្សូណូ (Hideki Okuzono) សាស្ត្រាចារ្យផ្នែកទំនាក់ទំនងអន្តរជាតិនៅសាកលវិទ្យាល័យ ស៊ីហ្សូអូកា (Shizuoka) បាននិយាយថា ការពិតដែលថា លោក Yoon បានសម្រេចចិត្តទៅទស្សនកិច្ចប្រទេសជប៉ុនផ្ទាល់សម្រាប់ជំនួបទ្វេភាគីដោយមិនធ្វើបែបនេះនៅខាងក្រៅកិច្ចប្រជុំអន្តរជាតិណាមួយនោះ គឺពិតជាគួរឱ្យសរសើរនិងចាត់ថាជា«ចំណុចរបត់មួយ»ដែលអាចធ្វើទៅបាន៕