ភ្លាមៗ ក្រោយពេលដែលបារាំង ប្រតិកម្មខ្លាំងៗ ទៅនឹងការលុបចោលកិច្ចសន្យាទិញនាវាមុជទឹករវាងខ្លួន ជាមួយប្រទេសអូស្ត្រាលី ក្រោយវត្តមានរបស់សម្ព័ន្ធមិត្ត AUKUS (មាន អាមេរិក អង់គ្លេសនិង អូស្ត្រាលី) នោះ គេសង្កេតឃើញថា ពុំទាន់មានប្រទេសណាមួយហ៊ាន ចេញមុខមកគាំទ្រជំហររបស់ប្រទេសបារាំង នៅក្នុងបញ្ហាដ៏ចម្រូងចម្រាស់នេះទេ ពោលគឺមានតែបារាំងម្នាក់ឯងគត់ដែលនៅតទល់ ប្រឈមមុខជាមួយអាមេរិក អូស្ត្រាលី និង អង់គ្លេស ដែលជាប្រទេសសម្ព័ន្ធមិត្ត AUKUS។ ប៉ុន្ដែនៅថ្ងៃចន្ទ ដើមសប្ដាហ៍នេះ រដ្ឋមន្ត្រីការបរទេសសហភាពអឺរ៉ុប បានចេញមកសម្តែងការគាំទ្រ និងសាមគ្គីភាពជាមួយប្រទេសបារាំង អំឡុងកិច្ចប្រជុំមួយនៅទីក្រុងញូវយ៉ក ដែលរៀបចំឡើង ដើម្បីពិភាក្សាពីបញ្ហា ដែលក្រុងកង់បេរ៉ា លុបចោលការបញ្ជាទិញនាវាមុជទឹកតម្លៃ ៤០ពាន់លានដុល្លារពីទីក្រុងប៉ារីស ហើយបែរទៅសហការ និង ទិញនាវាមុជទឹកពីអាមេរិកដែលជាប្រទេសសម្ព័ន្ធមិត្ត AUKUS ទៅវិញ។
តាមការរាយការណ៍ដោយទីភ្នាក់ងារព័ត៌មានរ៉យទ័របានឲ្យដឹងថា ស្របពេលដែលមេដឹកនាំពិភពលោកធំៗកំពុងមានវត្តមានក្នុងទីក្រុងញូវយ៉កស្រាប់ ដើម្បីត្រៀមចូលរួមកិច្ចប្រជុំមហាសន្និបាតលើកទី៧៦ នៃអង្គការសហប្រជាជាតិ មេដឹកនាំអឺរ៉ុបបានឆ្លៀតមកជួបពិភាក្សាគ្នាក្នុងកិច្ចប្រជុំបិទទ្វារមួយ កាលពីថ្ងៃច័ន្ទ។
លោក ចូសិប ប៊ូរ៉េល ប្រធានគោលនយោបាយសហភាពអឺរ៉ុបបាននិយាយនៅក្នុងកិច្ចប្រជុំថា៖ ដើម្បីធានាឲ្យបានពីស្ថិរភាព និងសន្តិភាព ក្នុងតំបន់ឥណ្ឌូប៉ាស៊ីហ្វិក ដែលចិនកំពុងបង្កើនឥទ្ធិពល យើងត្រូវមានកិច្ចសហប្រតិបត្តិការឲ្យល្អកាន់តែច្រើន ការសម្របសម្រួលគ្នាកាន់តែច្រើន ហើយកាត់បន្ថយការបែងចែកបក្សពួក។ លោក ចូ សិបបូរ៉េល បានថ្លែងប្រតិកម្មលើក្រុមសម្ព័ន្ធមិត្តថ្មី AUKUS ថាជាទង្វើមួយ គួរឲ្យភ្ញាក់ផ្អើល។
ដោយឡែក សម្រាប់ប្រធានក្រុមប្រឹក្សាអឺរ៉ុប លោក ឆាល មីឆែល(Charles Michel) បានចោទជាចង្ងល់ឡើងថា លោកពិតជាមិនយល់ពីអ្វីដែលអាមេរិក អូស្ត្រាលី និង អង់គ្លេសកំពុងធ្វើទាល់តែសោះនៅពេលនេះ។ លោក មីឆែល បានចោទជាសំណួរថា តើប្រទេសទាំងបីរួបរួមគ្នាដើម្បីអ្វី? ចង់បានអី? ទោះបីជាការរួបរួមនេះ គឺដើម្បីទប់ទល់នឹងប្រទេសចិន ប៉ុន្តែវាពិតជាចម្លែកខ្លាំងណាស់ដែលត្រូវមកធ្វើឲ្យប៉ះពាល់ដល់ប្រទេសបារាំងដែលជាសម្ព័ន្ធមិត្តចាក់ទឹកមិនលេចរបស់ខ្លួន ពិសេសសម្ព័ន្ធភាពអាត្លង់ទិច ឬហៅកាត់ថា NATO។
អត្ថបទទាក់ទង
ឥឡូវនេះភាពតានតឹងបានរាលដាលដល់បារាំងជាមួយអង់គ្លេសហើយ !
រដ្ឋមន្ត្រីការពារជាតិបារាំងលោកស្រី ហ្លូរ៉េន ផាលី(Florence Parly) នៅថ្ងៃអង្គារទី២១កញ្ញា នេះ បានសម្រេចលុបចោល ជំនួបពិភាក្សាជាមួយសមភាគី លោក បេន វ៉ាលេន (Ben Wallace) រដ្ឋមន្ត្រីការពារជាតិអង់គ្លេស ដែលគ្រោងនឹងធ្វើឡើងនៅក្នុងសប្តាហ៍នេះ។
ការសម្រេចលុបចោលនេះ មិនត្រូវបានបារាំងបញ្ជាក់ពីមូលហេតុនោះទេ ដោយគ្រាន់តែបានឲ្យដឹងថា ជំនួបរវាងភាគីទាំងពីរ និងត្រូវលើកពេលទៅថ្ងៃក្រោយ។ យ៉ាងណាមិញ នេះសបញញ្ជាក់ឲ្យឃើញពីការអាក់អន់ចិត្តរបស់បារាំងចំពោះអង់គ្លេស ដូចដែលបារាំងខឹងសម្បារទៅលើអូស្ត្រាលីដូច្នោះដែរ។
ដោយឡែក នាយករដ្ឋមន្ត្រីអង់គ្លេស លោក បូរីស ចនសុន ឯណោះវិញ បានព្យាយាមនិយាយកុំឲ្យបារាំងព្រួយបារម្ភពីកិច្ចព្រមព្រៀងថ្មីរវាងអូស្រា្តលី អង់គ្លេស និង អាមេរិក។ លោក ចនសុន បានគូសបញ្ជាក់ថា កិច្ចព្រមព្រៀងខាងលើ មិនមានបំណងទាត់បារាំងចេញពីតំបន់ឥណ្ឌូប៉ាស៊ីហ្វិកនោះទេ និង ថាកិច្ចព្រមព្រៀងសន្តិសុខត្រីភាគីនេះ មិនមែនជារឿងដែលគេគួរព្រួយបារម្ភនោះទេ ជាពិសេសសម្រាប់ប្រទេសសម្ព័ន្ធមិត្តដូចជាបារាំង។
សូមជម្រាបថា ប្រមុខរដ្ឋបារាំងលោកអេម៉ានុអេល ម៉ាក្រុង និង លោកចូ បៃដិន ប្រធានាធិបតីអាមេរិក នឹងនិយាយគ្នាតាមទូរសព្ទនៅប៉ុន្មានថ្ងៃទៀត ដូច្នេះតើអាមេរិកអាចដោះស្រាយទំនាក់ទំនងភាពតានតឹងដែលកំពុងមានជាមួយបារាំង បានឬក៏មិនបាន គេនឹងអាចទទួលបានចម្លើយឆាប់ៗនេះ៕
None
