ក្រសួងការបរទេសកម្ពុជាអះអាងថា ទោះបីស៊ុយអែតបិទការិយាល័យស្ថានទូតនៅភ្នំពេញ តែស្ថានកុងស៊ុលនៅតែបន្តដំណើរការ

បើតាមការគូសបញ្ជាក់របស់អ្នកនាំពាក្យក្រសួងការបរទេស កាលពីខែមីនា ឆ្នាំ២០២៤ ក្រសួងការបរទេសស៊ុយអែត បានជូនដំណឹងអំពីការបិទការិយាល័យស្ថានទូតស៊ុយអែតនៅភ្នំពេញ ចាប់ពីថ្ងៃទី៣០ ខែកញ្ញា ឆ្នាំ២០២៤ និងបានបញ្ជាក់ថា រដ្ឋាភិបាលស៊ុយអែតបានសម្រេចបែបនេះ ក្រោមហេតុផលនៃការរៀបចំឡើងវិញនៅចំណុចអាទិភាព ដោយសារត្រូវផ្ដល់អាទិភាពលើការអភិវឌ្ឍន៍ សេដ្ឋកិច្ចសន្តិភាព និងសន្តិសុខនៅតំបន់ជិតខាងខ្លួន ដើម្បីឆ្លើយតបនឹងការប្រែប្រួលបរិបទពិភពលោកបន្ទាប់ពីការផ្ទុះសង្គ្រាមរុស្ស៊ី-អ៊ុយក្រែន។

ទន្ទឹមនេះ តាមការបញ្ជាក់របស់ស្ថានទូតស៊ុយអែតនៅទីក្រុងបាងកក បន្ទាប់ពីការបិទការិយាល័យស្ថានទូតស៊ុយអែតនៅភ្នំពេញនៅថ្ងៃទី៣០ ខែកញ្ញា ឆ្នាំ២០២៤ ស្ថានទូតស៊ុយអែតនៅទីក្រុងបាងកក នឹងបន្តតំណាងឱ្យស៊ុយអែតក្នុងទំនាក់ទំនងជាមួយកម្ពុជា ហើយស្ថានកុងស៊ុលរបស់ស៊ុយអែតនៅភ្នំពេញ នឹងនៅតែបើកទ្វារដើម្បីបន្តផ្តល់សេវាកុងស៊ុលដល់ពលរដ្ឋស៊ុយអែតនៅកម្ពុជា។ ជាមួយគ្នានេះក្រសួងការបរទេស បានប្រកាសទាត់ចោលនូវរាល់ការប៉ុនប៉ងធ្វើការបកស្រាយលើករណីការបិទការិយាល័យស្ថានទូតស៊ុយអែតនៅភ្នំពេញ សម្រាប់បម្រើឱ្យគោលដៅនយោបាយ៕

អត្ថបទ សោម ស្រីពេជ្រ និងរូបភាពឯកសារ