បុត្រសម្ព័ន្ធធនាគារស្វីសមួយប្រកាសខ្ចីមូលនិធិ៥៤ពាន់លានដុល្លារពីធនាគារកណ្តាលដើម្បីធានានិរន្តភាព និងការពារវិបត្តិដែលអាចកើតមាន

បើតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័របានឲ្យដឹងថា ស្ថាប័នហិរញ្ញវត្ថុ ក្រេឌីត ស្វីស បានដាក់សំណើមូលនិធិនៅថ្ងៃទី ១៦ ខែ មីនា ឆ្នាំ២០២៣ នៅក្នុងគោលបំណង ដើម្បីបង្កើនសាច់ប្រាក់ងាយស្រួល និងទំនុកចិត្តរបស់អ្នកវិនិយោគ បន្ទាប់ពីការធ្លាក់ចុះនៃភាគហ៊ុនរបស់ខ្លួន បានធ្វើឱ្យមានការភ័យខ្លាចកាន់តែខ្លាំងអំពីវិបត្តិហិរញ្ញវត្ថុពិភពលោក ពោលគឺ នៅក្រោយពេលដែលមើលឃើញពីស្រមោលខ្មៅនៃការដួលរលំរបស់ធនាគារ SVB របស់អាមេរិកតែម្តង។

ធនាគារ ក្រេឌីត ស្វីស (Credit Suisse) បានប្រកាសថា ខ្លួននឹងអនុវត្តជម្រើសក្នុងការខ្ចីប្រាក់ពីធនាគារកណ្តាលស្វីសនៅក្នុងទឹកប្រាក់ប្រមាណជា ៥៤ ពាន់លានដុល្លារ។

សូមជម្រាបថា បន្ទាប់ពីការដួលរលំរបស់ធនាគារធំៗនៅអាមេរិក ដូចជា ធនាគារ Signature Bank និង ធនាគារ Silicon Valley Bankរួចមក ធនាគារ Credit Suisse ត្រូវបានគេមើលឃើញថា ទំនងក្លាយជាធនាគារលំដាប់ពិភពលោកមួយដំបូងគេ ដែលស្នើសុំកញ្ចប់មូលនិធិបែបនេះពីធនាគាកណ្តាលរបស់ស្វីស ចាប់តាំងពីវិបត្តិហិរញ្ញវត្ថុឆ្នាំ ២០០៨មក។

ក្រោយពេលដែលធនាគារ Credit Suisse បានប្រកាសពីសកម្មភាពនេះ ស្ថានភាពទីផ្សារហ៊ុនរបស់ធនាគារ នៅអាស៊ី ហាក់មានលំនឹងឡើងវិញបន្តិច ក្រោយពេលដែល រលកនៃការធ្លាក់ចុះ បានកើតមានឡើង កាលពីថ្ងៃទី១៥មីនាកន្លងទៅ ។

ពាក់ព័ន្ធទៅនឹងការស្នើមូលនិធិនេះ ធនាគារកណ្តាលស្វីសបានប្រកាសរួចរាល់ហើយថា ខ្លួននឹងពិចារណាផ្តល់ការគាំទ្រដល់ ធនាគារ Credit Suisse ប្រសិនបើចាំបាច់ ដើម្បីធានាទំនុកចិត្តលើប្រព័ន្ធធនាគារ ដែលទទួលប្រាក់បញ្ញើកម្រិតពិភពលោក៕

អត្ដបទ​​ ៖ សរ សុជាតិ