ក្រុមអ្នកវិភាគសេដ្ឋកិច្ចថា កញ្ចប់វិធានការសង្គ្រោះរបស់ចិន មិនគ្រប់គ្រាន់ក្នុងការបញ្ចប់វិបត្តិលំនៅឋានបានឡើយ
វិស័យអចលនទ្រព្យ ជាពិសេសផ្នែកលំនៅឋានក្នុងប្រទេសចិន បានសំយ៉ុងក្បាលចុះយ៉ាងខ្លាំង និងបានជាប់ផុងក្នុងវិបត្តិជិត៣ឆ្នាំមកហើយ ហើយដើម្បីស្រោចស្រង់…
លោក ឡៃ ជិងតេ ដែលបានកាន់តំណែងជាអនុប្រធានាធិបតីកោះតៃវ៉ាន់ អស់រយៈពេល៤ឆ្នាំ បានស្បថចូលកាន់តំណែងជាប្រធានាធិបតី នៅថ្ងៃចន្ទ សប្តាហ៍នេះ ក្រោយឈ្នះការបោះឆ្នោតកាលពីខែមករា ដើម្បីបន្តទស្សនវិស័យឆ្ពោះទៅរកឯករាជ្យភាពស្រដៀងគ្នានឹងលោកស្រី សៃ អ៊ីងវេន ដែលទើបបញ្ចប់អាណត្តិដឹកនាំកាលពីពេលថ្មីៗ។
ពិធីស្បថចូលកាន់តំណែងនេះ បានរៀបចំឡើងនៅការិយាល័យប្រធានាធិបតី ដែលជាអគារចំណាស់សម័យអាណានិគមជប៉ុន នៅកណ្តាលទីក្រុងតៃប៉ិ ហើយលោកបានអំពាវនាវដល់ប្រទេសចិន ឱ្យបញ្ឈប់ការគំរាមកំហែងផ្នែកនយោបាយ និងយោធាមកលើកោះតៃវ៉ាន់ ពង្រឹងការចែករំលែកជាមួយតៃវ៉ាន់ នូវការទទួលខុសត្រូវជាសកលក្នុងការរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ ជាពិសេសគឺធានាឱ្យពិភពលោករួចផុតពីការភ័យខ្លាចនៃសង្គ្រាម។
លោកសង្ឃឹមថា ចិននឹងហ៊ានប្រឈមមុខនឹងការពិតនៅកោះតៃវ៉ាន់ គោរពជម្រើសរបស់ប្រជាជនតៃវ៉ាន់ដោយស្មោះត្រង់ ជ្រើសរើសការសន្ទនា ហ៊ានប្រឈមមុខដាក់គ្នាក្រោមគោលការណ៍ស្មើភាព និងថ្លៃថ្នូរ និងលើកកម្ពស់កិច្ចសហប្រតិបត្តិការជាមួយរដ្ឋាភិបាលស្របច្បាប់ ដែលប្រជាជនតៃវ៉ាន់ បានបោះឆ្នោតជ្រើសរើស។
ក្រសួងការពារជាតិ តៃវ៉ាន់ បានអះអាងថា នៅមុនរយៈពេល២៤ម៉ោងនៃពិធីស្បថចូលកាន់តំណែងរបស់លោក ឡៃ មានយន្តហោះចំបាំងរបស់ចិន ចំនួន៦គ្រឿង បានឆ្លងកាត់ខ្សែបន្ទាត់ក្រហមរបស់តៃវ៉ាន់ ប៉ុន្តែចិន មិនទទួលស្គាល់ចំពោះការលើកឡើងនេះនោះទេ។
ពាក់ព័ន្ធនឹងបញ្ហាតៃវ៉ាន់នេះ កាសែត Global Times បានបញ្ចេញនូវបទវិចារណកថាមួយថា លោក ឡៃ អាចនឹងក្លាយទៅជាមេដឹកនាំដែលមានចរិត «ញុះញង់កាន់តែខ្លាំង» នៅពេលលោកចូលកាន់តំណែង ប៉ុន្តែចិននឹងពុះពារបន្តការពារគោលនយោបាយចិនតែមួយ៕
ដោយៈ សរ សុជាតិ
None
