ចំណូលពីការប្រមូលពន្ធនៅឆ្នាំ២០១៧ មានប្រមាណជាង ៧៧០០ ពាន់លានរៀល ដែលស្មើនឹងជាង១ពាន់៩០០លានដុល្លារអាមេរិក ខណៈដែលកាលពីឆ្នាំ២០១៦ ប្រមូលពន្ធបានប្រមាណ ១ពាន់៤០០លានដុល្លារអាមេរិកប៉ុណ្ណោះ។
តាមរបាយការណ៍បានគូសបញ្ជាក់ថា លទ្ធផលនេះ គឺសម្រេចបានដោយមានការគាំទ្រពីប្រមុខរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ និងកិច្ចខិតខំប្រឹងប្រែងអនុវត្តយ៉ាងហ្មត់ចត់ នូវយុទ្ធសាស្ត្រកៀរគរចំណូលរយៈពេលមធ្យម ឆ្នាំ២០១៤-២០១៨ ព្រមទាំងការចូលរួមរបស់សហគ្រាសជាអ្នកជាប់ពន្ធផងដែរ។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជា អគ្គនាយក នៃអគ្គនាយកដ្ឋានពន្ធដារ បានគូសបញ្ជាក់ដែរថា ឆ្នាំ២០១៨ នេះ គឺជាឆ្នាំចុងក្រោយហើយ សម្រាប់ការអនុវត្ត នូវយុទ្ធសាស្ត្រកៀរគរចំណូលរយៈពេលមធ្យម ឆ្នាំ២០១៤-២០១៨ ដែលអគ្គនាយកដ្ឋានពន្ធដារនៅបន្តពង្រឹងយ៉ាងខ្ជាប់ខ្ជួន នូវមុខងាររដ្ឋបាលសំខាន់ៗផ្សេងទៀត។ ក្នុងនោះដែរ អគ្គនាយកដ្ឋានពន្ធដារ ក៏បានដាក់ឲ្យដំណើរការ ការដាក់លិខិតប្រកាស និងបង់ប្រាក់ពន្ធតាមប្រព័ន្ធអេឡិចត្រូនិក (E-Payment) ដើម្បីសម្រួលដល់អ្នកមានកាត្វកិច្ចបង់ពន្ធឲ្យកាន់តែមានភាពងាយស្រួលថែមទៀត។
រូបដ្យាក្រាម នៃរបាយការណ៍ស្ដីពីការប្រមូលពន្ធ របស់អគ្គនាយដ្ឋានពន្ធដារ
អត្ថបទគួរអាន!
លើសពីនេះទៀត អគ្គនាយកដ្ឋានពន្ធដារ ក៏គ្រោងនឹងដាក់ឲ្យដំណើរការនូវការដាក់លិខិតប្រកាស តាមប្រព័ន្ធអេឡិចត្រូនិក E-Filing ឆាប់ៗនេះផងដែរ។
យ៉ាងណាក៏ដោយចុះ តាមការត្រួតពិនិត្យរបស់អគ្គនាយកដ្ឋានពន្ធដារ ឃើញថា ការបង់ពន្ធរបស់ម្ចាស់សហគ្រាសមួយចំនួន នៅតែមានសភាពយឺតយ៉ាវ។ អគ្គនាយកដ្ឋានពន្ធដារ ក៏បានក្រើនរំលឹកផងដែរ ដល់អ្នកមានកាត្វកិច្ចបង់ពន្ធទាំងអស់ ត្រូវបំពេញកាត្វកិច្ចសារពើពន្ធរបស់ខ្លួន ដោយបង់ប្រាក់ពន្ធជូនរដ្ឋតាមច្បាប់កំណត់ ដើម្បីជៀសវាងការពិន័យ ទោសទណ្ឌនានា នៅពេលដែលរដ្ឋបាលសារពើពន្ធរកឃើញនូវកំហុសនានា ពេលចុះធ្វើសវនកម្ម៕
None
