កម្ពុជា ទទួលបានចំណូលពន្ធអាករលើតម្លៃបន្ថែមជាង ២០លានដុល្លារក្នុងមួយឆ្នាំ ពីក្រុមហ៊ុនមេរបស់ហ្វេសប៊ុក

និន្នាការប្រើប្រាស់កម្មវិធីបណ្ដាញសង្គម Facebook របស់ក្រុមហ៊ុន META ពីសំណាក់ប្រជាពលរដ្ឋខ្មែរបានក្លាយជាបរិបទថ្មីនៃជំនាន់ឌីជីថល ខណៈកម្មវិធីដ៏ពេញនិយមនេះ ត្រូវបានអ្នកប្រើប្រាស់ទាញយកធ្វើជាប្រយោជន៍សម្រាប់ការផ្សព្វផ្សាយ និងធ្វើអាជីវកម្ម ហើយរដ្ឋាភិបាលក៏ទាញបានចំណូលអាករលើតម្លៃបន្ថែមចំនួនជាង ៣៤លានដុល្លារ គិតក្នុងឆ្នាំ២០២២ មកទល់ជាងពាក់កណ្ដាលឆ្នាំ២០២៣នេះ។
យោងតាមទិន្នន័យដែលបង្ហាញដោយ សម្ដេចតេជោ ហ៊ុន សែន អតីតនាយករដ្ឋមន្រ្តីកម្ពុជា បានឱ្យដឹងនៅថ្ងៃទី៣ ខែកញ្ញា ឆ្នាំ២០២៣នេះថា រាជរដ្ឋាភិបាល ទទួលបានចំណូលអាករលើតម្លៃបន្ថែមចំនួន១០% ពីក្រុមហ៊ុន META ( Facebook )។
តាមទិន្នន័យដដែលបានបង្ហាញទៀតថា កាលពីឆ្នាំ២០២២ ចំណូលអាករលើតម្លៃបន្ថែម ដែលកម្ពុជាទទួលបានពីក្រុមហ៊ុន META ( Facebook )មានចំនួនជាង២០លានដុល្លារ ហើយនៅគិតមកទល់ជាងពាក់កណ្ដាលឆ្នាំ២០២៣នេះ ទទួលបានចំណូលអាករលើតម្លៃបន្ថែមចំនួនជាង១៣លានដុល្លារផងដែរ។

សម្ដេចតេជោ ហ៊ុន សែន អតីតនាយករដ្ឋមន្រ្តីកម្ពុជា បានសង្ឃឹមថា ក្រុមហ៊ុន META ( Facebook ) នឹងទទួលបានប្រាក់ចំណេញលើស២០០លានដុល្លារ ក្នុងមួយឆ្នាំនៅកម្ពុជា ឯរាជរដ្ឋាភិបាលទទួលបាន១០% ដែលមានទឹកប្រាក់លើស២០លានដុល្លារក្នុងមួយឆ្នាំ។
ជាមួយគ្នានេះ អតីតនាយករដ្ឋមន្រ្តីកម្ពុជា បានប្រកាសប្រាប់អ្នកគាំទ្រថា សម្ដេចសម្រេចប្រើប្រាស់កម្មវិធី Facebook ឡើងវិញ គួបផ្សំជាមួយ twitter,YouTube,TikTok,Telegram ,Instagram បន្ទាប់ពីក្រុមហ៊ុន Facebook ទាត់ចោលអនុសាសន៍របស់ក្រុមមនុស្សខូច និងផ្តល់យុត្តិធម៌ដល់សម្ដេច ដោយមិនបានដាក់ពិន័យលើផេកហ្វេសប៊ុកផ្លូវការរបស់សម្តេច។ សម្តេចតេជោ ក៏សង្ឃឹមថា Facebook នឹងប្រកាន់ខ្ជាប់នូវក្រមសីលធម៍ផងដែរ។
តាមទិន្នន័យពីគេហទំព័រ napoleoncat.com បានឱ្យដឹងថា ត្រឹមខែឧសភា ឆ្នាំ២០២៣ អ្នកប្រើប្រាស់កម្មវិធី Facebook នៅកម្ពុជា មានចំនួន១៣លាននាក់ ក្នុងនោះមាន ៥៤.៤% ជាបុរស និងក្រុមមនុស្សដែលប្រើធំបំផុត គឺមានអាយុចន្លោះពី ២៥-៣៤ ឆ្នាំ៕

អត្ថបទ ៖ បូ ដូឡា