![ពន្ធដារធ្លាក់ចំណូល](https://cdn.cambonomist.com/media/images/GGG20224.2e16d0ba.fill-960x540.jpg)
ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានគូសបញ្ជាក់ថា នៅឆមាសទី១ ឆ្នាំ២០២៤នេះ ការប្រមូលចំណូលរបស់អគ្គនាយកដ្ឋានពន្ធដារសម្រេចបានជាង១ពាន់៩រយលានដុល្លារ ស្មើនឹងជាង៤៦% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២៤។ តួលេខចំណូលនេះមានការធ្លាក់ចុះជាង១៥០លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។
ជាមួយគ្នានេះ ឯកឧត្តម មាស សុខសេនសាន រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុបានចាត់ទុកការធ្លាក់ចុះប្រាក់ចំណូលរបស់អគ្គនាយកដ្ឋានពន្ធដារ គឺជាសញ្ញាមួយដែលភាគីពាក់ព័ន្ធត្រូវពិនិត្យ និងតាមដានបន្ថែមទៀត ព្រោះការប្រមូលចំណូលពន្ធដារនៅឆ្នាំនេះហាក់មិនសូវទទួលបានលទ្ធផលល្អដូចទៅឆ្នាំមុនៗនោះទេ។ យ៉ាងណាក៏ដោយ ឯកឧត្តម មិនទាន់អាចវាយតម្លៃបានទេថា ការធ្លាក់ចុះប្រាក់ចំណូលរបស់អគ្គនាយកដ្ឋានពន្ធដារនេះ អាចនឹងធ្វើឱ្យប៉ះពាល់ដល់ផែនការចំណាយរបស់រាជរដ្ឋាភិបាលនៅក្នុងឆ្នាំ២០២៤នេះ ឬយ៉ាងណានោះទេ ដ្បិតថាការប្រមូលចំណូលនៅក្នុងខែនីមួយៗទទួលបានលទ្ធផលខុសៗគ្នា។
ជាមួយគ្នានេះ ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានវាយតម្លៃថា លទ្ធផលនៃការប្រមូលចំណូលពន្ធរបស់អគ្គនាយកដ្ឋានពន្ធដារនៅឆមាសទី១នេះ គឺជាកិច្ចខិតខំប្រឹងប្រែងរបស់ថ្នាក់ដឹកនាំ និងការចូលរួមចំណែកបំពេញភារកិច្ចអស់ពីកម្លាំងកាយចិត្តរបស់អគ្គនាយកដា្ឋនពន្ធដារ ទោះបីជាស្ថិតក្នុងសភាពការណ៍លំបាក ប្រឈមនឹងហានិភ័យ និងភាពមិនប្រាកដប្រជានៃស្ថានភាពសេដ្ឋកិច្ច និងនយោបាយសកលយ៉ាងណាក៏ដោយ។ គួរជម្រាបថា អគ្គនាយកដ្ឋានពន្ធដារ មានបេសកកម្មក្នុងការប្រមូលចំណូលពន្ធប្រមាណជាង៤ពាន់លានដុល្លារនៅក្នុងឆ្នាំ២០២៤នេះ៕
អត្ថបទ សោម ស្រីពេជ្រ និងរូបភាពឯកសារ