ក្រុមកម្លាំងការពារប្រយុទ្ធប្រឆាំងនឹងមេរោគកូវីដ-១៩ របស់ប្រទេសថៃ បានគូសបញ្ជាក់ថា ការបន្ធូរបន្ថយនេះ គឺធ្វើឡើងក្រោយពេលដែលករណីឆ្លងថ្មី ចាប់ផ្តើមធ្លាក់ចុះជារៀងរាល់ថ្ងៃ តែយ៉ាងណាក៏ដោយ សហគ្រាស និងអាជីវកម្ម ដែលទទួលបានការអនុញ្ញាតឲ្យបើកឡើងវិញ គឺនៅតែស្ថិតក្រោមការណែនាំយ៉ាងជាក់លាក់អំពី បញ្ហាសុខភាព អនាម័យ ដើម្បីបង្ការការពារ ការឆ្លងមេរោគកូវីដ១៩។
ដូចគ្នានេះដែរ ប្រជាពលរដ្ឋថៃ ដែលចេញទៅកម្សាន្ត នៅតាមសួនសាធារណៈ ឬចូលហាងអាជីវកម្មនានា ចាំបាច់ត្រូវតែ ពាក់ម៉ាស់ការពារ លាងសម្អាតដៃ និងត្រូវបានវាស់កម្តៅជានិច្ច មុននឹងទទួលបានការអនុញ្ញាតឲ្យចូល។
ភោជនីយដ្ឋានជាច្រើន ត្រូវតែរៀបចំ តុទទួលភ្ញៀវឡើងវិញ និងធ្វើរណាំងបាំងបិទ ដើម្បីរក្សាគម្លាតសង្គម ហើយតុមួយ គឺ សម្រាប់បម្រើ ភ្ញៀវ តែម្នាក់ប៉ុណ្ណោះ។
យ៉ាងណាមិញ ការសម្រួលដល់ការរឹតបន្តឹងនេះ នឹងត្រូវបានពិនិត្យឡើងវិញ ក្នុងរយៈពេល ១៤ថ្ងៃក្រោយ មុននឹងឈានដល់ ការកែប្រែ និងសម្រេចការបន្ធូរបន្ថយដំណាក់កាលទី ២។
អត្ថបទគួរអាន
ផ្ទុយទៅវិញ បើសិនជា មានករណីឆ្លង ផ្ទុះឡើងក្នុងអំឡុងពេល ១៤ថ្ងៃនេះ រាជរដ្ឋាភិបាលថៃ ក៏អាចដាក់ចេញនូវ វិធានការទប់ស្កាត់សំខាន់ៗ ភ្លាមៗ ហើយអាចនឹងរឹតបន្តឹងម្តងទៀតដែរ។
គិតត្រឹមថ្ងៃទី ៥ ខែ ឧសភា នេះ ករណីឆ្លងមេរោគកូវីដ១៩ នៅក្នុងប្រទេសថៃ បានកើនដល់ជិត ៣ពាន់នាក់ ខណៈអ្នកជាសះស្បើយ មានជាង ២ពាន់ ៧រយនាក់ តែយ៉ាងណា រាជរដ្ឋាភិបាលថៃ នៅតែបន្តត្រួតពិនិត្យ និងវាស់កម្តៅ សម្រាប់អ្នកដំណើរឆ្លងកាត់ខេត្តក្រុង ហើយចំពោះអ្នកដំណើរមកពី ខេត្តដែលកំពុងមានករណីឆ្លងខ្ពស់ ត្រូវធ្វើចត្តាឡីស័កផងដែរ៕
None
