ក្រុមហ៊ុន Amata បានចាប់ផ្ដើមអភិវឌ្ឍសាងសង់លើផ្ទៃប្រមាណ ៨០ហិកតា ក្នុងតំបន់ឧស្សាហកម្មចម្រុះ នៅក្រៅទីក្រុងយ៉ាំងហ្គន នៅក្នុងខែធ្នូ ប៉ុន្ដែ ការអភិវឌ្ឍ រួមទាំងរោងចក្រថាមពល នឹងត្រូវផ្អាកដំណើរការសិន។ នេះបើតាមការបញ្ជាក់របស់នាយកផ្នែកទីផ្សាររបស់ក្រុមហ៊ុន Amata។
ការប្រកាសរបស់ក្រុមហ៊ុនថៃខាងលើនេះ គឺជាសញ្ញាមួយនៃផលប៉ះពាល់ ដែលបណ្ដាលមកពីការធ្វើរដ្ឋប្រហារដោយយោធានៅក្នុងប្រទេសមីយ៉ាន់ម៉ា ដែលវាអាចនឹងធ្វើឲ្យសកម្មភាពអាជីវកម្មនឹងកាន់តែស្ងប់ស្ងាត់ថែមទៀត។
នាយកផ្នែកទីផ្សាររបស់ក្រុមហ៊ុនអភិវឌ្ឍន៍អចលនទ្រព្យរបស់ថៃដដែលនេះ បានគូសបញ្ជាក់ទៀតថា «យើង និងអតិថិជនរបស់យើងមានការព្រួយបារម្ភពីលទ្ធភាព នៃការធ្វើពហិការ ក៏ដូចជាដាក់ទណ្ឌកម្មពីប្រទេសលោកខាងលើលិចមើលមីយ៉ាន់ម៉ា»។ លោកបន្ថែមថា «ការដាក់ទណ្ឌកម្មនេះ វាទំនងជាអាចកើតឡើងមែន ពិសេសពីសហរដ្ឋអាមេរិក និងសហភាពអឺរ៉ុប។ ហើយបើវាពិតជាកើតឡើងមែននោះ ការវិនិយោគថ្មីៗនៅក្នុងប្រទេសមីយ៉ាន់ម៉ា ពិតប្រាកដណាស់នឹងរងផលប៉ះពាល់ធ្ងន់ធ្ងរ»។ ទោះយ៉ាងណា តំណាងក្រុមហ៊ុនថៃ Amata លើកឡើងថា ក្រុមហ៊ុនមិនមានជម្រើសអ្វីទេ ក្រៅតែពីការរង់ចាំមើល ពីស្ថានការវិវឌ្ឍបន្ដទៀត។អត្ថបទទាក់ទង!
មានប្រហែល ២០ក្រុមហ៊ុន ភាគច្រើន ជាមកពីជប៉ុន កំពុងចរចាទិញដីដែលអភិវឌ្ឍន៍ដោយក្រុមហ៊ុន Amata នៅក្នុងប្រទេសមីយ៉ាន់ម៉ានេះ ខណៈដែលក្រុមហ៊ុនថៃមួយនេះ អះអាងថា ខ្លួនបានចំណាយដើមទុនប្រមាណ ជិត៤លានដុល្លាររួចហើយដែរ សម្រាប់ការសាងសង់នៅគ្រាដំបូងនេះ។
មានក្រុមហ៊ុនអន្តរជាតិមួយចំនួនផ្សេងទៀត ក៏បានផ្អាកប្រតិបត្តិការរបស់ខ្លួនដែរ ដោយសារតែមានការធ្វើរដ្ឋប្រហារយោធាកើតឡើង ខណៈដែលផ្សារមូលបត្រនៅក្នុងប្រទេសមីយ៉ាន់ម៉ា ក៏មានការបង្អាក់ខកខានជួញដូរផងដែរ។
ក្រុមហ៊ុនជប៉ុន Suzuki Motor ដែលជាក្រុមហ៊ុនផលិតយានយន្ដដ៏ធំបង្អស់នៅក្នុងប្រទេសមីយ៉ាន់ម៉ា ក៏បានផ្អាកប្រតិបត្តិការនូវរោងចក្ររបស់ខ្លួនចំនួន២ផងដែរ កាលពីថ្ងៃអង្គារ ទី០២ កុម្ភៈកន្លងទៅនេះ ខណៈដែលកាលពីថ្ងៃចន្ទ ទី០១ កុម្ភៈ ក៏បានផ្អាកកន្លះថ្ងៃដែរ។
ក្រោយពីបានធ្វើរដ្ឋប្រហារ ប្រទេសមីយ៉ាន់ម៉ា នាថ្ងៃទី ០២ ខែកុម្ភៈ ក៏ត្រូវប្រកាសថា នឹងបិទព្រលានយន្ដហោះអន្តរជាតិទីក្រុងយ៉ាំងហ្គនផងដែរ ដោយការប្រកាសបិទនេះគឺរហូតដល់ថ្ងៃទី ៣០ ខែមេសា ប៉ុន្ដែ នៅប៉ុន្មានម៉ោងក្រោយមក ក៏មានការប្រកាសថា នឹងបើកដំណើរការឡើងវិញចាប់ពីថ្ងៃទី ៤ ខែ កុម្ភៈ។
ក្រោយពីការប្រកាសបិទភ្លាមៗ ក្រុមហ៊ុនអាកាសចរណ៍មួយចំនួន ដូចជា ANA របស់ជប៉ុនជាដើម ក៏បានសម្រេចលុបចោលជើងហោះហោររបស់ខ្លួនដូចគ្នាដែរ។
សូមបញ្ជាក់ថា បញ្ហារដ្ឋប្រហារដោយយោធានៅមីយ៉ាន់ម៉ា កំពុងត្រូវបានពិភពលោកមានការចាប់អារម្មណ៍យ៉ាងខ្លាំង ពិសេសថ្មីថ្មីៗនេះ ក្រុមប្រឹក្សាសន្ដិសុខអង្គការសហប្រជាជាតិក៏មានកិច្ចប្រជុំបន្ទាន់មួយផងដែរ ទៅលើករណីស្ថានភាពនៃប្រទេសមីយ៉ាន់ម៉ានាពេលនេះ ខណៈដែលសហរដ្ឋអាមេរិក ក្រោមរដ្ឋការរបស់លោក ចូបៃឌិនឯណោះវិញ ក៏បានប្រកាសហើយដែរថា អាមេរិកនឹងមិនរួញរានោះទេក្នុងការដាក់ទណ្ឌកម្មទៅលើប្រទេសមីយ៉ាន់ម៉ា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
