អគ្គនាយក នៃការិយាល័យគោលនយោបាយ និងយុទ្ធសាស្ត្រពាណិជ្ជកម្មរបស់ថៃ លោក រូន ណារុង ផូលភីផាត់ (Ronnarong Phoolpipat) បាននិយាយថា អតិផរណាថៃ ទំនងជានឹងកើនដល់ ៣% នៅឆ្នាំ២០២២ ពីកម្រិត ០,៨% ទៅដល់ ១,២% នៅឆ្នាំ២០២១នេះ។ ការព្យាករនេះ ដោយសន្មតថា មេរោគបំប្លែងថ្មីអូមីក្រុង គឺមិនមានស្ថានភាពធ្ងន់ធ្ងរនោះទេ ព្រមជាមួយនឹងក្ដីសង្ឃឹមថា ការបើកប្រទេសឡើងវិញនឹងនាំមកនូវការងើបឡើងនៃសកម្មភាពសេដ្ឋកិច្ច និងទេសចរណ៍ រួមទាំងតម្រូវការក្នុងស្រុក និងការចំណាយកើនឡើងកាន់តែខ្ពស់ផងដែរ។
កត្តាផ្សេងទៀត ដែលរួមចំណែកធ្វើឲ្យអតិរផរណារបស់ថៃ រីកកាន់តែធំនោះ គឺដោយសារតែការខ្វះខាតកម្លាំងពលកម្ម និងផលប៉ះពាល់នៃកត្តាខាងក្រៅ ដូចជាការនាំចូលវត្ថុធាតុដើមមានកាន់តែខ្ពស់រួមមាន ដែកថែប និងជីកសិកម្មជាដើម ខណៈតម្លៃប្រេងក៏បន្ដកើនឡើងខ្ពស់ផងដែរ។
អ្នកជំនាញសេដ្ឋកិច្ចថៃដដែលនេះ ក៏បានសង្កត់ធ្ងន់ថា កត្តាជំរុញទាំងអស់នេះហើយ ដែលនឹងទាញឲ្យប្រទេសថៃ មានអតិផរណាកើនឡើងខ្លាំងនៅឆ្នាំ២០២២ ដែលអាចនឹងមានដល់ ៣% ដែលជាអត្រាមួយខ្ពស់មិនធ្លាប់មានរាប់ចាប់តាំងពីឆ្នាំ២០១២មក។
តើអតិផរណាប៉ោងឡើង ធ្វើឲ្យប៉ះពាល់អ្វីខ្លះ? ពិតណាស់ គឺវានឹងជះផលអវិជ្ជមានទៅដល់ប្រាក់បៀរវត្សរ៍កម្មករនយោជិត និងប្រាក់ចំណូលកសិករជាដើម ដោយសារតែការចំណាយលើថ្លៃទំនិញមានការឡើងថ្លៃ។
អគ្គនាយក នៃការិយាល័យគោលនយោបាយ និងយុទ្ធសាស្ត្រពាណិជ្ជកម្មរបស់ថៃ បានស្នើទៅដល់រាជរដ្ឋាភិបាល ឲ្យមានការដាក់ចេញឡើងវិញនូវគម្រោងឧបត្ថម្ភធន សម្រាប់ការចំណាយលើថ្លៃទឹក-ភ្លើង និងវិធានការសង្គ្រោះផ្សេងទៀត ដើម្បីជួយកាត់បន្ថយថ្លៃចំណាយសម្រាប់ការរស់នៅរបស់ប្រជាពលរដ្ឋ។
អត្ថបទគួរអាន
សូមបញ្ជាក់ថា កាលពីសប្ដាហ៍មុន ការិយាល័យគោលនយោបាយ និងយុទ្ធសាស្ត្រពាណិជ្ជកម្មរបស់ថៃបានព្យាករថា អតិផរណា ត្រូវបានវាស់វែងដោយសន្ទស្សន៍តម្លៃទំនិញប្រើប្រាស់ ដែលនឹងមានដល់ចន្លោះពី ០,៧% ដល់ ២,៤% ដែលមានជាមធ្យម ១,៥% នៅឆ្នាំក្រោយ ប៉ុន្ដែការព្យករនេះ មិនបានរាប់បញ្ចូលកត្តាមេរោគបំប្លែងថ្មី អូមីក្រុង នោះទេ។
ការព្យាករនេះទៀតសោត ក៏ផ្អែកទៅលើកំណើនសេដ្ឋកិច្ចថៃ ដែលត្រូវបានរំពឹងថា នឹងកើនប្រមាណ ៣,៥ ទៅ៤,៥% នៅឆ្នាំ២០២២ ខណៈតម្លៃប្រេងឆៅនៅទីផ្សារទីក្រុងឌូបៃជាមធ្យមតម្លៃ ៦៣ ទៅ៧៣ដុល្លារក្នុងមួយបារ៉ែល និងអត្រាប្ដូរប្រាក់១ដុល្លារអាមេរិក ដូរបាន ៣១,៥ បាត ទៅ៣៣,៥បាត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
