អាជ្ញាធរទីក្រុងបាងកក បានប្រកាសហាមឃាត់ការលក់គ្រឿងស្រវឹង សម្រាប់ប្រជាជនទីក្រុងប្រមាណ ១៦លាននាក់ ដែលជាវិធានការថ្មីមួយ ចូលរួមទប់ស្កាត់ការឆ្លងរីករាលដាលនៃមេរោគកូវីដ១៩ ដូចទៅនឹងវិធានការផ្សេងៗទៀត ដែលធ្លាប់បានអនុវត្តនៅក្នុងបណ្តាខេត្តក្រុងទាំង ៧៧ របស់ប្រទេសថៃ។
លោក ពុងសាខន ក្វាន់មួង អ្នកនាំពាក្យរដ្ឋបាលទីក្រុងបាងកក បានគូសបញ្ជាក់ថា រាជរដ្ឋាភិបាលថៃ ស្នើសុំ ការសហការពីប្រជាជនទាំងអស់ ហើយរាជរដ្ឋាភិបាល នឹងអាចគ្រប់គ្រងស្ថានការណ៍នៃមេរោគកូវីដ១៩ ក្នុងពេលខាងមុខ។
បំរាមលក់គ្រឿងស្រវឹងនេះ គឺអនុវត្ត សម្រាប់អ្នកលក់ដុំ និងលក់រាយទាំងអស់ ហើយចំពោះហាងលក់អាហារ និងភេសជ្ជៈ ក៏ដូចជា អ្នកលក់នៅតាមដងផ្លូវនានា អាចបើកលក់ចាប់ពីម៉ោង ៤ព្រឹក ដល់ម៉ោង ១០យប់ ដោយលក់សម្រាប់តែការវេចខ្ចប់ប៉ុណ្ណោះ។
អត្ថបទទាក់ទង
ប្រទេសថៃ កំពុងស្ថិតក្នុងស្ថានភាពប្រកាសអាសន្ន ហើយតំបន់មួយចំនួន ត្រូវបានបិទ រហូតដល់ដំណាច់ខែមេសា ហើយមន្ត្រីជាច្រើនរូប កំពុងតែព្យាយាមបង្កើតគម្លាតសង្គម ឬហៅថា Social Distancing ដើម្បីទប់ស្កាត់ការឆ្លងមេរោគនេះ។
លើសពីនេះ រាជរដ្ឋាភិបាល ក៏បានប្រកាសរួចជាស្រេចថា នឹងពន្យារពេលប្រារព្ធពិធីបុណ្យសង្ក្រាន្តចូលឆ្នាំ ទៅពេលវេលាសមស្របណាមួយ នៅក្នុងឆ្នាំនេះ ក៏ប៉ុន្តែនៅតែមានប្រជាជនថៃមួយចំនួន រឹងទទឹងមិនព្រមស្តាប់ និងព្យាយាមប្រារព្ធពិធីថែមទៀតផង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
