បើតាមការគូសបញ្ជាក់ពីអ្នកជំនាញក្នុងវិស័យនេះ ទោះបីជាបច្ចុប្បន្នខ្សែច្រវាក់ផលិតកម្មជាតិ មិនទាន់អាចឆ្លើយតបទៅនឹងតម្រូវការទីផ្សារបានទាំងស្រុងក៏ដោយ ប៉ុន្តែវិស័យ SME កំពុងបង្ហាញសញ្ញាវិជ្ជមានឈានទៅរកការផ្គត់ផ្គង់កាន់តែទូលំទូលាយ ដោយសារតែស្មារតីគាំទ្រយ៉ាងខ្លាំងក្លាពីសំណាក់ប្រជាពលរដ្ឋខ្មែរ។ ទន្ទឹមនឹងនេះ តំណាងសហគ្រិន ក៏បានអំពាវនាវដល់អាជ្ញាធរតាមច្រកព្រំដែនឱ្យជួយរឹតបន្តឹងការនាំចូលទំនិញគេចពន្ធ ដែលកំពុងយាយីដល់ខ្សែច្រវាក់ផលិតកម្មក្នុងស្រុក។
ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា បានគូសបញ្ជាក់ថា ចាប់តាំងពីមានចលនាធ្វើពហិការមិនប្រើប្រាស់ទំនិញថៃមក ការផលិតក្នុងស្រុកនៅតែមានភាពខ្វះខាតនៅឡើយ ខណៈបច្ចុប្បន្ន ក៏មានអ្នកនាំចូលវត្ថុធាតុដើមពីប្រទេសចិន មកវិចខ្ចប់នៅកម្ពុជា ដាក់លក់នៅលើទីផ្សារ ដើម្បីបំពេញតម្រូវការផងដែរ។ យ៉ាងណាមិញ មេ SME រូបនេះកំពុងរៀបចំឯកសារពាក់ព័ន្ធ ដើម្បីស្នើសុំឱ្យរដ្ឋាភិបាលជួយធ្វើយ៉ាងណាឱ្យថ្លៃដើមផលិតក្នុងស្រុកទាប ដើម្បីអាចឱ្យតម្លៃដាក់លក់នៅលើទីផ្សារមានភាពប្រកួតប្រជែងជាមួយទំនិញពីក្រៅប្រទេស។
ទន្ទឹមនឹងនេះ លោកឧកញ៉ា ស្នើឱ្យអាជ្ញាធរនៅច្រកព្រំដែនបង្កើនការរឹតបន្តឹងលើការនាំចូលទំនិញប្រើប្រាស់ពីក្រៅស្រុក ដើម្បីកុំឱ្យប៉ះពាល់ដល់ខ្សែរច្រវាក់ផលិតកម្មក្នុងស្រុក ខណៈទំនិញដែលមានតម្លៃថោកលោកឧកញ៉ាវាយតម្លៃថា មានភាគរយខ្ពស់មានផ្ទុកសារធាតុគីមី ដើម្បីរក្សាទុកបានយូរ។
អត្ថបទគួរអាន
ជាមួយគ្នានេះ លោកជំទាវ កែវ មុំ ប្រធានសភាមុខរបរ និងមីក្រូសហគ្រាសកម្ពុជា បានចាត់ទុកការនាំចូលផលិតផលសម្រេចពីក្រៅប្រទេសយកមកវេចខ្ចប់នៅក្នុងស្រុកជាការគិតខុសមួយរបស់ម្ចាស់អាជីវកម្មមួយចំនួន ដោយសារវាមិនអាចជួយជំរុញកំណើនសេដ្ឋកិច្ចជាតិបានឡើយ។ លោកជំទាវ បានបន្ថែមថា ស្របពេលដែលប្រជាពលរដ្ឋខ្មែរកំពុងមានចលនាពុះកញ្ជ្រោលធ្វើពហិការមិនប្រើផលិតផលថៃ វត្តមាននៃទំនិញគេចពន្ធមិនបានបង់ពន្ធត្រឹមត្រូវ កំពុងក្លាយជារនាំងឧបសគ្គដ៏ធំសម្រាប់ផលិតកម្មក្នុងស្រុក ដែលធ្វើឱ្យការប្រកួតប្រជែងតម្លៃមានភាពលំបាកខ្លាំង។ បើតាមលោកជំទាវ កែវ មុំ ទោះបីជាស្ថាប័នជំនាញកំពុងចុះត្រួតពិនិត្យជាបន្តបន្ទាប់ និងអំពាវនាវឱ្យក្រុមឈ្មួញបញ្ឈប់ការនាំចូលទំនិញគេចពន្ធយ៉ាងណាក្តី ប៉ុន្តែដើម្បីឱ្យវិធានការនេះមានប្រសិទ្ធភាពខ្ពស់ គឺទាមទារដាច់ខាតនូវការរឹតបន្តឹង និងត្រួតពិនិត្យឱ្យបានម៉ត់ចត់បំផុតពីសំណាក់អាជ្ញាធរនៅតាមច្រកព្រំដែនផ្ទាល់តែម្តង។
គួរជម្រាបថា តាមការវាយតម្លៃពីថ្នាក់ដឹកនាំវិស័យ SME ចាប់តាំងពីមានចលនាធ្វើពហិការផលិតផលនាំចូលពីប្រទេសថៃមក សម្ទុះនៃការផលិតទំនិញនៅក្នុងស្រុកបានហក់ឡើងរហូតដល់៣០% ខណៈដែលកាលពីមុនផលិតផលក្នុងស្រុកមានចំណែកឈរជើងនៅលើទីផ្សារត្រឹមតែ២%ប៉ុណ្ណោះ ដែលនេះ គឺជាសញ្ញាវិជ្ជមានដ៏ធំមួយសម្រាប់សេដ្ឋកិច្ចជាតិ។ យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាបានបង្ហាញថា គិតត្រឹមត្រីមាសទី១ឆ្នាំ២០២៦ នេះ ទំហំនៃការដោះដូរពាណិជ្ជកម្មទ្វេភាគីរវាងកម្ពុជា និងថៃ សម្រេចបានក្នុងទំហំទឹកប្រាក់ប្រមាណ៦៩៦លានដុល្លារ ដែលចំនួននេះមានការធ្លាក់ចុះជិត ៤០% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន៕
អត្ថបទ៖ ជា ម៉ារ៉ា
