មែនទែនទៅ ឈ្មោះក្រុងបាងកក ដែលដែលជារាជធានីរបស់ថៃនោះ មិនមែនជាឈ្មោះផ្លូវការនោះទេ ដោយឈ្មោះផ្លូវការរបស់រាជធានីថៃ គឺក្រុងថេប មាហាណាខន ប៉ុន្ដែ ការិយាល័យរាជវាំងថៃ អះអាងថា ឈ្មោះបាងកក នៅតែអាចប្រើបាន មិនមានការតម្រូវឲ្យប្ដូរមកប្រើឈ្មោះ ក្រុងថេប មាហាណាខន ដូចការរិះគន់ដែលបានយល់ច្រឡំពីសំណាក់មហាជននាពេលកន្លងមកនោះទេ។
ក្នុងន័យនេះ គឺឈ្មោះ ក្រុងថេប មហាណាខន នឹងនៅតែជាឈ្មោះផ្លូវការនៃរាជធានីរបស់ប្រទេសថៃដដែល ហើយបាងកកនឹងត្រូវសរសេរនៅក្នុងវង់ក្រចក នៅខាងក្រោយឈ្មោះផ្លូវការវិញ។
អភិបាលរាជធានីបាងកក បានអះអាងថា ឈ្មោះផ្លូវការរបស់រាជធានី គឺ ក្រុងថេប មាហាណាខន គឺមិនមានការផ្លាស់ប្ដូរនោះឡើយ ដោយសារតែឈ្មោះនេះត្រូវបានកំណត់ឲ្យប្រើប្រាស់មានចែងនៅក្នុងច្បាប់តាំងពីឆ្នាំ២០០១មកម្ល៉េះ។ ប៉ុន្ដែ ជនបរទេស នៅតែនិយមហៅបាងកក ជាងឈ្មោះផ្លូវការ។
អត្ថបទគួរអាន
រដ្ឋមន្ត្រីក្រសួងវប្បធម៌ថៃ ក៏បានយល់ស្របដែរ ក្នុងការរក្សាឈ្មោះ ក្រុងថប មហាណាខន ជាឈ្មោះផ្លូវការរបស់រាជធានីថៃដែលវាឆ្លុះបញ្ចាំងពីភាពរុងរឿង ហើយកន្លងមក ពាក្យបាងកកនេះ គឺភាគច្រើនមានប្រើតែនៅលើខ្សែភាពយន្ដ និងការងារទំនាក់ទំនងសាធារណៈប៉ុណ្ណោះ។
យ៉ាងណាមិញ ជុំវិញរឿងរ៉ាវនេះ មានមតិសាធារណៈជាច្រើនចេញមករិះគន់ ដោយហេតុថា ឈ្មោះផ្លូវការ ក្រុងថេប មហាណាខន វែងមានភាពស្មុគស្មាញក្នុងការហៅ ខណៈបាងកកគួរតែជាការប្រើប្រាស់ជាផ្លូវការ និងជាអន្តរជាតិវិញ ព្រោះជនបរទេសភាគច្រើនមិនអាចអាចឈ្មោះវែងបានទេ ហើយបាងកកក៏បានភាពងាយស្រួលក្នុងការចងចាំ និងជាឈ្មោះទីក្រុងដែលមានការពេញនិយមហៅមកជាយូរមកហើយ។
សូមបញ្ជាក់ថា តាមការពន្យល់ពីអតីតព្រះមហាក្សត្រថៃ រាមាទី៤ ធ្លាប់បានបញ្ជាក់ថា ឈ្មោះបាងកកនេះ គឺជាឈ្មោះរាជធានីចាស់ ថុនបុរី របស់ថៃ ព្រោះតែវាមានទីតាំងស្ថិតនៅតាមប្រឡាយបាងកកណូយ និងបាងកក យ៉ៃ ហើយតាមឯកសារប្រវត្តិសាស្ត្រ ឈ្មោះ បាងកកនេះ ក៏ត្រូវបានប្រើមកជាយូរមកហើយដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
