មជ្ឈមណ្ឌលស្រាវជ្រាវនេះ បានប៉ាន់ប្រមាណថា ឧស្សាហកម្មទេសចរណ៍ថៃ នឹងរងផលប៉ះពាល់ធ្ងន់ធ្ងរ ប្រសិនបើការហោះហើរពីទីក្រុងហុង ត្រូវបានអាក់ខាន ច្រើនជាង៧ថ្ងៃ ខណៈដែលបច្ចុប្បន្ននេះ គឺជារដូវមានភ្ញៀវធ្វើដំណើរច្រើន (High Season) ពីទីក្រុងហុង មកកម្សាន្ដនៅក្នុងប្រទេសថៃ ដោយសារតែសាលារៀន នៅហុងកុងបានឈប់សម្រាកនៅរដូវក្ដៅ ក្នុងខែសីហានេះ។ នៅក្នុងខែនេះដែរ ប្រទេសថៃ ទទួលបានភ្ញៀវធ្វើដំណើរកម្សាន្ដពីទីក្រុងហុង ប្រចាំថ្ងៃ ចន្លោះពី ៤.២០០ ទៅ ៥.០០០ នាក់។
មជ្ឈមណ្ឌលស្រាវជ្រាវរបស់ថៃ ដដែលនេះ បានព្រមានថា «ប្រសិនបើអាកាសយានដ្ឋានហុងកុងបិទទ្វា៧ថ្ងៃ យើងនឹងបាត់បង់ភ្ញៀវទេសចរពីហុងកុងជាង៣ម៉ឺននាក់»។
អត្ថបទទាក់ទង!
កាលពីឆ្នាំមុន ភ្ញៀវទេសចរហុងកុង ដែលបានធ្វើដំណើរទៅកាន់ប្រទេសថៃ មានប្រមាណ ១,០២ លាននាក់ ដែលមានប្រមាណ ២,៦៥% នៃភ្ញៀវទេសចរបរទេសសរុបរបស់ថៃ និងរកចំណូលបានប្រមាណ ជាង ១,៣៦ ពាន់លានដុល្លារអាមេរិក។
គិតមកដល់ថ្ងៃទី ១៤ សីហានេះ ជើងហោះហើរពីទីក្រុងហុងកុង ត្រូវបានលុបចោល អស់រយៈពេល២ថ្ងៃមកហើយ បន្ទាប់ពីក្រុមបាតុករបានដណ្ដើមយកអាកាសយានដ្ឋានហុងកុង កាលពីរសៀលថ្ងៃទី១៣ សីហា។
គួរបញ្ជាក់ថា ការកើតមានបាតុកម្មនៅក្នុងទីក្រុងហុងកុង រវាងប្រជាជនហុងកុង ប្រឆាំងនឹងរដ្ឋាភិបាលនេះ គឺបានបន្តអូសបន្លាយមកជាច្រើនខែមកហើយ ប៉ុន្ដែមិនទាន់មានដំណោះស្រាយផ្លែផ្កាដើម្បីរសាយបាតុកម្មនេះនៅឡើយទេ។ បាតុកម្មអូសបន្លាយនេះ ក៏បានធ្វើឲ្យប៉ះពាល់ជាខ្លាំង ដល់សេដ្ឋកិច្ចរបស់ទីក្រុងហុងកុង។
ដើមចមនៃការធ្វើបាតុកម្មនេះ គឺធ្វើឡើងដំបូងប្រឆាំងទៅនឹងសំណើច្បាប់មួយដែលអាចឲ្យមានការធ្វើបត្យាប័នឧក្រិដ្ឋជនទៅកាន់ប្រទេសចិន ប៉ុន្តែវាបានប្រែក្លាយទៅជាចលនាគាំទ្រលទ្ធិប្រជាធិបតេយ្យកាន់តែធំឡើងៗ។
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
