លោក ចាលឺមឆៃ ស្រ៊ីអន (Chalermchai Sri-on) រដ្ឋមន្ត្រីក្រសួងកសិកម្មថៃ បានថ្លែងនៅក្នុង សន្និសីទព័ត៌មានអនឡាញមួយ ដែលរៀបចំដោយ អង្គការស្បៀងអាហារ និងកសិកម្ម ឲ្យដឹងថា ផ្លែទុរេនថៃ គឺត្រូវបានគេស្គាល់ជាយូរមកហើយ ដោយសារតែគុណភាពខ្ពស់ និងរសជាតិ ហើយបានចុះបញ្ជីម៉ាកផលិតផលសម្គាល់ភូមិសាស្ត្រ GI ដែលបន្ថែមគុណតម្លៃដល់ផ្លែទុរេនថៃ។
មន្ត្រីជាន់ខ្ពស់រូបនេះបន្តថា ផ្លែទុរេន ជាផលិតផលកសិកម្មនាំចេញកំពូលរបស់ប្រទេសថៃ ដោយសម្រេចបានការនាំចេញជិត ៣ពាន់លានដុល្លារអាមេរិក ស្មើនឹង ២,៥% នៃផលិតផលក្នុងស្រុកសរុបរបស់ថៃ ហើយមានអត្រាកំណើនជាមធ្យម ៤០% ក្នុងមួយឆ្នាំ។
នៅក្នុងផែនការជំរុញផលិតផលកសិកម្មទៅកាន់ទីផ្សារសកលលោក និងផ្សព្វផ្សាយពីផលិតផលកសិកម្មពិសេស តាមរយៈការអភិវឌ្ឍន៍បៃតង និងច្នៃប្រឌិតខ្ពស់ ដែលអនុញ្ញាតឲ្យ ម្ចាស់អាជីវកម្មខ្នាតតូច និងគ្រួសារកសិករ អាចចូលរួមអនុវត្តគំរូផលិតកម្មនេះបាន។
លោក ដុង យូ អគ្គនាយកអង្គការស្បៀងអាហារ និងកសិកម្ម បានលើកឡើងថា ការផ្គត់ផ្គង់ចំណីអាហារនៅលើសកលលោក ចាប់ផ្តើមពឹងផ្អែកទៅលើ ដំណាំ និងផលិតផលប៉ុន្មានប្រភេទប៉ុណ្ណោះ ហើយប្រព័ន្ធកសិកម្មចំណីអាហារ គឺមានការចំណាយទុនខ្ពស់ ប្រើប្រាស់ពលកម្មច្រើន តែខ្វះខាតការធ្វើសមាហរណកម្ម ខ្វះការបង្កើនប្រសិទ្ធភាព និងខ្វះភាពច្នៃប្រឌិត។
អត្ថបទគួរអាន
លោកបន្តថា ផែនការនេះ មានបំណងអភិវឌ្ឍន៍ខ្សែចង្វាក់ចំណីអាហារ ដែលមានភាពបៃតង និងស្ថិរភាព សម្រាប់ផលិតផលកសិកម្មពិសេសជាច្រើនប្រភេទ ដោយចាប់ផ្តើមពីការទទួលស្គាល់ ផលិតផលមួយ ឬដំណាំជាក់លាក់មួយ។
សូមជម្រាបថា ក្នុងរយៈពេល ៥ខែ ដើមឆ្នាំ ២០២១នេះ ប្រទេសថៃ សម្រេចការនាំចេញទុរេនស្រស់ប្រមាណ ១ពាន់ ៨រយលានដុល្លារអាមេរិក កើនឡើង ៤៥% ធៀបនឹងពេលដូចគ្នាកាលពីឆ្នាំមុន ហើយមជ្ឈមណ្ឌលស្រាវជ្រាវរបស់ថៃ ក៏រំពឹងថា ថៃ អាចនឹងសម្រេចការនាំចេញទុរេនស្រស់ជិត ៣ពាន់លានដុល្លារអាមេរិក ក្នុងឆ្នាំ ២០២១នេះ កើនឡើងជាង ៤០% ធៀបនឹងឆ្នាំ ២០២០៕
អត្ថបទ៖ វណ្ណ វុឌ្ឍវិវឌ្ឍន៍
None
