នាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃ បានអះអាងនៅក្នុងសារព័ត៌មានបាងកកប៉ុស្ដិ៍ កាលពីពេលថ្មីៗនេះថា ទំហំពាណិជ្ជកម្មតាមព្រំដែននៅរយៈពេល ១១ខែ ឆ្នាំនេះ សរុបរួមទាំងការធ្វើពាណិជ្ជកម្មឆ្លងកាត់ផង មានទំហំជាទឹកប្រាក់ជាង ១,២ ទ្រីលានបាត ឬស្មើប្រមាណ៤១ ពាន់លានដុល្លារអាមេរិក ពោលគឺមានការធ្លាក់ចុះ ៣% ធៀបនឹងរយៈពេលដូចគ្នាកាលពីឆ្នាំ២០១៨។
ប្រភពព័ត៌មានបានឲ្យដឹងទៀតថា
សម្រាប់ពាណិជ្ជកម្មតាមព្រំដែន របស់ថៃ ជាមួយនឹងប្រទេសក្បែរខាងគ្នាបំផុត មានទំហំទឹកប្រាក់ប្រមាណ
៣៣ ពាន់លានដុល្លារអាមេរិក ធ្លាក់ចុះ ៤% ធៀបនឹង១១ខែ កាលពីឆ្នាំមុន ដោយក្នុងនោះ ការនាំចេញរបស់ថៃសម្រេចបានជាង
១៨ពាន់លានដុល្លារអាមេរិក ធ្លាក់ចុះជាង ៥%។ រីឯការនាំចូលវិញ មានប្រមាណ ១៤ពាន់លានដុល្លារ
ធ្លាក់ចុះ ជាង២% ដោយបានធ្វើឲ្យថៃ នៅរក្សាបានអតិរេកពាណិជ្ជកម្មជាង ៤ពាន់លានដុល្លារអាមេរិក
ពីពាណិជ្ជកម្មតាមព្រំដែន នៅ១១ខែឆ្នាំនេះ។
អត្ថបទទាក់ទង!
ប្រទេសម៉ាឡេស៊ី នៅតែជាដៃគូពាណិជ្ជកម្មតាមព្រំដែនធំបំផុតរបស់ថៃ ដោយពាណិជ្ជកម្មទ្វេភាគីរវាងប្រទេសទាំងពីរសម្រេចបានប្រមាណ ១៦ ពាន់លានដុល្លារអាមេរិក តែមានការធ្លាក់ចុះ ៨,៧% តាមពីក្រោយដោយប្រទេសឡាវ ដែលមានពាណិជ្ជកម្មទ្វេភាគីជាមួយថៃប្រមាណជាង ៦ពាន់លានដុល្លារ និងមីយ៉ាន់ម៉ា មានជិត ៦ពាន់លានដុល្លារដែរ ខណៈដែលកម្ពុជាវិញមានជិត ៥ពាន់លានដុល្លារអាមេរិក។
អគ្គនាយកនៃនាយកដ្ឋានពាណិជ្ជកម្មក្រៅប្រទេសថៃ បានឲ្យដឹងថា ពាណិជ្ជកម្មតាមព្រំដែន បានជួបនឹងបញ្ហាទាក់ទងនឹងការនាំចេញរបស់ថៃ ធ្លាក់ចុះ ប្រមាណ២,៨% នៅ១១ខែឆ្នាំ២០១៩នេះ៕
None
