នៅរយៈពេល៨ខែក្នុងឆ្នាំ២០២១ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មីៗចំនួន ៩៣គម្រោង ដែលមានទុនវិនិយោគសរុបជាង ២ពាន់៥រយលានដុល្លារអាមេរិក ដោយបានផ្តល់ការងារដល់បុគ្គលិក កម្មករ និងប្រជាពលរដ្ឋជាង៦ម៉ឺន៣ពាន់នាក់។ នេះបើតាមរបាយការណ៍តួលេខដែលបានផុសផ្សព្វផ្សាយនៅលើទំព័រហ្វេសប៊ុកផ្លូវការរបស់ក្រុមប្រឹក្សាអភិវឌ្ឍន៍កម្ពុជា ដែលត្រូវបានស្រង់ដោយសារព័ត៌មានខេមបូណូមីស។
គម្រោងវិនិយោគជាង ៩០គម្រោងនេះ គឺភាគច្រើន ជាគម្រោងវិនិយោគនៅក្នុងវិស័យវាយនភណ្ឌកាត់ដេរសម្លៀកបំពាក់ កាបូប ស្បែកជើង គ្រឿងបង្គុំអគ្គិសនី ទោចក្រយានយន្ត រោងចក្រដំឡើងទោចក្រយានយន្តដើរដោយថាមពលអគ្គិសនី រោងចក្រផលិតអគ្គិសនីដើរថាមពលព្រះអាទិត្យ និងធ្យូងថ្ម រោងចក្រកែច្នៃផលិតផលកសិកម្ម សណ្ឋាគារ និងរោងចក្រផលិតផលិតផលប្រើប្រាស់ផ្សេងៗទៀត។
អត្ថបទទាក់ទង
រោងចក្រទាំងនេះ ភាគច្រើនមានទីតាំងស្ថិតនៅរាជធានីភ្នំពេញ ខេត្តកណ្តាល ស្វាយរៀង ព្រះសីហនុ កំពង់ស្ពឺ តាកែវ កំពត កំពង់ចាម កំពង់ធំ និងកំពង់ឆ្នាំងជាដើម។
នៅក្នុងរយៈពេល ៨ខែដំបូងនៅឆ្នាំ២០២១នេះ បើគិតពីទំហំទុនវិនិយោគដែល CDC បានអនុម័តឃើញថា នៅក្នុងខែមីនា គឺមានទំហំទុនវិនិយោគច្រើនជាងគេ ដោយមានតម្លៃដល់ទៅ ជាង១ពាន់៣រយលានដុល្លារអាមេរិក បន្ទាប់មកគឺ ខែកុម្ភៈមានជាង៧០០លានដុល្លារនិងខែមិថុនាមានជាង១៤០លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
