សំណើទី១ ដែលត្រូវបានផ្អាក គឺសំណើបង្កើនកូតាលក់ខុនដូ ឲ្យជនរទេសលើសពី ៤៩% នៃចំនួនយូនីតខុនដូសរុបដែលត្រូវលក់ និងសំណើទី២ គឺការពង្រីកសិទ្ធិជួលអចលនទ្រព្យសម្រាប់ជនបរទេសពីរយៈពេល ៣០ ឆ្នាំទៅ ៥០ ឆ្នាំ ។ ការផ្អាកសំណើទាំងពីរនេះ ត្រូវបានមន្ត្រីជាន់ខ្ពស់រដ្ឋាភិបាលថៃអះអាងថា ព្រោះសំណើទាំងនេះ មានភាពអវិជ្ជមានច្រើន ហើយរដ្ឋាភិបាលខ្លាចរងការរិះគន់ពីសាធារណជនប្រសិនបើអនុម័តសំណើទាំងនេះ។
ច្បាប់បច្ចុប្បន្ននៅក្នុងប្រទេសថៃ ចំពោះការលក់ខុនដូឲ្យជនបរទេស គឺអគារខុនដូទាំងមូល អាចលក់ខុនដូឲ្យជនបរទេសតែត្រឹម ៤៩% នៃចំនួនយូនីតខុនដូសរុប និង៥១%ទៀតត្រូវតែលក់ឲ្យពលរដ្ឋក្នុងស្រុក ខណៈដែលសិទ្ធិកាន់កាប់ជួលអចលនទ្រព្យសម្រាប់ជនបរទេសវិញ គឺមានត្រឹមតែ៣០ឆ្នាំប៉ុណ្ណោះ។ ប៉ុន្ដែ ថ្មីៗនេះ នាយកដ្ឋានដីធ្លីរបស់ថៃ បានស្នើឲ្យមានការពង្រីកកូតាលក់ខុនដូឲ្យជនប្រទេសនេះ ឲ្យលើសពី៤៩% និងពង្រីកសិទ្ធិកាន់កាប់ជួលអចលនទ្រព្យឲ្យបានដល់ ៥០ឆ្នាំ ដើម្បីស្រូបទាញជនប្រទេសឲ្យមកវិនិយោគ និងរស់នៅប្រទេសថៃកាន់តែច្រើន។ ប៉ុន្ដែ មជ្ឈមណ្ឌលគ្រប់គ្រងស្ថានការណ៍សេដ្ឋកិច្ចរបស់ថៃ ដែលមានលោកប្រាយុទ្ធ ចាន់ អូចានាយករដ្ឋមន្ត្រីថៃ ជាប្រធាន បានសម្រេចលុបចោលសំណើនេះ។
បើទោះបីជា លុបចោលសំណើទាក់ទងនឹងការលក់ខុនដូឲ្យជនបរទេសក្ដី ប៉ុន្ដែរដ្ឋាភិបាលថៃក៏បានយល់ព្រមជាគោលការណ៍ អនុញ្ញាតឲ្យជនបរទេសអាចមានសិទ្ធិកាន់កាប់ដីធ្លីក្នុងទំហំ១រ៉ៃ ឬស្មើនឹង ១ពាន់៦រយម៉ែត្រការ៉េ សម្រាប់ជនបរទេសតាំងទីលំនៅដ្ឋានក្នុងប្រទេសថៃផងដែរ។
អត្ថបទគួរអាន
ការលុបសំណើទាំងពីរនេះ ក៏មានមតិមួយចំនួនលើកឡើងថា កំពុងធ្វើឲ្យយុទ្ធសាស្ត្រទាក់ទាញជនបរទេសរបស់រដ្ឋាភិបាលថៃ ត្រូវបានជាប់គាំងផងដែរ។ រដ្ឋមន្ត្រីមហាផ្ទៃ លោក អានុពង្ស ប៉ៅចិន្ដា (Anupong Paojinda) បានអះអាងថា សំណើទាំងពីរនេះ គឺមានភាពអវិជ្ជមានច្រើន ហើយរដ្ឋាភិបាលនឹងប្រឈមមុខនឹងការរិះគន់ជាសាធារណៈផងដែរ ប្រសិនបើយល់ព្រមលើសំណើទាំងនោះ។
ត្បិតថាបែបនេះក្ដី តែរដ្ឋាភិបាលថៃនឹងបន្តគោលនយោបាយ ដើម្បីទាក់ទាញភ្ញៀវបរទេសដែលមានទ្រព្យសម្បត្តិឱ្យមករស់នៅប្រទេសនេះដដែល ព្រោះថាវាអាចបង្កើនប្រាក់ចំណូលសម្រាប់ប្រទេសថៃក្នុងរយៈពេលវែង។
ជាផ្នែកមួយនៃកញ្ចប់ជំរុញការវិនិយោគរបស់ខ្លួនក្នុងការស្តារសេដ្ឋកិច្ចឡើងវិញ រដ្ឋាភិបាលថៃមានគោលបំណងទាក់ទាញភ្ញៀវទេសចរបរទេសចំនួនបួនក្រុម គឺជនបរទេសដែលមានមានទ្រព្យសម្បត្តិ ច្រើន, ជនបរទេសដែលចូលនិវត្តន៍, អ្នកដែលចង់មកធ្វើការនៅប្រទេសថៃ និងអ្នកដែលមានជំនាញ វិជ្ជាជីវៈខ្ពស់ ដោយទទួលបាននូវទិដ្ឋាការរយៈពេលវែងរហូតដល់ ១០ ឆ្នាំ និងផ្ដល់សិទ្ធិកាន់កាប់ដីធ្លី និងអចលនទ្រព្យផងដែរ។
ផ្អែកតាមគម្រោងនេះ រដ្ឋាភិបាលថៃសង្ឃឹមថា នឹងទាក់ទាញជនបរទេសចំនួនជាង ១ លាននាក់ចូលមករស់ប្រទេសថៃក្នុងរយៈពេល ៥ ខាងមុខឆ្នាំ ជាមួយនឹងការចំណាយរបស់ជនបរទេសទាំងនោះជាង ៣០ពាន់លានដុល្លារ៕ ។
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
