អាមេរិក និងអាល្លឺម៉ង់ ចេញគាំទ្រប្រទេសលីទុយអានីក្នុងជម្លោះជាមួយចិន ទាក់ទងនឹងបញ្ហាកោះតៃវ៉ាន់
សហរដ្ឋអាមេរិក និងអាល្លឺម៉ង់ នៅថ្ងៃពុធសប្ដាហ៍នេះ បានឈរជាខ្នងបង្អែករបស់ប្រទេសលីទុយអានី ក្នុងជម្លោះរវាងប្រទេសនេះ ជាមួយនឹងប្រទេសចិន ទាក់ទងន…
មន្ត្រីជាន់ខ្ពស់ក្រសួងពាណិជ្ជកម្មថៃអះអាងថា ការព្យាករពីកម្រិតអតិផរណានេះ គឺស្របទៅតាមកម្រិតនៃការផ្គត់ផ្គង់ និងតម្រូវការក្នុងស្រុក នៅគ្រាដែលសេដ្ឋកិច្ចថៃ បានចាប់ផ្ដើមស្ទុះងើបឡើងពីវិបត្តិកូវីដ១៩។ នេះបើយោងតាមការចុះផ្សាយដោយសារព័ត៌មានបាងកកប៉ុស្តិ៍។
អគ្គនាយកនៃការិយាល័យគោលនយោបាយ និងយុទ្ធសាស្ត្រពាណិជ្ជកម្ម លោក រ៉ុនណារ៉ុង ភូលផីផាត់ (Ronnarong Phoolpipat) បាននិយាយថា អត្រាអតិផរណាត្រូវបានព្យាករថា នឹងកើនឡើងនៅឆ្នាំ ២០២២ គឺស្របតាមការផ្គត់ផ្គង់ និងតម្រូវការមានការកើនឡើង បន្ទាប់ពីការងើបឡើងវិញនៃសេដ្ឋកិច្ចរបស់ប្រទេសក្រោយវិបត្តិកូវីដ១៩ ខណៈទាំងតម្រូវការក្នុងស្រុក និងអន្តរជាតិ នឹងត្រូវទទួលបានការគាំទ្រពីវិស័យទេសចរណ៍ ការនាំចេញ និងផលិតកម្ម។
ដូច្នេះហើយមានកត្តាជាច្រើនដែលនឹងរួមចំណែកធ្វើឱ្យអត្រាអតិផរណា ឬទំនិញឡើងថ្លៃខ្ពស់ក្នុងប្រទេសថៃ។ តម្រូវការកើនខ្ពស់នៅក្នុងវិស័យថាមពល គឺជាកត្តាមួយធ្វើកើនឡើងអតិផរណាដែរ ខណៈដែលរាជរដ្ឋាភិបាលថៃ ត្រូវបានគេរំពឹងថា នឹងបញ្ចេញកញ្ចប់ថវិកាជំរុញសេដ្ឋកិច្ចបន្ថែម ដើម្បីជួយបង្កើនអំណាចទិញសម្រាប់អាជីវកម្ម និងបុគ្គលជាអ្នកប្រើប្រាស់។ កត្តាមួយទៀតនោះ គឺទាក់ទងនឹងផ្នែកផ្គត់ផ្គង់ ព្រោះថាការកើនឡើងនៃថ្លៃដើមផលិតកម្ម និងការដឹកជញ្ជូន រួមជាមួយនឹងការធ្លាក់ចុះនៃប្រាក់បាតរបស់ថៃ ព្រមទាំងកង្វះកម្លាំងពលកម្ម បាននិងកំពុងប៉ះពាល់ដល់វិស័យផលិតកម្ម និងតម្លៃទំនិញក្នុងប្រទេសនេះ។
តម្លៃម្ហូបអាហារ និងសាច់បន្លែ មានការកើនឡើងគួរឲ្យកត់សម្គាល់ក្នុងប្រទេសថៃ ជាពិសេសតម្លៃសាច់ជ្រូកបានហក់ឡើងខ្ពស់ខ្លាំង ដោយសារតម្លៃផលិតកម្មសត្វមានការកើតឡើងក្នុងកំឡុងពេលផ្ទុះជំងឺប៉េស្តជ្រូក ធ្វើឱ្យកសិករជាច្រើននាំគ្នាឈប់ប្រកបរបរចិញ្ចឹមជ្រូក។
យ៉ាងណាក៏ដោយចុះ តាមការព្យាករណ៍អំពីអត្រាអតិផរណានេះ ក្រសួងពាណិជ្ជកម្មផ្អែកលើការរំពឹងទុកនៃកំណើនសេដ្ឋកិច្ចចន្លោះពី ៣,៥ភាគរយ ទៅ ៤,៥ភាគរយនៅឆ្នាំនេះ។
ត្បិតថា មានការព្រួយបារម្ភអំពីអត្រាអតិផរណាខ្ពស់អាចប៉ះពាល់ដល់កំណើនសេដ្ឋកិច្ចរបស់ប្រទេសនៅឆ្នាំ ២០២២ ក៏ដោយ តែប្រធានក្រុមហ៊ុនយក្សថៃ CP លោក Suphachai នៅតែមានសុទិដ្ឋិនិយម និងជឿជាក់ថា ឆ្នាំ ២០២២ សម្រាប់ប្រទេសថៃ នឹងក្លាយជាមជ្ឈមណ្ឌលក្នុងតំបន់សម្រាប់ការលូតលាស់នៃវិស័យជាច្រើន។
បើតាមលោក Suphachai ការព្រួយបារម្ភអំពីអតិផរណាកើនឡើងនៅក្នុងប្រទេសថៃ វាក៏មានជាប់ទាក់ទងនឹងកត្តារួមផ្សំខាងក្រៅផ្សេងទៀតដែរ ដូចជាភាពតានតឹងនៃភូមិសាស្ត្រនយោបាយអាមេរិក-ចិន វិបត្តិស្បៀងអាហារ និងថាមពលសកលោក ការប៉ោងឡើងនៃសក្ដានុពលរូបិយបណ្ណឌីជីថល (Cryptocurrency) និងការបន្ដចាក់បញ្ចូលនូវមូលធនដ៏សម្បើមនៅក្នុងសេដ្ឋកិច្ចពិភពលោក ដើម្បីរក្សាស្ថិរភាពសេដ្ឋកិច្ច នៅអំឡុងកូវីដ១៩រាតត្បាតជាដើម។
បើតាមអ្នកជំនាញ ប្រទេសថៃត្រូវតែកំណត់ទីតាំងខ្លួនឯងជាយុទ្ធសាស្ត្រ ដើម្បីក្លាយជាមជ្ឈមណ្ឌលមួយ ដោយបង្ហាញពីសមិទ្ធិផលរបស់ខ្លួនក្នុងវិស័យផលិតកម្មម្ហូបអាហារ វិស័យវេជ្ជសាស្ត្រ ភស្តុភារកម្ម ហិរញ្ញវត្ថុឌីជីថល និងវិស័យបច្ចេកវិទ្យាជាដើម៕អត្ថបទ ស៊ើង និមល់
None
