ទោះយ៉ាងណា ធនាគារកណ្ដាលអាមេរិកអះអាងថា ការដំឡើងអត្រាការប្រាក់លើកចុងក្រោយ អាចនឹងធ្វើឡើងម្ដងទៀតនៅខែកញ្ញាខាងមុខ។ គ្រាន់តែធនាគារកណ្ដាលអាមេរិកបានប្រកាសដំឡើង អត្រាការប្រាក់នេះភ្លាម គេឃើញធនាគារកណ្ដាលមួយចំនួននៅអាស៊ីចាប់ផ្ដើម ដំឡើងអត្រាការប្រាក់គោលរបស់ខ្លួនដែរ។ នេះបើតាមការចេញផ្សាយរបស់សារព័ត៌មានធំជាច្រើន។
នេះគឺជាការដំឡើងអត្រាការប្រាក់លើកទី១១ហើយ ដែលធនាគារកណ្ដាលអាមេរិកបានធ្វើនៅក្នុងកិច្ចប្រជុំ១២លើកចុងក្រោយរបស់ខ្លួនដោយកំណត់អត្រាការប្រាក់គោលឱ្យស្ថិតនៅចន្លោះពី៥,២៥% ទៅ៥,៥០% ជាកម្រិតខ្ពស់បំផុតមួយ ដែលគេមិនធ្លាប់បានឃើញក្នុងរយៈពេលប្រហែល ២២ ឆ្នាំមកនេះ។
លោក ផៅវែល បាននិយាយថា គណៈកម្មាធិការ(ទីផ្សារបើកចំហសហព័ន្ធ)នឹងបន្តវាយតម្លៃព័ត៌មានបន្ថែមទៀត និងផលប៉ះពាល់របស់វាចំពោះគោលនយោបាយរូបិយវត្ថុនេះ ហើយលោកក៏មិនទាន់ធានាទាំងស្រុងថា នេះជាការដំឡើងចុងក្រោយឬយ៉ាងណានោះទេ ដោយលោកបានទុកឱ្យទ្វារបើកចំហសម្រាប់ការសម្រេចថា ដំឡើងម្ដងទៀត ឬក៏អត់នៅក្នុងកិច្ចប្រជុំនៅខែកញ្ញា។
គ្រាន់តែធនាគារកណ្ដាលអាមេរិកប្រកាសដំឡើងអត្រាការប្រាក់បាន១ថ្ងៃហើយភ្លាម ប្រាក់ដុល្លារអាមេរិកបានធ្លាក់ថ្លៃភ្លាមតែម្ដងនៅថ្ងៃព្រហស្បតិ៍នេះ ដ្បិតក្រុមអ្នកវិនិយោគលើទីផ្សារជឿជាក់ថា វាអាចជាកាដំឡើងអត្រាការប្រាក់លើកចុងក្រោយរបស់សហរដ្ឋអាមេរិក បើទោះបីជាធនាគារកណ្ដាលបើកចំហរទ្វារសម្រាប់ការដំឡើងនៅខែកញ្ញាខាងមុខក្ដី។
អត្ថបទគួរអាន
លោក អេមីន ហាជីយេវ (Emin Hajiyev) សេដ្ឋវិទូជាន់ខ្ពស់នៅក្រុមហ៊ុន Insight Investment បាននិយាយថា គេអាចដំឡើងអត្រាការប្រាក់ម្ដងទៀតក្នុងរយៈពេលប៉ុន្មានខែខាងមុខទៀតនេះ ប៉ុន្តែលោកសង្ឃឹមថា ការដំឡើងអត្រាការប្រាក់កាលពីថ្ងៃទី២៦កក្កដា អាចជាការដំឡើងលើកចុងក្រោយ ។
ស្របពេលដែលធនាគារកណ្ដាលអាមេរិកដំឡើងអត្រាការប្រាក់បន្ថែម ធនាគារកណ្ដាលក្រុងហុងកុង នៅថ្ងៃទី ២៧ ខែកក្កដា បានដំឡើងអត្រាការប្រាក់គោលរបស់ខ្លួន ០,២៥%បន្ថែមទៀតដែរ ឱ្យឡើងដល់ ៥,៧៥% ពោលគឺក្រោយពេលតែប៉ុន្មានម៉ោងប៉ុណ្ណោះ បន្ទាប់ពីធនាគារកណ្ដាលអាមេរិកបានធ្វើដំឡើងរួចហើយ។ គោលនយោបាយរូបិយវត្ថុរបស់ក្រុងហុងកុងត្រូវផ្សាភ្ជាប់ជាមួយនឹងគោលនយោបាយរបស់សហរដ្ឋអាមេរិក ដោយធ្វើយ៉ាងណាឱ្យតម្លៃប្រាក់ដុល្លារហុងកុងប្រមាណ ៧,៧៥-៧,៨៥ដុល្លារហុងកុង ប្ដូរបានមួយដុល្លារអាមេរិក។
ចំណែកធនាគារកណ្ដាលថៃឯណោះវិញ បានប្រកាសនៅថ្ងៃទី២៧កក្កដានេះដែរថា ខ្លួននឹងធ្វើការដំឡើងអត្រាការប្រាក់គោល ០,២៥%ថែមទៀតឱ្យដល់ ២,២៥% នៅថ្ងៃទី០២ ខែសីហាខាងមុខនេះ។
ភាគហ៊ុននៅអាស៊ីវិញ បានកើនឡើងដែរ នៅថ្ងៃទី ២៧ ខែកក្កដា បន្ទាប់ពីធនាគារកណ្ដាលអាមេរិក បានដំឡើងអត្រាការប្រាក់ ពោលគឺបានកើនឡើងដល់កម្រិតខ្ពស់បំផុតក្នុងរយៈពេល៥ខែមកនេះ ចំពេលដែលមានក្ដីរំពឹងថា ទំនោរនៃការដំឡើងអត្រាការប្រាក់របស់អាមេរិក នឹងត្រូវបញ្ចប់ ហើយសេដ្ឋកិច្ចនឹងចាប់ផ្ដើមគេចផុតពីការធ្លាក់ចូលក្នុងវិបត្តិ ដែលកត្តាទាំងនេះ នឹងជំរុញដល់ទស្សនវិស័យកំណើនសេដ្ឋកិច្ចសកល ជាមួយនឹងហានិភ័យដែលមានជាទូទៅ លែងធ្ងន់ធ្ងរដូចមុន៕
