យោងតាមសេក្ដីរាយការណ៍ពីកាសែត Vientiane Times ដែលបានស្រង់សម្ដីរបស់លោក ផុងឆាយសាក់ អិនថារ៉ាត់ (Phongxaysack Intharat) អនុរដ្ឋមន្ត្រីនៃក្រសួងការងារ និងសង្គមកិច្ចឡាវ បាននិយាយនៅក្នុងកិច្ចប្រជុំមួយថ្មីៗនេះថា មានរោងចក្រ និងក្រុមហ៊ុនជាច្រើន បានចាត់ទុកកម្មករឡាវថា មិនមានជំនាញ ហើយបានផ្ដល់តែប្រាក់ឈ្នួលអប្បបរមា សម្រាប់ពួកគេតែប៉ុណ្ណោះ បើទោះបីជា ពលករទាំងនេះទទួលបានជំនាញបន្ថែម និងសមទទួលបានប្រាក់ខែខ្ពស់ជាងនេះក្ដី។
យ៉ាងណាមិញ រដ្ឋាភិបាលក៏មិនអាចចុះសម្រុះសម្រួលបញ្ហារវាងនិយោជក និងបុគ្គលិករបស់ពួកគេ ទាក់ទងនឹងកិច្ចព្រមព្រៀងលើការទូទាត់ប្រាក់ឈ្នួល និងអត្ថប្រយោជន៍ផ្សេងៗទៀត ដែលមានស្រាប់នោះផងដែរ។ កត្តានេះ បានជំរុញឲ្យពលករឡាវ ស្វែងរកការងារល្អជាងមុន និងឱកាសទទួលបានប្រាក់ឈ្នួលខ្ពស់នៅកន្លែងផ្សេងទៀត។
អត្ថបទគួរអាន
មន្ត្រីជាន់ខ្ពស់ក្រសួងការងារ និងសង្គមកិច្ចរបស់ឡាវរូបនេះ ថែមទាំងបានសង្កត់ធ្ងន់អំពីភាពចាំបាច់ ដែលត្រូវបង្កើនប្រាក់ឈ្នួលអប្បបរមាសម្រាប់កម្មករនិយោជិត ដើម្បីធ្វើឲ្យប្រសើរឡើងនូវគុណភាពការងារនៅក្នុងប្រទេស។ ក្រសួងដដែលនេះ ក៏បានគូសបញ្ជាក់ទៀតថា កម្មករធ្វើការនៅប្រទេសថៃប្រមាណ៧០% ដែលបានត្រឡប់ចូលក្នុងប្រទេសឡាវវិញ អំឡុងពេលកូវីដ១៩នោះ ឥឡូវនេះ បានវិលទៅធ្វើការក្នុងប្រទេសថៃវិញអស់ហើយ។
ជាមួយគ្នានេះ រដ្ឋាភិបាលឡាវក៏កំពុងតែធ្វើការជាមួយនឹងប្រទេសជិតខាង ពិសេសប្រទេសថៃ ដើម្បីធានាថា ពលករឡាវទាំងនោះ នឹងទទួលបានការមើលថែដោយស្មើភាព និងអត្ថប្រយោជន៍ ដែលពួកគេមានសិទ្ធទទួលបាន ដ្បិតថា បច្ចុប្បន្ន ពលករឡាវជាច្រើនកំពុងធ្វើការនៅទីនោះ។
សូមបញ្ជាក់ថា គិតមកទល់បច្ចុប្បន្ន ប្រាក់ឈ្នួលអប្បបរមានៅក្នុងប្រទេសឡាវ គឺមានប្រហែល ៧០ដុល្លារក្នុងមួយខែប៉ុណ្ណោះ ខណៈដែលរដ្ឋាភិបាលប្រទេសនេះបានប្រកាសថ្មីៗនេះថា នឹងបង្កើនប្រាក់ឈ្នួលអប្បបរមានេះឲ្យបានដល់ ៧៦ដុល្លារអាមេរិកក្នុងមួយខែ នៅក្នុងខែឧសភាឆ្នាំ២០២៣៕
