ក្រោយការធ្វើសនវកម្ម ថៃរកឃើញការចំណាយខ្ជះខ្ជាយលើគម្រោងសាងសង់នានា ជិត១ពាន់លានដុល្លារ

លោក សុទ្ធីពង្ស ប៊ុននិធិ ( Sutthipong Boonnithi) អ្នកនាំពាក្យការិយាល័យសវនកម្មរដ្ឋ បាននិយាយថា ការខាតបង់ហិរញ្ញវត្ថុដោយសារតែការគ្រប់គ្រងគ្មានប្រសិទ្ធភាពលើកិច្ចសន្យាសាងសង់ទាំងអស់ក្នុងអំឡុងឆ្នាំសារពើពន្ធឆ្នាំ២០២៣ មានទំហំរហូតដល់ទៅប្រមាណ៨៤៧លានដុល្លារ។ តួលេខនេះបានមកពីការធ្វើសវនកម្មប្រចាំឆ្នាំរបស់ការិយាល័យលើគម្រោង និងកិច្ចសន្យាជាង១ម៉ឺន៤ពាន់ពីទីភ្នាក់ងារសាធារណៈជាង៩ពាន់ស្ថាប័ននៅទូទាំងប្រទេស។

លោកបានបន្តថា នៅក្នុងអំឡុងពេលនៃការធ្វើសវនកម្ម គេបានរកឃើញគុណវិបត្តិក្នុងការគ្រប់គ្រងថវិការបស់ទីភ្នាក់ងារប្រមាណ១ពាន់៧រយគម្រោង ឬជាង១៩%។ ក្រោយការរកឃើញ អ្នកជំនាញបានផ្តល់អនុសាសន៍តាមលក្ខខណ្ឌ ដើម្បីកែលម្អរបាយការណ៍ហិរញ្ញវត្ថុចំនួន៦២៩គម្រោង ក្នុងចំណោមគម្រោងសរុប ៨,៥០០ ដែលកំពុងត្រូវបានធ្វើសវនកម្ម។

ភាគច្រើននៃកំហុសដែលត្រូវបានរកឃើញតាមការធ្វើសវនកម្ម គឺជាការកត់ត្រាមិនបានពេញលេញ ឬកត់ខុសលើការចំណាយសំខាន់ៗ ដែលភាគច្រើនពាក់ព័ន្ធនឹងគម្រោងសាច់ប្រាក់ គម្រោងដីធ្លី និងគម្រោងអចលនទ្រព្យ។ ក្រៅពីនោះការិយាល័យសវនកម្មរដ្ឋ ក៏បានរកឃើញកិច្ចសន្យាចំនួន២,៦៣៨ នៃកិច្ចសន្យាសរុបជាង៥ពាន់៣រយ មិនបានគោរពតាមច្បាប់ ឬកិច្ចសន្យា ដែលមានសាច់ប្រាក់សរុបជិត១៩លានដុល្លារ៕

ដោយៈ សរ សុជាតិ